Josue 11 - U TIENU MAAMA TILI 2013

Isidayeli toabu Merom dogu ñima kani

¹ Hatisori bado Yabini n den gbadi Josue n tieni tieni yaala kuli, o den soani a tonda Madon dogu bado Yobabi kani, Simironi leni Akesafi yaa badiba kani.

² O den soani a naa tonda nujienu po juana badiba kani, Jurden kpenu balinma yaa badiba kani, Kinereti ñincianma ganu po, ku joaloangu nni yaa badiba kani leni nintuali po, yaa boanjaali n kuu leni Dori badiba kani.

³ O go den soani yaa niba n tie ne moko yaa kani: Kanana yaaba, yaaba n ye Jurden kpenu puoli, u nintuali, Amori yaaba, Hititi yaaba, Perisiti yaaba leni Jebusi yaaba, yaaba n ye a juana nni leni Hiviti yaaba, yaaba n ye Hermon juali balinma, Misipa diema nni.

⁴ Laa badiba kuli den fii leni yaa toatieba n yabi, kaa pia coali nani mi ñincianma tanbiima yeni leni i taami leni toateliti boncianla.

⁵ Bikuli den juogi ki bili ban baa kadi naani, ki gedi ki kpaa bi toanagili ki kuu Merom ñima kani, ki baa tuogi leni Isidayeli yaaba bu toabu.

⁶ O Diedo den yedi Josue: «Ŋan da jie ba, kelima saala u naa yogunu, n baa kpa bikuli Isidayeli yaaba po. Ŋan jia bi taami gadibanjiini, ki juu bi toateliti.»

⁷ Josue leni o toatieba den gedi ki ludi ba, ki baa ba Merom ñima kani.

⁸ O Diedo den taa ba ki tieni Isidayeli yaaba nuu nni. Bi den paadi ba, ki ŋoadi ki deli ba ki gedi hali u dociamu Sidon leni Misirefoti-Mayim, nujienu po. Puoli po mo, bi den ŋoadi ki deli ba ki pundi hali Misipa joaloangu nni. Bi den kpa bikuli, kaa ŋaa ba niyendo leni miali.

⁹ Josue den tieni nani o Diedo n den yedi o maama: O den jia bi taami gadibanjiini, ki juu bi toateliti mo.

Isidayeli yaaba paadi Hatisori dogu

¹⁰ Josue den lebidi ki guani ki baa Hatisori dogu, yuu n den kpa tie nuganu po diema kuli docianmoanu. O den kpa u bado,

¹¹ ki teni ke bi kpa u niba kuli, yaala n pia miali ki fo kuli ki den sieni lienni. Bi den juu u dogu.

¹² Josue den paadi bi badiba yaaba n den taani yeni kuli, ki fie bi dogi. O den kpa ba leni bi dogi niba kuli, nani o Diedo naacemo Musa n den bili maama.

¹³ Ama Isidayeli yaaba ki den juu yaa dogi n ye a juana po, li yàá tie Hatisori, Josue n den juu yuu yaa ka.

¹⁴ Isidayeli yaaba den taa i dogi yeni piama leni i yandi, ke li tua bi fagidi. Ama bi den kpa bi niba wani kuli, baa den ŋaa yaala n pia miali kuli lienni.

¹⁵ Musa den teni Josue o Diedo n den teni o yaa ñoamabona. Josue den tieni akuli, kaa ŋaa liba.

Josue paadi mi diema ki dudi

¹⁶ Josue den paadi mi diema kuli, lani n tie li juali nni diema, nuganu po yaa yaama, Gosen yaama, u tialu nni yaama, u kpenciamu Jurden balinma leni jienu po yaa juana leni laa tiali.

¹⁷ O den paadi ki kpa yaa badiba diema n cili nuganu po Halaki juali kani, ki kuu Seyiiri juali, ki yaa caa hali nujienu po Baali-Gadi, naani n ye Liban joaloangu nni, Hermon juali kani.

¹⁸ Josue n den tuogi leni laa badiba yaa toabu den waagi boncianla.

¹⁹ Hiviti yaaba, yaaba n den ye Gabaon bebe n den kuani o ŋantaado leni Isidayeli yaaba. Yaa dogi n sieni kuli, bi den tieni bu toaboe ki paadi yi.

²⁰ O Diedo den teni ke bi juagi bi pala, ki tuogi leni Isidayeli yaaba bu toabu, ke bani Isidayeli yaaba kpa ba, ki bolini ba cain, kaa gbadi bi po ninñima, nani o Diedo n den puogi Musa maama.

²¹ Lanyogunu Josue den gedi ki ban baa Anaki buolu yaaba, yaaba n den ye Hebiron juana nni, Debiri juana, Anabi juana, Juda leni Isidayeli diema juana kuli nni. O den kpa ba, ki bolini bi dogi kuli cain.

²² Anaki buolu yaaba, ba yendo ki den sieni Isidayeli yaaba diema nni. Bi den sieni Gasa, Gati leni Asidodi yaa dogi nni bebe.

²³ Yeni Josue den paadi mi diema kuli, nani o Diedo n den puogi Musa maama. O den boagidi ma Isidayeli yaaba. Li yaa puoli, Isidayeli yaaba den fuodi leni bu toabu.