Josue 1 - U TIENU MAAMA TILI 2013

U ñoanianu tinga diedima 1—12 Josue gaa Musa kaanu

¹ O Diedo naacemo Musa n den kpe, o Diedo den maadi leni Nun bijua Josue, Musa todika, ki yedi o:

² «N naacemo Musa kpe. Moala ŋan fii ki duodi yaa kpenu n tie ne, yuu n yi Jurden, fini leni ku niligu na kuli, ki ban kua min puni bani Isidayeli yaaba yaa diema nni.

³ Yi taali n baa ŋmaa naankani kuli, n puni yi likuli, nani min den yedi Musa maama.

⁴ Yi diema banlu, ganu po, baa yaa tie mi fanpienma. Jienu po, mi baa tandi ki pundi hali yaa juana n ye Liban diema nni. Puoli po, mi baa n pundi hali u kpenciamu Efrati, lani kuli tie Hititi yaaba diema. Nintuali po mo, mi baa tandi ki pundi hali mi ñincianma Mediterane.

⁵ Hali ŋan baa yaa ye, oba kuli kan fidi ki sedi ki pani a, kelima n baa yaa ye leni a nani min den ye leni Musa maama. N baa kubi a, n kan ŋaa ŋa abada.

⁶ Paagi a baa, paagi a pali, kelima fini n baa gobidi yaa nibuolu n tie ne, ban kua ki diedi min den poli ki niani bi yaajanba ke n baa pa ba yaa diema.

⁷ Ŋan cuo ki sieni a gbanu, ki paagi a pali bebe, ki tuo ki yaa ŋua n naacemo Musa n den waani a yaa bali maama. Ŋan da jadi ganu bi jienu ki ŋaa ma. Lani, ŋan fii ki baa tieni yaala kuli baa cuoni a po bonŋanla.

⁸ Ŋan yaa tiadi yogunu kuli n bali maama tili ne bangima, ki yaa cogi, ki kpaagi mi po u yensiinu leni ku ñiagu kuli. Tieni man yedi yaala kuli! Yeni, ŋan fii ki jagi yaala kuli, a baa tieni la, li baa cuoni a po bonŋanla mo.

⁹ Mini ka li teni a yaa ñoamabonli n tie ne te: ‹Cuo ki sieni a gbanu, ki paagi a pali. Da cedi liba n wudi a gbanu, ki da jie liba kuli mo! Mini o Diedo a Tienu ye leni a ŋan fii ki baa tieni yaala kuli nni.› »

Josue bogini Jurden duodima

¹⁰ Josue den puogi Isidayeli yaaba yudanba,

¹¹ ke ban gaani li nagili nni ki waani bi niba ke ban bogini mi jiema, kelima danataa siiga, bi baa duodi Jurden, ki gedi ki ban diedi o Diedo bi Tienu n puni ba ke ban diedi yaa diema.

¹² Josue den yedi Rubeni buolu, Gadi buolu leni Manase buolu yuu n tie buolu boagidima:

¹³ «Yin tiadi mani o Diedo naacemo Musa n den teni yi yaa ñoamabonli, wan den yedi yi: ‹O Diedo yi Tienu puni yi yaa diema n tie ne, ki puni yi mi fuodima.

¹⁴ Yi puoba, yi bila leni yi yandi baa fidi ki yaa ye ne, Musa n boagidi ki teni yi yaa diema ne niinni. Ama, yinba bi jaba yaaba n pundi ki gedi toabu kuli, yin taa yi toatiadi, ki kua yi kpiiba liiga ki duodi u kpenu ki ban todi ba,

¹⁵ hali U Tienu n baa pa bani mo n diedi wan puni ba yaa diema nani wan puni yi ke yimo diedi maama. Li yaa puoli, yin guani ki diedi Musa n boagidi ki teni yi yaa diema, yaama n ye Jurden puoli ne.› »

¹⁶ Bi den guani ki yedi Josue: «Ti baa tieni ŋan yedi ti yaala kuli, ŋan baa soani ti naani kuli ti baa gedi.

¹⁷ Ti baa tuo ki yaa ŋua a maama kuli, nani tin den tuo ki ŋua Musa maama maama yeni. O Diedo a Tienu n yaa li ye leni a, nani wan den ye leni Musa maama be.

¹⁸ Yua n yie a ñoamabonbilikaali, kaa tuo ki tieni ŋan yedi o yaala kuli, bi baa kpa o. Ŋan cuo ki sieni a gbanu, ki paagi a pali bebe.»