Joeli 1 - U TIENU MAAMA TILI 2013

O falabiado baa mi diema 1—2 I naaci leni u tayialu baa mi diema

¹ O Diedo den teni ke Petueli bijua Joeli maadi yaa maama n tie ne:

² «Cengi mani line yinba a nikpela, Diadi mani yi tuba ki cengi yinba Juda yaaba kuli. Naani li bonbuolu kpa tieni yi yogunu, Bi yi yaajanba yogunu?

³ Yin togidi la yi bila, Ke yi bila mo n togidi la bi bila, Ke bi yaa bila mo n togidi la yaa nifiima n baa ŋoadi.

⁴ A sidibila n ŋmani ki ŋaa yaala, A dondoba n ŋmani ki dudi. A dondoba n ŋmani ki ŋaa yaala, A tobiñaana n ŋmani ki dudi. A tobiñaana n ŋmani ki ŋaa yaala, I naaci n ŋmani ki dudi.

⁵ A dañogaada, fundi mani ki mua boncianla. Yinba yaaba n ñu duven, buudi mani, Kelima bi babidi yi yi dapanma.

⁶ U nibuolu baa n diema. U pia u paalu kaa pia coali mo. U ñina tie nani o yangbanjoa ñina, Nani o yangbanñua cela yeni.

⁷ U nibuolu yeni bolini ti duventiidi, Ki jendi jendi ti kankandi, Ki kpabidi kpabidi yi, ki tudi ki luni yi, Ki kogidi n duventiidi beni poaga ki ŋaa yi bonkpabipieni.

⁸ Mua ki figindi mani nani yaa puocaano n mua o calo kuuma yeni.

⁹ Mi pienma pada leni a ñincaba pada bodi o Diedo diegu nni. O Diedo naacenba bi kopadicianba, ye leni li paboanli.

¹⁰ I kuani jugi, Ki tinga ye leni li paboanli, Kelima ŋalikama biidi, O duvenpaano gbeni, Mi kpama mo ki go sieni ba kpajualu.

¹¹ Bi kpakpaaba gbani wudi, I duventiidi kpakpaaba buudi ŋalikama leni orje po, Kelima i kuani bonluonkaala bia cain.

¹² Bu duventibu kuodi, Bu kankanbu mali, Grenadi tilondi, ti kpakpalidi, pomie tiidi Leni i kuani tiidi kuli mali. Bi nisaaliba pamanli gbeni.

Mi yanlebidima yiinu

¹³ Yinba bi kopadicianba, La mani li paboanli tiadi ki biidi yi pala. Yinba yaaba n tuuni li padibinbinli kani, mua mani. Cua mani ku ñiagu ki duani ki la li paboanli tiadi, Kelima mi pienma pada leni a ñincaba bodi ti Tienu diegu nni.

¹⁴ Bili mani u yogunu ki loli bu ñoabu, Taani mani taancianli. Taani mani a nikpela leni mi diema yaaba O Diedo yi Tienu diegu nni. Kpaani ki mia mani o Diedo todima!

¹⁵ Ŋain, yaa dabiadili n kpendi ne te! O Diedo pabienli daali nagini, Li kpendi leni U Paaciamu Daano n jagi yaa bolinma.

¹⁶ Mi jiema bodi ti nunbu nni, Li pamanli leni li pamankandikaali bodi ti Tienu diegu nni.

¹⁷ Li bonbulikaala kuodi ti jaabuodi nni, A senba tua bonkuoma, A buabuana baa ki mudi mudi, kelima ŋalikama Poadima po.

¹⁸ Ti yandi n buudi maama ne te! I naakuli pua yaayaa ki lindi, Kelima moaŋmankaadi ki go ye, Ba ti yanbidi mo ye leni falaciamo.

O saawalipualo jaandi

¹⁹ O Diedo, n jigidi ki nua fine Ki kpaani ki miadi a todima! Kelima u mu dini li yankpaafuali, U mupienu mo juu i kuani tiidi.

²⁰ Ba ti moayandi moko jigidi ki nua fine, Kelima a ñinbuona kuodi, U mu mo dini li yankpaafuali.