I Yani 4 - U TIENU MAAMA TILI 20131 A li ŋane, n buado, a ŋani bonŋanla! A nuni nani mu kpaajiemu yeni, A cabilibinkaali nni. A yudi mo nani yaa ŋuagoli N tiini ki jii Galaadi juali yeni. 2 A ñina tie kop nani ban moagidi yaa pegoli kobidi Ke bi ña u yanñunkaanu yeni. Bikuli tie pola Oba kuli ki luo lielo bi siiga. 3 A ñoacuuna tie nani u gaalimoanu yeni, A ñoabu mo pia li yankuali. A kpiani ŋani nani grenadi bonluonkaala yeni, A cabilibinkaali nni. 4 A tulu nani Davidi diefoagili, Ban den maa yaali ke li tie diecencenli, Ke gbankoanditi tudili juani li po, Ki tie jakoanda yaa gbankoanditi. 5 A biina ŋani nani piabilalie Yaaba n tie pola, Ki kpaa mi puuma nni yeni. 6 Hali ke ku yenjuagu fawaakuugima daa baa, Ke i soangi mo daa sani, N baa gedi mili po Leni a dugibila juana po. 7 N buado, a ŋani bonŋanla, Poadi kuli ki ye a niinni. 8 Cua ki yegi leni nni n toginaa. Cua ki yegi leni nni ki ña Liban juana po. Jiidi Amana leni Hermon juana yula po, Ki sani ki ña laa yangbanfali nni, I naamunpieni juana yeni niinni. 9 N buado, n naataanpuoga, a mangi n pali. A nunnualima bebe mangi n pali. A tulu nni laani siiga, Ba lanyendu bebe teni ke n pali mangi. 10 N buado, n naataanpuoga, Diidi a buama n mani maama! A buama mani ki cie mi daama. A tulale nuulu mo mani ki cie Yaa tibidi n pia u nuulumanu buoli kuli! 11 N toginaa, ti siadi bundi a ñoacuuna po. Ti siadi leni mi naaŋanma n ye a lanbu tiipo. A tiayiekaadi nuulu mo mani Nani Liban tiidi daadi yaa nuulu yeni. 12 N naataanpuoga, n buado, A tie nani yaa salidingo n lo Ki tie nani yaa ñinbunli n lo yeni. 13 A ñinsani n kpidi grenadi tikuanu. Yin luoni yaa bonluonkaala n mani boncianla, Ŋaliñini leni naari n pudi naankani. 14 Naari, Safilani, yaa tibidi n pia u nuulumanu Leni a dugibila tiidi buoli kuli, Mili leni alowesi Leni yaa sinma n pia u nuulu n manu Ki cie kuli pudi lienni. 15 Salidinga yeni pia li ñinbunli. Li tie yaa ñinbunli n kan ñuudi, Ki tagidi ki puubi Liban juana po. O jafaano 16 Fii, nujienu po faalu! Nuganu po faalu mo n cua ne! Figi mani n salidingo po, Ki teni o tibidi n fidi yaa nuulu n mani. N buado n kua o salidingo nni, Ki ŋmani o bonluonkaala yaala n mani. |
Gulmancema Protestant Bible © Bible Society of Burkina Faso, 2013.
Bible Society of Burkina Faso