Joeli 4 - U TIENU MAAMA TILI 2013

¹ Lanyogunu n baa teni Juda leni Jerusalemi yaaba, Yaaba n den ye ti yonbidi nni n lebidi ki kpeni.

² N baa taani i nilanbuoli kuli, Ki jiini ba Josafati joaloangu nni. Lankani n baa bu leni i nilanbuoli yeni, Kelima ban tieni yaala n niba Isidayeli yaaba yeni. N baa buleni i nilanbuoli yeni Kelima bi yadi yadi n niba nibuotoe nni. N baa bu leni ba kelima bi boagidi n diema bi ŋmiali nni.

³ I nilanbuoli yeni toani n niba tiatia. Bi kuadi a bonjabila ki jiadi a puoconcona, Ki kuadi a bonpobila ki ñuni bi daama.

⁴ Yinba, Tiiri leni Sidon dogi, Yinba, Filisiti tinbuona yaaba, Yi lingi nni be yaa po yo? Yi bua ki tuu nni li panli bi? Li yaa tie yeni wani, n baa jaligi Ki jiini yi tuada yi yula po.

⁵ Yi taa n ŋanjilifa leni n wula, Min den pia yaa ŋalimano ke o tie n bonmoanla ki go ŋani yeni. Yi tugi la ki ban bili yi budiena nni.

⁶ Yi kuadi Juda leni Jerusalemi diema yaaba Giresi yaaba po. Yi tieni yeni kelima yi bua ki foagidi ba leni bi diema.

⁷ Ama mini o Diedo, n baa ñani ba Yin ban kuadi ba naanpo. N baa guani ki jiini yi biadima panpaani yi yula po.

⁸ N baa kuadi yi bijaba leni yi bisiaba Juda yaaba po, Bimo n kuadi ba Sabe yaaba po, Yaa nibuolu n ye hali foagima yeni. Mini o Diedo n yedi yeni.

Bu toajuodikaabu leni li bujiali

⁹ Kpaani mani ki waani li naa bonla i nilanbuoli siiga: ‹Bogini mani bu toabu po! Fundi mani a jakoanda! Bi toatieba kuli n fii ki cuo li cenli.

¹⁰ Taa mani yi naakuuna ki maa mu jugisiemu, Yi moaciedi mo n tua kpaana. Ba yua n tadi n yaa nua o yuli ke o tie jakoando.

¹¹ Jaligi mani ki cua, Yinba yaa nilanbuoli n gaani ki lindi kuli N taani mani ku joaloanyengu nni.› Fini o Diedo mo, Ŋan soani bi toatieba ban baa ba lankani.

¹² ‹I nilanbuoli n fii ki cua Josafati joaloangu kani. Lankane ke n baa kali ki jia ti buudi Leni yaa nilanbuoli n gaani ki lindi kuli.

¹³ Taa mani ku moaciegu ki ce Kelima ku kpaangu beni. Cua mani ki ŋmaa ki midi yi duventiidi bonluonkaala Yaala n gbie duven tuodikaanu yeni. Ti tadiciandi mo gbie, I nilanbuoli yeni biadima yabi hali ki kandi.

¹⁴ Yaa niba n baa cua ti buudi joaloangu nni yabi boncianla. O Diedo n baa doagidi o pabienli yaa daali Ku joaloangu yeni niinni nagini.

¹⁵ U yienu leni o ŋmaalo biigi, A ŋmabila mo yaa yenma bodi.

¹⁶ O Diedo duni Siyon juali po, O ye hali Jerusalemi ki kpaani. Tanpoli leni ki tinga den digibi. Ama o Diedo kubi o niba, O tie wuonkaanu Isidayeli yaaba po.

¹⁷ Lane, yi baa bandi ke n tie Li Miali Diedo yi Tienu, Mini yua n ye Siyon, n joagagidikaali po. N baa guani ki diedi Jerusalemi cain, Bi nilanba kan go diedi likani abada.›

U Tienu guani ki seligi o niba

¹⁸ Laa daali mi dapanma baa bundi a juana po, Mi naaŋanma mo n puubi mu joabimu po. Mi ñima mo baa puubi Juda kpeni kuli nni. Li ñinbunli baa pudi o Diedo diegu nni, Ki yaa joagini Sitimi joaloangu.

¹⁹ Ejipiti diema niba baa bodi, Edomi diema mo n tua yaa fanpienma n biidi cain. Kelima laa diema kuli mabini Juda yaaba, Ki kpa yaa niba n ki pia tagili bi diema nni.

²⁰ Ama Juda leni Jerusalemi baa yaa pia bi niba yaa yogu n tuu yaa yogu.

²¹ N baa tuu min daa den tuu yaa panli, Ban den kpa yaaba ke baa pia tagili po. Mini o Diedo, n baa yaa ye Siyon.»