Jobi 30 - U TIENU MAAMA TILI 2013

Jobi tiadi wan ye yaa fala nni po

¹ Ama moala wani, Yaaba n tie n kani bila nua ki sengi nni, Min den fali yaaba yaa baanba, Kaa taagi ba, ba yaa sangbanli N guu n yankuli siiga yeni.

² Bani yaaba n ki den pia fidu yeni, Den baa fidi ki tieni n po be yo?

³ Mi koma leni mi luoma den dondi ba, Ki teni ke bi sani ki teli a tinwaga po, Naankani n den tie diegbendi hali yogu.

⁴ Bi guni ti tudi nni muadi, Yaa tiidi n ye mi fanpienma nni Jiini mo n tie bi jiema.

⁵ Bi niba deli ki ñani ba bi siiga, Ki ŋua ki yiedi ba nani a suuda yeni.

⁶ Bi ban ye mi joayidima nni Leni ki tinga buodi nni.

⁷ Bi den laabi biyaba po ti konkondi nni, Ke bi moe ban tuodi a tugana siiga.

⁸ Bi deli ki ñani bani Nisaalifanma fanma bila yeni mi diema nni.

⁹ Moala, bani n ji bugini nni i yani, Ki teni ke n tua bi po li ñuali bonla.

¹⁰ Ban sengi nni maama po teni Ke bi sani ki ŋaa nni, Ki siini n nunga nni ban bua maama.

¹¹ U Tienu n tadigi ki fiagi nni yeni, Ke bani moko tiendi nni ban bua yaala.

¹² Laa niba n fii ki sedi n po, Ki sedi n po se bi bolini nni.

¹³ Bi jia n sanu ki bua ki guli nni, Bi siiga yuakuli tuuni n bodima po yo, Baa bua ba todikaaba.

¹⁴ Bi tagi u bilinu n padi naani ki pua Belibeli a bilincaba siiga ki kpendi.

¹⁵ Ti jawaandi cuo nni boncianla, Nani ku faagu yeni, Ti taa n bulicindi kuli ki ban caa. N yemanma mo pendi, Nani ku tawaligu yeni.

¹⁶ Moala n miali dana bua ki dudi, N yema mo kuli tie fala bebe.

¹⁷ Ku ñiagu, fala duoliti nni Ki ban kua hali n kpaba nni. Yaa fala n nugi nni yeni naa gbendi.

¹⁸ U Tienu cuo n liadinialu leni u paalu, Ki bua ki soadi nni.

¹⁹ U Tienu luni nni li ŋoabili nni, Ke n tua nani mi wagima Leni mi fantanpienma yeni.

²⁰ N tangi ki yi ŋa ŋan todi nni, Ama a naa guani nni liba kuli. N nagini ki sedi a nintuali, Ama ŋaa faami n po.

²¹ A fii n po leni mi biadima, Ki sedi n po leni a fidu kuli.

²² A teni ke ku faagu gedini nni Nani yua n jagi o taamo yeni, Ki teni ke n digibi banbani.

²³ N bani ke a li caani nni mi kuuma nne, Bi niba kuli n baa taani ki kadi naani.

²⁴ Naani yua n baa kpe, Ki yen miadi U Tienu n faabi o ka? Naani yua n ye fala nni, Ki yen miadi mi todima ka?

²⁵ Naani mii yen mua Leni yaaba yaa yema n pa bi po? Naani mii den ye Leni li paboanli o luodo po?

²⁶ N yema nni, n den miadi mi yemanma, Ama mi yebiadima n cua. N den guu mi yenma, Ama li biigili n cua n po.

²⁷ N yama kuli li yagine, Kelima fala dana cua n kani.

²⁸ N cuoni ki boani, ama laa ŋua u yienu ka. N yen fii ki sedi baa li nitaanli nni ki mua.

²⁹ N kpandi i tanboe kpiilo yo, Ti tataadi mo yaa yegininlielo.

³⁰ N gbanu boandi bii, N kpaba kabi ti ñinwadi po.

³¹ N gogidigu ji pua i kuyane, N yeliga mo todi a muamuada.