Jeremi 1 - U TIENU MAAMA TILI 2013

Jeremi yiinu leni o saawalo Juda diema yaaba po 1.1—25.14

¹ Yaa maama n ye ne tie Jeremi, Hilikiya Anatoti kopadicianba siiga yendo yaame. Jeremi tie Benjamen diema yua yo.

² Juda bado Josiasi, Anmoni bijua bali piiga n bintaali yo, ke o Diedo den maadi leni o.

³ O go den maadi leni o, Josiasi bijua Joakimi n den kaa Juda diema gbandi po yaa yogunu. Josiasi bijua Sedesiasi bali yogunu moko, o den maadi leni Jeremi, ki ban pundi hali o bali piiga n binyenli cimuu, ban den gedini Jerusalemi yaaba ti yonbidi yaa yogunu.

U Tienu yini Jeremi

⁴ O Diedo den maadi leni nni mi naa maama:

⁵ «Hali ke n daa den tagi a a naa tugu nni, n den tuodi ki bani a. Hali ke a daa den ñani a naa tugu nni, n den gandi a ki gagidi ki ŋanbi a, ki teni ke a tua i nibuoli kuli saawalipualo.»

⁶ N den yedi: «Ŋain o Diedo U Tienu, mii bani maama, Kelima n da tie bonwaaga.»

⁷ Lani, o Diedo den yedi nni: «Da yedi ke a tie bonwaaga, Kelima min baa soani a yaaba yaa po kuli, A baa gedi. N yaa yedi ŋan ban yedi yaala kuli mo, A baa n yedi lane.

⁸ Da jie ba, kelima n ye leni a Ki baa faabi a. Mini o Diedo n yedi yeni.»

⁹ Lan yuandi, o Diedo den tandi o nuu Ki sii n ñoabu ki yedi: «Diidi, n kuani n maama a ñoabu nni.

¹⁰ Dinla, n kaani a mi diema nni leni i nibuoli kani, Ke ŋan ŋabi ba, ki tudi ki lu, ki fidi, ki mudi, Ki bolini, ki maa, ki go ŋuu.»

¹¹ Lanwani, o Diedo den buali nni: «A nua be yo Jeremi?» N den yedi: «N nua yaa tibu n yen jaligi ki puudi yaa benu.»

¹² O Diedo den yedi nni: «A laa bonŋanla! Yeni, mini moko baa tuodi ki tieni n maama n yedi yaala.»

¹³ O Diedo go den maadi leni nni miliema, Ki yedi: «A nua be yo?» N den guani o: «N nua li bobili ke li pu loabiloabi, ki goa nujienu po.»

¹⁴ Lanwani, o Diedo den yedi nni: «Nujienu po yo ke mi yebiadima Baa cili yaaba n ye mi diema nni kuli po.

¹⁵ N baa yini mi diema yaaba, Yaaba n goa nujienu po kuli. Bikuli baa cua ki kali bi bali kalikaani po, Jerusalemi dogu buliñoabu kani, Ki gaani ki lindi i naa bilini Yii n ye Juda dogi nintuali kuli. O Diedo n yedi yeni.

¹⁶ N baa jia laa buudi leni ba Kelima bi biadima po. Bi ŋaa nni ki juu a dugibila tientoe po, Ki gbaani ki pugi bi nii n tagi yaala.

¹⁷ Fini mo, fii ki ñagini a ciaga ku gbanñagidigu, Ki gedi ki ban yedi min baa puogi a yaala kuli. Ŋan da digibi bi nintuali, Lani yaa ka, mini n baa teni ŋan digibi bi nintuali.

¹⁸ Dinla n puni a u paalu nani u kaanpaalu yeni. A baa tua kudasaali leni ti kumoandi bilinu, Ki yie Juda badiba po, bi koanbala po, Bi kopadicianba po, ki taani leni mi diema yaaba kuli po.

¹⁹ Bi baa fii ki sedi a po, Ama bi kan fidi ki paadi a, Kelima n ye leni a ki baa faabi a. Mini o Diedo n yedi yeni.»