Jeremi 50 - U TIENU MAAMA TILI 2013

Babilonni diema baa, ke Isidayeli mo faabi

¹ O Diedo den teni ke o saawalipualo Jeremi maadi yaa maama n ye ne, Kalide yaaba leni bi diema Babilonni po:

² «Pa mani li laabaalo i nibuoli siiga. Moandi mani ban gbadi la. Caani mani li jakoandicabili, Ki teni ban gbadi li maama, Ki da wuoni mani la. Waani mani ke bi cuo Babilonni, Ke o bulo Beli laa i fe boncianla, Ke o bulo Melodaki mo jie ki luodi! Wan tagi yaa nannana fiagi, Ke o buli mo jie ki luodi!

³ U nibuolu ñani nujienu po, Ki fii ki sedi Babilonni po, Ki teni ke o diema kpandi diegbengu, Niloba kuli kan go yaa ye mi niinni. Bi niba leni ti yandi kuli baa bodi.

⁴ Laa dana nni, o Diedo yedi Ke Isidayeli leni Juda yaaba Baa taani ki yegi ki lebidi ki guani. Bi baa yaa cuoni ki mua ki lingi O Diedo bi Tienu.

⁵ Bi baa buali Siyon sanu po. Bi baa pegidi ki teli lanpo. Bi baa cua ki fini o Diedo bonŋanla, Ki kuani leni o yaa ŋantaado n ki pia fidima, Ki kan gbeni mo hali abada!

⁶ N niba den tie yaa yankulu n yaadi. Bi yankpaaba den biani ba, Ki teni ke bi puagi a juana nni. Bi yen ña li naa juali ki ban puodi line, Ki den sundi bi yanloli po.

⁷ Yaaba n den kadi leni ba kuli yen ŋmani ba. Bi yibalinba yen tua: ‹Tii pia tagiliba, Kelima bi tieni ti tuonbiadi O Diedo mi teginma daano po, Wani, bi baanba n den dugi yua yaa po.›

⁸ ‹Sani mani ki ña Babilonni, Ña mani bani Kalide yaaba diema nni. Yaa tie mani nani yaa ŋuabuana N yen ye ti yanbidi liiga yeni.

⁹ N baa teni i nibuoli n fii nujienu diema po, Ki koani leni Babilonni diema ki diedi ma. Bi piemi tie nani yaa jakoando Yaa nuu n nua ki kan guani fanma.

¹⁰ Bi baa gedi ki fagi Kalide diema. Yaaba n baa gedi ki fagi ma kuli baa guo.› » O Diedo n yedi yeni.

¹¹ Mangi mani yi pala, mangi mani yi pala Yinba yaaba n pua mi diema nufanu yeni! Yugi ki cii mani nani yaa naasalo yaa gbanu n saagi, Yigini mani nani yaa taami n pia u paalu yeni.

¹² Yi naa ye leni i feciami. I fe cuo yua mali yi. Diidi mani i nibuoli kuli siiga, O yaa buolu n tie yuu n juodi. Likani tie fanpienma, Tinkuonga leni paboanli kaanu.

¹³ O Diedo pabienli po, Nilo kan go yaa ye Babilonni nni. Babilonni kpandi paboanli kaanu. Yua n poandi likani kuli, li baa lidini o, Ki go yagi o yama wan fuoni, Kelima lan gundi maama po.

¹⁴ Bogini mani ki sedi bu toabu po, Yinba yaaba n gaani ki lindi Babilonni. Yinba yaaba n kpali yi dabana, toa o mani. Yin da sieni ba penyendu, Kelima o tudi o Diedo po.

¹⁵ Fii mani o po leni bu toabu kuudi, Ki kuudi mani i kaani kuli. O tuo o tadingu. O tanpuuna kuli wudi ki baa, O bilini mo kuli wudi ki gbeni, Kelima li tie o Diedo pantuuli yo. Tuu o mani yi panli. Tieni o mani nani wan tieni toaba maama yeni!

¹⁶ Yaaba n buu ti jaadi Leni yaaba n pia ti moaciedi U jetaagu yogunu kuli, N ña Babilonni nni. Bu toabu biadima nni, Yuakuli n pegidi ki noanli o buolu. Yuakuli n sani ki teli o diema nni.

¹⁷ Isidayeli tie nani i yangbanli n deli Yaa pia ke o bodi yeni. Asiiri bado n kpa dini o. Nebukanesa Babilonni bado mo juodi ki mudi o kpaba.

¹⁸ Lani n teni ke Li Miali Diedo U Paaciamu Kuli Daano, Isidayeli Tienu yedi: «N baa fii ki sedi Babilonni bado leni o diema kuli po, nani min den fii ki sedi Asiiri bado po maama yeni.

¹⁹ N baa teni Isidayeli n lebidi Ki guani o yankpaakaanu. N baa yaa kpaa o Karimeli leni Basan po. O baa je ki guo Efrayimi leni Galaadi juana po.»

²⁰ Laa dana nni, o Diedo yedi: «Bi baa lingi Isidayeli tagili, Ama bi kan go le yi. Juda tuonbiadi mo, bi kan le ti, Kelima min sieni yaaba, N baa tieni bi po sugili.

²¹ Fii ki sedi Meratayim diema Leni Pokodi yaaba po! Bolini o puoliŋuani kuli, Ki pa nni yaaba n sieni. O Diedo n yedi yeni. Soani min puogi a yaala kuli.

²² Ti gba bu toabu fuugu mi diema nni. Li tie paboancianle.

²³ Li gaa lede ke Babilonni yua n bi tie Li ŋandunli kuli tuatuaga mudi, Ki cabidi cabidi? Li gaa lede ke Babilonni pua nufanu Cain i nibuoli kuli siiga!

²⁴ Babilonni, n dia ŋa ku diagu, Ku cuo ŋa ke ŋaa bani, Kelima a den fii ki koani leni o Diedo.»

²⁵ O Diedo fii leni o jatiadi, Ki taa o pabienli jatiadi, Kelima Kalide yaaba diema nni, Li Miali Diedo U Paaciamu Kuli Daano, Baa soani o tuonli.

²⁶ Ña mani hali i tinbiani ki cua o kani. Luodi mani o buabuana, Ki ñani yaala n ye lienni ki dogini, Ki pa la o Diedo, Liba kuli n da sieni.

²⁷ Kpa mani o naatona kuli, Gedini ba mani u yankodikaanu kani. Fala baa ba kelima bi yogunu pundi, Bi buudi daali pundi.

²⁸ Li tie yaaba n tiini ki ña Babilonni po yaa kuudi yo, Ki wangi Siyon dogu nni Ke o Diedo ti Tienu tuu o panli. O tuu li panli o diegu po.

²⁹ Yini mani a dabantuada Leni yaaba n bani li dabanli kuli, Ban cua ki baa Babilonni. Gaani ki lindi mani u dogu, Niloba kuli n da sani ki cia. Pa o mani o tuona panpaani. Guani o mani wan tieni yaala kuli, Kelima o tieni mi kafaama o Diedo, Isidayeli Tienu yua n Gagidi ki ŋani po.

³⁰ Lani n teni ke o toatiejawaaba baa kpe mu daamu nni, O jakoanda mo kuli baa bodi. O Diedo n yedi yeni.

³¹ Diidi: n pali beni a po, Fini o kafaadaano yeni! Li Miali Diedo U Paaciamu Kuli Daano n yedi Ke a fala daali yeni pundi.

³² O kafaadaano tuudi ki baa, Ke oba mo ki ye yua n baa fiini o. N baa juu o dogi u mu, Wun je yaala n gaani ki lindi yi.

³³ Li Miali Diedo U Paaciamu Kuli Daano N yedi yaala nne: «Bi mabini Isidayeli leni Juda yaaba. Yaaba n gedini ba ti yonbidi kubi ba leni u paalu, Ki yie ke bi kan ŋaa ba.

³⁴ Ama bi todika pia u paalu, Wani yua n yi Li Miali Diedo U Paaciamu Kuli Daano yeni. O baa koani ki gaa ba, U dogu n baa mi yanduanma, Ama o nan baa coagi Babilonni yaaba wani.

U Tienu jagili Babilonni po

³⁵ Bu toabu, baa Kalide yaaba! Mini o Diedo n yedi yeni. Fii ki sedi Babilonni yaaba po, O koanbala leni o yanfuodanba kuli po.

³⁶ Bu toabu, fii ki sedi o baabuula po, Bi tie gaada yo! Bu toabu, fii ki sedi bi jakoandimoanba po, Ki teni i jeje n cuo ba!

³⁷ Bu toabu, fii ki sedi o taami leni o teliti po! Fii ki sedi yaa nibuoli n taani Ki ye u dogu tugu nni kuli po. Teni ban kpandi ki tua puoba. Bu toabu, fii ki sedi bi ŋalimano po, Ki teni ban fagi likuli!

³⁸ U tayialu, baa o ñinsani! Mi ñima yeni kuli n ñuudi cain! Mi diema kuli gbie leni i buli Yii n lebidi bi yula.

³⁹ Ŋan teni mu cicibiadimu n yaa ye leni ba, Ti tataadi n yaa ye bi diema nni, Man tua nilo n kaa ye naani, Hali nifiima n tuu nifiima.

⁴⁰ N baa soani yi nani min den soani Sodomi, Gomori leni yaa dogi N gaani ki lindi yi maama yeni. Mini o Diedo n yedi yeni. Oba kan kali likani, Niloba kuli kan kali lienni.

⁴¹ U nibuolu ñani nujienu po. Nibuociamu leni yaa badiba n yabi N fii hali i tinbiani po.

⁴² Bi kpali li dabanli, ki yugidi li kpaanli. Bi pia ku tugumoangu, kaa gba ninñima. Bi niali dune nani mi ñincianma yeni. Bi jagi i taami po ki caligi Nani niyendo yeni bu toabu po, Ki baa koani leni fini Babilonni.

⁴³ Babilonni bado gaa laabaali ke o jigi cie. Li paboanli cuo o. Li koani o nani u maditugukoanu n pia yaa pua yeni.»

⁴⁴ O Diedo yedi: «Nani yaa yangbanlo n ñani Jurden fuali nni, Ki kua u yankulu nni ki digi ba yeni, N baa digi Babilonni yaaba yenma, Ban sani ki ŋaa bi tinga. N baa cuani bi kani bi jakoandijawaaba. Ŋme n naani leni nni? Ŋme n baa waani nni min baa yaa tiendi yaala? O laa gobidika mo n baa tuo ki niagi leni nni?

⁴⁵ Lanwani, cengi mani o Diedo n taa Yaa bali maama Babilonni po, Leni wan pia yaa jaga Kalide yaaba po: Laa pia kuli tama, Bi baa yaa dia ba nani ti yanbidi bila yeni. Laa pia kuli tama, Bi baa pua ban ye naani nufanu, Kelima bi po.

⁴⁶ Laabaali n ñani ke bi fie Babilonni, Ki tinga kuli digibi. I nibuoli bubula fii ki loli.»