Jan n diani U Tienu Laabaaliŋamo maama 18 - U TIENU MAAMA TILI 2013

Bi cuo Jesu

¹ Jesu n den maadi laa maama, wani leni o ŋoadikaaba den ñani ki duodi Sediron fuanu. Salidinga den ye likani. Jesu leni o ŋoadikaaba den kua lienni.

² Juda yua n den baa janbi o den bani li kaanu, kelima Jesu den maani ki caa lipo leni o ŋoadikaaba.

³ Juda den baa bi toatieba cagili yenli leni U Tienu diegu jiidikaaba, bi kopadicianba yudanba leni Farisieninba n soani yaaba. O den gedini ba likani, ke bi kubi mu fidisanmu leni i mukaani leni ti toatiadi.

⁴ Jesu den bani yaala n baa tieni o kuli, ke o caadi ki yedi ba: «Yi lingi ŋme?»

⁵ Bi den guani ki yedi o: «Jesu, Nasareti yua.» O den yedi ba: «Mini n na!» Juda yua n den janbi o, den se leni ba.

⁶ Jesu n den yedi ba: «Mini nna!» Bi den guani puoli ki baa yanyinli.

⁷ Lanwani, o go den buali ba: «Yi lingi ŋme?» Bi go den yedi o: «Jesu, Nasareti yua.»

⁸ Jesu den guani ki yedi ba: «N waani yi ke li tie mine. Li yaa tie ke yi lingi mine, cedi mani bine wani n gedi.»

⁹ O den yedi yeni ke wan den kpa maadi yaa maama n tieni. Laa maama nne: «Ŋan puni nni yaaba siiga, mii biani ba yendo.»

¹⁰ Simon Pieli den kubi ki jugisiega. O den noadi ga, ki pua bi kopadicianba bado naacemo, ki pedi ki joandi o jientubili. O naacemo yeni den yi Malikusi.

¹¹ Jesu den yedi Pieli: «Ŋuuni a jugisiega. Naani n kan ño Baa n puni nni yaa fala tadiñokaaga nni?»

Bi gedini Jesu Hana kani

¹² Bi toatieba cagili, bi yudaano leni Jufinba n den soani bi jiidikaaba yaaba yeni, den cuo Jesu ki loli o.

¹³ Bi den kpa gedini o Hana kani, kelima wani Hana den tie Kayifa cuado. Kayifa n den tie bi kopadicianba bado laa binli.

¹⁴ Wani Kayifa den tie yua n den waani Jufinba, ke li baa ŋani niyendo n kpe bi buolu po.

Pieli nia ke waa bani Jesu

¹⁵ Simon Pieli leni ŋoadikatoa den ŋua Jesu. Bi kopadicianba bado den bani laa ŋoadika. Lani yaa po, o den baa ki yegi leni Jesu, ki kua bi kopadicianba bado luolu nni.

¹⁶ Ama Pieli den se niinpo, bu buliñoajabu kani. Jesu ŋoadika, bi kopadicianba bado n bani yua yeni, den lebidi ki maadi leni yaa jafaano n guu bu buliñoajabu, ki teni ke Pieli kua.

¹⁷ Laa puotuado, bu buliñoajabu guudo yeni, den yedi Pieli: «Amoko tie laa nilo ŋoadikaaba siiga yua, bi yeni ka?» Pieli den yedi o: «Aa-a, mii tie o.»

¹⁸ Li den sua ke ti wadi ye, ke bi naacenba leni bi jiidikaaba yeni cuoni u mu, ki yie. Pieli moko den ye leni ba ki yie.

Bi kopadicianba bado buali Jesu o maama fuuli

¹⁹ Bi kopadicianba bado den buali Jesu o ŋoadikaaba maama leni o bangima maama fuuli.

²⁰ Jesu den guani ki yedi o: «N den maadi asala nni ke bi niba kuli gba. Yogunu kuli n maadi li bali maama bangima diena nni leni U Tienu diegu nni kuli, Jufinba kuli n yen taagi naankani. Mii den wuoni ki maadi liba kuli.

²¹ Be yaa po ke a buali nni i buali? Buali yaaba n den cengi min maadi ba yaa maama. Bani, bi bani min den yedi yaala.»

²² Wan den maadi yeni, bi jiidikaaba siiga yendo yua n den se ki kuu likani, den pabi o ki yedi: «Naani a baa guani bi kopadicianba bado yeni yo?»

²³ Jesu den guani ki yedi o: «N yaa maadi ki tudi, waani n tudima. Ama n yaa maadi ke li tiegi, be yaa po ke a pua nni?»

²⁴ Lani, Hana den loli o, ki soani o bi kopadicianba bado Kayifa po.

Pieli go nia ke waa bani Jesu

²⁵ Li sua ke Simon Pieli ye likani ki yie u mu. Lani, bi den yedi o: «Amoko tie o ŋoadikaaba siiga yua, bi yeni ka?» O den nia ki yedi: «Aa-a, mii tie o.»

²⁶ Bi kopadicianba bado naacemo yendo, Pieli n den pedi ki joandi yua yaa tubili yeni yaa kpiilo moko den yedi o: «Mii bi laa ŋa ke a ye leni o salidinga nni?»

²⁷ Pieli go den nia. Lanyogunu ku kootongu den mua.

Bi gedini Jesu Pilati bujiali kani

²⁸ Bi den ñani Jesu Kayifa kani, ki gedini o guveneeri Pilati bujiali kani. Li den tie ku tiŋaapanpangu. Bani bi ba naa den kua guveneeri bujiali kani, ke ban da ti joagini bi yula, ki fidi ki baa ki je mi Pendima jaanjiema.

²⁹ Lani yaa po, Pilati den ñani ki gedi bi kani ki yedi: «Yi yedi ke o naa nilo tieni be?»

³⁰ Bi den guani ki yedi o: «O naa nilo yàá tieni yaala n bia, ti kan bi cuo o ki cuani a kani.»

³¹ Lani, Pilati den yedi ba: «Yinba yi ba, yin taa o ki ŋoadi yi bali maama, ki jia leni o buudi.» Jufinba den yedi o: «Tii pia sanu ki jia nilo buudi, ki kpa o.»

³² Li den tieni yeni ke Jesu n den maadi yaa maama, ke mi doagidi wan baa kpe maama n tieni.

³³ Pilati den guani ki kua o bujiali kani, ki yini Jesu ki yedi o: «A tie Jufinba bado bi?»

³⁴ Jesu den guani ki buali o: «Naani a maadi yeni a yuli po, bi nitoaba n waani a n maama?»

³⁵ Pilati den guani ki yedi o: «Naani nmo tie Jufi yo? A buolu leni bi kopadicianba yudanba n cuo ŋa, ki cuani a n kani. A tieni be?»

³⁶ Jesu den guani ki yedi o: «N diema naa tie ŋanduna na yaama ka. N diema yaa bi tie ŋanduna na yaama, n naacenba bi baa koani ki gaa nni, ke ban da teni nni Jufinba. Ama n diema ki tie ŋanduna yaama.»

³⁷ Laa maama po, Pilati den yedi o: «Lanwani, a tie bado yo?» Jesu den guani ki yedi: «Fini n yedi la, n tie bado. Min den cua ŋanduna nni ke bi mali nni, li den tie ke min yaa tiendi siedi i moamoani po. Yua n tie i moamoani yua kuli baa cengi min yedi yaala.»

³⁸ Pilati den yedi o: «Be n tie i moamoani?» Pilati n den yedi yeni, o den guani ki ñani ki gedi Jufinba kani, ki yedi ba: «Mii laa wan tieni yaala ke li baa pundi min cuo o.

Pilati jia ki kadi ke ban kpa Jesu

³⁹ Ama yi pia li bogidili ke min faabi kpaadiyenli, ki teni yi mi Pendima jaanma yogunu. Yi bua min faabi yi po Jufinba bado ne bi?»

⁴⁰ Bi den tiani: «Aa-a, wani ka, faabi ti po Barabasi!» Barabasi yeni den tie sanjiale.