I Yani 5 - U TIENU MAAMA TILI 2013

¹ N naataanpuoga, n buado, N kua n salidingo nni, Ki ñani mili leni yaa muadi Yaa tibidi n mani. N ŋmani n siabiabigu leni ku siadi, Ki ñuni n daama leni n naaŋanma. «N danlinba, je mani ki go ño mani, Ki teni mi buama n gaadi yi, Nani mi daama yeni!»

O danlinba Li boonaali 5.2—6.3 O luodi bu buliñoabu, ke u yogunu pendi O jafaano

² N den goa, ama n pali ki den goa. Li tie n buado yaa nialu n maadi ki yedi: «Luodi n po n buado, n naataanpuoga, N kpaajebuadiga, poadi n ki ye yua yaa kani, Kelima n yuli kuli tie mangu, N yudi mo kuli moagidi ki soangi.»

O jawaalo O jafaano

³ N landi n liadili. N baa guani ki laa li lede? N nigidi n taana. N baa gaa lede ki go joagini a?

⁴ N buado kuani o nuu li bonli kani, Ki teni ke n gbanu jeli kelima o po.

⁵ N den fii ke n baa luodi n buado po, Ke mili kpama den wuli n nii po, Ki den mili mili ku dieluodigu mubinkaanu.

⁶ Min luodi n buado po yaa yogunu, Sua ke o lebidi ki gedi no. O den teni ke n naano ñani. N lingi o, ama mii laa o, N yini yini o, ama waa tuo.

⁷ Yaaba n guu u dogu n den gaandi, Ki ban tuogi nni, Bi den pua ki poagili nni. Yaaba n jagi i bilini po ki guu u dogu, Den fie n cencenmaadiga.

⁸ Yinba Jerusalemi jafanba, n mia yi, Yi yaa ban laa n buado yeni daa, Yi baa yedi o be? Yedi o mani ke n yia mi buama yianu yo.

Bi jafanba

⁹ Fini yaa pua n ŋani ki cie bi puoba kuli yeni, A buado yeni pia be ki cie o lieba? Wani a buado yeni li pia be ke o lieba ki pia, Ke a li ŋua ki miadi ti laa miabu?

O jafaano

¹⁰ N buado yeni pia gbananbiŋanli, Ba niba tuda piiga (10 000) siiga, Bi kan tudi o.

¹¹ O yuli tie wulamoano cain, O yudi mo fili ki juani ki lengidi, Ki boani nani li kankali yeni.

¹² O nuni naani leni yaa kpaajiemu N ye u ñinsanu kani yeni, Ki dugi mi naaŋanma nni, Ki ye mi yemanma kaanu.

¹³ O kpiani tie nani ban ŋuu Yaa tincanli nni yaa tibidi N pia u nuulumanu yeni. O ñoacuuna mo naani leni mi puuma Mili kpama n ña yaa puuma nni ki tagidi.

¹⁴ O buadi tie nani wulabiana yeni, Ban tuu tuu ya yaa po leni yaa tana n yi kilisoliti. O gbananbili mo tie nani ban kpilini yaa luonñinli, Ki boali li leni yaa tana n pelini yeni.

¹⁵ O taana tie tanpiena yaa bunbuna, Ya n se wulamoano tangu yuli po. O naani leni Liban sediri tiidi.

¹⁶ O maama dingi, O gbanandi kuli mo pia mi ñuadima. Yinba Jerusalemi Jafanba N buado n tie maama n yeni. N ŋamo yeni, tie yene.