I Yani 6 - U TIENU MAAMA TILI 2013

¹ Fini yaa pua n ŋani ki cie bi puoba kuli, A buado gedi le yo? A buado yeni taana cubini le yo, Tin taani ki todi a, ŋan lingi o?

O jafaano

² N buado kua o salidingo nni, Yaa tibidi n pia u nuulumanu n ye naankani, Ki baa yaa kpaa o yangoli lienni, Ki go ñani mi puuma.

³ N buado n die nni, mini mo n die n buado. O kpaa o yangoli mi puuma nni.

Li boomuuli 6.4—8.4 O jafaano yeni n tie maama O jawaalo

⁴ N buado, a ŋani nani u doŋamu Tirsa yeni, Ki pia mi ñuadima nani Jerusalemi dogu yeni. Ama ki nan pia ti jañoangidi nani a toagola yeni.

⁵ Maadi n po a nuni ki nuali poto, Kelima a nuni yeni yagini n yama. A yudi jiidi nani yaa ŋuagoli N tiini ki ji Galaadi juali yeni.

⁶ A ñina mo tie kop nani yaa pe N ña u yanñunkaanu yeni. Bikuli tie pola, Oba kuli ki luo lielo bi siiga.

⁷ A kpiani mo naani leni grenadi bonluonkaala yeni, A cabilibinkaali nni.

⁸ Bi badipuoba tie piiluoba, Puotoaba mo piinii, Leni bi jafanba yaaba n ki pia coali.

⁹ Ama n kpaajebuadiga wani ye ki bebe, Ki naa pia kuli poadi, Kaa pia lie ki naa tugu nni. Bi jafanba yaa laa ka, Bi tua ke li pamanli ye leni ka. Bi badipuoba leni yaa puoba N sieni mo tua ka yeni, ki dondi ka.

¹⁰ Ŋme n naani leni ku tiŋaagu yenmoanli, Ki ŋani nani o ŋmaalo, Ki tuodi nani u yienu, Ki nan pia ti jañoangidi nani a toagola yeni?

¹¹ N gedi n salidingo po, Ki baa le li bonbulikaala yaa pudi Ku joaloangu nni, Ki baa le duven tiidi yaa bundi, Ke grenadi tiidi mo puudi.

¹² Mii go bani min tie yua. O teni ke n ŋmini suo Ba ke n tie bulicinbiga.