Jeremi 16 - U TIENU MAAMA TILI 2013

Jeremi yienbaadi

¹ O Diedo den maadi nni yaa maama n tie ne:

² «Ŋan da taa pua, ki maa bonjala bi bonpola nekanba,

³ kelima o Diedo maadi yaa bonjala leni yaa bonpola n baa maa nekanba kuli po, bi baanba leni bi naanba yaaba n mali ba mi naa diema nni kuli po, ki yedi:

⁴ ‹Bi baa yiage ki kpe. Bi kan baa kuŋanbili. Bi kan baa ban bogidi ba. Bi baa kpandi ki tua bugidi u tingbanu po. Bu toabu leni mi koma baa dudi ba. Bi gbanandi baa tua jiema, tanpoli nuani leni ti yandi kuli po.› »

⁵ O Diedo yedi nanda: «Da kua kuuma n kpe yaa diegu nni, da gedi kudiegu, ki da mua bi po ŋain mo, kelima n ñani n yanduanma leni n ninñingbadima laa niba siiga.

⁶ Li nikpela leni li bila kuli baa kpe mi naa diema nni. Bi kan baa piinma, bi kan baa ban lu bi kudiegu, oba kan kuo o yuli bi po, ki buali ban badi i be bi po.

⁷ Oba kan cua ki taani ki je leni yaaba n ye leni mi kuuma paboanli, ki baagi ba. Oba kuli kan padi i baagi padili yua yaa baa bi yua yaa naa n kpe po.

⁸ Ŋan da kua yaa diegu nni n pia u badu, ki kali leni ba ki je ki go ño,

⁹ Kelima Li Miali Diedo U Paaciamu Kuli Daano, Isidayeli Tienu yedi: ‹Mini! N baa teni li pamankandikaali yani, toginaa leni togibaa yani leni i yigimi kuli n gbeni. Laa bonla kuli baa tieni yi nunbu nni, ke yi da pia yi miana.›

¹⁰ A yaa ti waani mi naa maama kuli ke bi yedi a: ‹Be yaa po yo ke o Diedo maadi ti mi naa yebiadimoanma maama? Ti tagili n tie ile? Ti tieni o Diedo ti Tienu po be yaa tuonbiade?›

¹¹ Lanwani, ŋan guani ba daa: ‹Li tie ke yi baanba ŋaa nne. Mini o Diedo n yedi yeni. Yi tiini ki ŋua tientoe, ki baa yaa kpiagidi yi, ki gbaandi yi, ki go pugi yi. Ama mini wani, bi ŋaa nni, baa go kubi n bali maama.

¹² Yimo go tieni mi biadima ki cie yi baanba. Diidi yi siiga nni yuakuli ŋua o pajagindi tundiyuogidi ki naa cengi nni.

¹³ N baa ñani yi mi naa diema nni, ki lu yi, yinba leni yi baanba kuli n ki bani yaa diema nni. Lankani, li yensiinu leni li ñiagu kuli, yi baa yaa kpiagidi tientoe, kelima n kan gbadi yi po ninñima.› »

I yonbi baa kpeni

¹⁴ Lani n teni ke o Diedo yedi: «Diidi a dana kpendi ke bi kan go yedi: ‹O Diedo fo, wani yua n teni ke Isidayeli yaaba ñani Ejipiti.›

¹⁵ Ama bi baa yedi: ‹O Diedo fo, wani yua n ñani Isidayeli yaaba, nujienu po diema leni wan den yadi ba yaa diema nni kuli.› N baa guani ki cuani ba, min den puni bi baanba yaa diema nni yeni.»

Bi baa cuo i tagili danba kuli

¹⁶ O Diedo yedi: «Mini nne, n baa soani bi jankpaanba boncianla, ban cua ki kpaani ba. Li yaa puoli, n baa soani a fuagoada boncianla, ban cua ki deli ba a joaciama, a joabila leni ti tanlondi nni kuli,

¹⁷ Kelima n nuni diidi ban tiendi yaala kuli. Bi tuona naa duagi n nuni po, n nua bi tagili kuli mo.

¹⁸ N baa pa ba bi tuonbiadi panpaani taalimilie bi tagili leni bi tuonbiadi po, kelima bi joagini n diema leni bi tuongunda leni bi cancaginbuli yii n ki fo yeni.»

Yuakuli n bandi i moamoani Tienu

¹⁹ O Diedo n tie n gbanmanu, n wuonkaanu, Li pabiidili daali min baa sani ki deni yua. I nibuoli baa ña u tinbianu ki cua ki yedi: «Ti baanba den dini yaa faali n tie faama bebe, Yaa faama n ki pia mayuli

²⁰ Naani o nilo baa fidi ki tagi o yuli po i tieni? Laa tieni kuli ki tie bonmoanla!»

²¹ O Diedo yedi: «Sanu ne wani, N baa teni ban bandi n fidu leni n paalu. Yeni bi baa bandi ke n mini n tie o Diedo.»