I Yani 7 - U TIENU MAAMA TILI 2013

¹ Guani ne Sulami yua! Guani ne, Lebidi ki guani ne, Ke tin fidi ki ñuadi a! Be yaa po ke yi ŋua ki diidi Sulami yua nanda, Nani cajelicagalie ciaga yeni?

O jawaalo

² O badisalo, A taana ŋani leni a cacaadi! A ciaga bugima tie nani O tuonsoanbando n ŋanbi yaa laani yeni.

³ A ŋulibu tie yaa tadibuoga nni N ki luodi duventiidi daama, Yaama yaa nuulu n mani. A tugu mo tie nani ŋalikama kogili, Yaa puuma n pia u nuulumanu N koali ki gaani yaali yeni.

⁴ A biilieda ŋani nani piabilalie Yaaba n tie pola yeni.

⁵ A tulu nani ban tieni yaa diefoagili Leni a luonñina yeni. A nuni mo naani leni Hesibon ñinbuudi, Yaadi n kuu li nitaanli buliñoabu kani. A miani se nani Liban diefoagili, Yaali n tiegi Damasi dogu yeni.

⁶ A yuli ŋani nani Karimeli juali yeni, A yudi moani ki ñuliti, Ki dia o bado yama.

⁷ N buado, a ŋani boncianla, A buama mo mani boncianla, Fini n tie n pamanli.

⁸ A bugima tie nani bu kpakpalibu yeni, A biina mo tie nani a kpakpala yeni.

⁹ N yedi: «N baa do bu kpakpalibu N baa ñani li bonluonkaala.» A biina tie n po nani duventiidi Bonluonkaala yeni, A fuoma nu tulale, Ki tie nani yaa bonluonkaala n mani yeni.

¹⁰ A ñoabu nni tie nani yaa daama N mani ki cie, Ban bili yaama n buado po, Ke mi tagidi yaaba n goa ñoacuuna po.

O jafaano

¹¹ N buado n die nni, O yama kua n niinni.

Yaa pamanli n ye o buado po

¹² N buado, cua ne, Tin ña ki kua i kuani nni, Ki ban yaa dua ki ye li dobila nni.

¹³ Li yaa yendi ti baa gedi duventiidi nni, Ki le i yaa tieni a ŋuada bonŋanla. Ke i puuma mo yaa cili ki yigidi, Ki go bandi grenadi mo yaa tiidi yaa puudi. Lankane n baa waani a n buama.

¹⁴ Mandiragori tiidi puuma nuulumanu yadi. Ti pia yaa bonluonkaala n mani, Buoli kuli ke laa foagi leni ti. Li bonpanla n tuu li bonkpela. N buado, n sieni likuli fine.