Jobi 27 - U TIENU MAAMA TILI 2013

Jobi go yedi Bilidadi: N bani U Tienu paalu

¹ Jobi go den doagidi o moamoani ki yedi:

² «Hali U Tienu yua n fo po, Wani yua n yie n moamoani yeni, Wani U Paaciamu Daano, Yua n teni ke n ye leni li paboanli,

³ Hali min baa yaa ye ki fo yaa banlu kuli, Ke U Tienu fuoma ye n miaboni nni,

⁴ N ñoacuuna kan maadi yaala n ki tiegi, N lanbu mo kan pua faama.»

⁵ U Tienu n da teni min pa yi moamoani. Hali min baa n kpe, N kan tuo ke n pali ki pieni.

⁶ Mini wani li se n teginma nne, N kan ña likani, Kelima n miali yema nni kuli, N pali siedi naa buni leni nni ba dayenli.

⁷ N yibali n tua nani o nibiado yeni, Yua n fii ki sedi n po mo n tua Nani yaa nilo n ki tiegi yeni.

⁸ Yii yen tua: «Yua n ki daani U Tienu go daani be yo, Kelima U Tienu baa ñani o miali?

⁹ Naani U Tienu cengi o moe, O yaa ye leni li paboanli yaa yogunu?

¹⁰ O yaa bi teni ke U Paaciamu Daano N tie wan bua yua, O bi baa yaa jaandi ki miadi o yogunu kuli.

¹¹ N baa doagidi yi po U Tienu banma, N kan wuoni yi U Paalu Daano jagili.

¹² Yikuli bandi ke li tie yene, Be n teni ke yi ŋua yaa sani n ki pia fuoma?

Yaala n ki cuoni bonŋanla kan waagi

¹³ Diidi U Tienu n bili o nibiado po yaa biinu. U Paaciamu Daano n bili O tugumoandaano po yaa panpaani nne:

¹⁴ Ba o bijaba yaa yabi, bu toabu n baa je ba, O puoliŋuani mo kan je ki guo.

¹⁵ O bijaba yaaba n sieni, mi kuuma baa je ba. Bi kpepuona mo kan fidi ki mua bi po.

¹⁶ Ba o yaa dogini ŋanjilifa nani mi tama yeni, Ki dogini ti tiayiekaadi mo nani ku yoagu yeni,

¹⁷ O niteginka n baa ti la li tiadi, Yua n ki pia tagili n baa diedi ŋanjilifa yeni.

¹⁸ O maa yaa dieli n ki pia fidu Nani o guudo n yen tii yaa koasugili yeni.

¹⁹ O baa duani ki tie piado, Ama o piama bianu n yeni, O baa fundi ki sua ke puu kuli ki go ye!

²⁰ Ti jawaanciandi yen ludi o nani mi ñima yene, O pinpinjoa mo cua ki ñani o ku yoagisiigu.

²¹ Puoli faalu taa o ki ban caa, Ki dadi ki ñani o leni u paalu wan bi ye naankani.

²² Bi toani o i piemi kaa gba o ninñima Se wan sane ki nan baa ki cia.

²³ Bi puogi ti nupodi kelima wan laa yaa yema po, Ki laa ki kiidi o wan ye naankani kuli.»