Jobi 9 - U TIENU MAAMA TILI 2013

Jobi n guani Bilidadi yaala

¹ Jobi den guani ki yedi:

² «I moamoani po, n bandi ke li tie yene. O nisaalo baa tieni lede ki yaa tiegi U Tienu nintuali?

³ O nilo yaa bi bua ki nia leni U Tienu, buali tudili siiga, O kan fidi ki guani ba bualiyendu.

⁴ Wani n pia mi yanfuoma leni u paalu kuli, Ŋme n baa fidi ki yie o po, lan cedi o?

⁵ Wani n yen ŋmiagi a juana Ke a kan bandi mo. O pabienli nni o yen lu ki yandi a.

⁶ O yen teni ki tinga leni ki tanpuuli n digibi, Ki benjieli mo kuli n yaa koa ki baali.

⁷ O yen teni ke u yienu kan pudi. O yen luoni a ŋmabila.

⁸ Wani o bebe n yen tandi tandi ti tawadi, Ki yaa cuoni mi ñincianma gbanu po.

⁹ Wani n tagi bi naadadiba leni ŋmasoali, O ŋmabiluomo leni tanpoli ŋmabibuoli kuli.

¹⁰ O tiendi yaala n ŋani, Ki pia li pakili leni ki lidiga. O tiendi yaa bancianma n ki pia coali.

¹¹ Diidi, o tagini n kani ke n naa laa o. O ban caa ke n naa bandi Lan bua ki yedi yaala.

¹² Ŋme n baa teni wan ŋaa wan fie Yaala leni u paalu? Ŋme n baa tuo ki buali o: ‹A tiendi be mo n yeni?›

¹³ U Tienu pabienli daa jiidi, Mi ñincianma nni bonfuodibiado Leni o todikaaba kuli baa ki laabi o nintuali.

¹⁴ Nmo baa fidi ki guani o be? N baa bandi mi laa maame o kani?

¹⁵ Ba n yaa pia i moamoani, N kan baa maguankaama. N baa mia n bujialo n gbadi n po Mi ninñima bebe.

¹⁶ Ba n yaa bi yini o ke o tuo, N kan tuo ki daani ke o diadi O tubili ki cengi nni.

¹⁷ Wani yua n fii ki sedi n po Nani ku tafaagu yeni, Ki kubi nni ki poagili fanma fanma.

¹⁸ Waa puni nni min fuo ba waamu, Kelima o guoni nni leni li paboanli.

¹⁹ N yaa yedi ke n baa tieni u paalu, O yaa paalu n cie. Ba li yaa tie ti buudi kani, Ŋme nan baa tuo ki yini o likani?

²⁰ Ba n yaa pia i moamoani, N maama baa cuo nni. Min baa yedi yaala kuli nni, O baa waani nni ke n nani.

²¹ Naani n tie papiendaano? Ba mini n ba ki go bani cain. N fali n yema.

²² N baga ki ye, lani n teni ke n yedi: ‹O bolindi o papiendaano Leni o nibiado kuli yenma.›

²³ Yebiadimiba yaa baa, Ki kpa bi niteginkaaba, O yama ki yagini bi falabiado po.

²⁴ Bi yaa taa mi diema ki teni bi nibiadiba, U Tienu baa pii bi bujiaba nunmu. Li yàá tie wani yaa ka, ŋme naane?

²⁵ N dana jaligi ki cie yua n tiini. N dana sani kaa laa mi yemanma.

²⁶ N miali dana yeni pendi Nani mi ñincianma ñinbiadi yeni, Bi nani jiebani n baa cii Wan baa cuo yaala po maama yeni.

²⁷ N yaa yedi n baa sundi n yenbidi, Ki cedi n pabiidili, ki mangi n pali,

²⁸ Se n fala n teni min yaa ye leni ti jawaandi. N bani ke U Tienu kan sundi n tagili po.

²⁹ I tagili baa tua n yaa yii yo. Be yaa po yo ke n baa coagi n yuli Fanma fanma?

³⁰ Ba n yaa bi wali leni bu ciebu, Ki nidi n nii leni mi jiama,

³¹ A bi baa ñuagi nni li ŋoabili nni, Hali yaala ke n tiadi mo baa sengi nni.

³² Waa tie nisaalo nani mini yeni, Ke ti baa taani ki kadi ti buudi kani, Min maadi ki guani o.

³³ Ti siiga nni naa pia yua n baa Saa ti po i moamoani, Yua n baa maani o nuu tipo.

³⁴ Landaano bi baa maadi U Tienu baliju yeni n po, Ki teni o jawaandi mo n da go cuo nni.

³⁵ Lanwani, n baa maadi ki naa jie o, Ama laa tie yeni, kelima n li ye nbebe yo.