Habakuki 2 - U TIENU MAAMA TILI 2013

¹ N baa do ki sedi bonŋanla Min guu yaa kaanu yeni kani. N baa yaa jagi u bilinciamu po, Ki guu o Diedo n baa puogi nni min yedi yaala Leni wan guani n miabu po yaala.

Yaa solindi n ye bi nibiadiba po 2.2-20 O Diedo maguankaama

² O Diedo den guani, Ki yedi nni yaa maama n tie ne: «Diani min baa doagidi a po yaala, Diani la mu walimu po maama Ke bi baa fidi ki cogi la faala.

³ N jagi ki bili li bonlekaala yeni N baa tieni yaa yogunu. Li yogunu kan pendi. Ba li yaa waagi, ŋan yaa guu. Yen de! Li baa cua ke laa pia kuli tama, Li yogunu kan mibidi.

⁴ Diani yaala n tie ne: ‹Yaa nilo n pia a yanjagibiada baa kpe. Ama o niteginka baa yaa ye ki fo kelima o dandanli po.› »

Fala baa baa yaaba n ki tiegi

⁵ Mi piama ki tie o nilo n baa fidi Ki dugi yaala yaa po. A piada pia mi niabonma, Nani bi tinkpiba diema yeni. Nani mi kuuma n ki guodi tinkpiba maama, Bani moko kan guo mi piama yene. Bi bua yogunu kuli ki pugini bi piama. Li tie lani yaa po yo ke bi koani Ki paadi i nibuoli boncianla ki diedi yi.

⁶ Laa nibuoli kuli baa cili ki yaa maadi Li mañuali leni mi makpanjama, ki tua: «Fala n baa yinba yaaba n su yi lieba ki dogindi mi piama. Fala n baa yinba yaaba n di a pana ki pugidi. Yi baa yaa tiendi laa bonla ki ban tuoni hali u laa yogune?

⁷ Yin pia yaaba yaa pana baa ti ludi Ki fii yenma ki cuo yi ki teni yin digibi. Bi baa fagi yi ki tuu li panli.

⁸ Yi fie bi niba boncianla piama ki kpabidi ba. Ama bi siiga yaaba n den sieni kaa kpe mo Baa fie yi yaa piama ki kpabidi yi. Li baa tua yeni kelima yi kpa bi niba boncianla, Ki tieni mi diema, mi dogi leni mi niba mi biadima.

⁹ Fala n baa yi! Yi fenli nitoaba piama Ki tendi yi diedi yaaba ke bi tua piada. Yi maa a diena yibali n kan fidi ki nandi yi naani, Ki bua fala n da nandi yi.

¹⁰ Laa jaga kuli baa cuani Yi diedi yaaba po i fe. Yin bolini bi niba boncianla yeni, Yi bolini yinba yi ba yaa miana yo.

¹¹ Yi bilini tana kpaani ki jaligidi yi, Ke a diena yoaga gaani.

¹² Fala n baa yi, Yinba yaaba n cili i dogi mi soama po, Ki maa yi leni ki mabinga.

¹³ Yin koani ki paadi yaa nibuoli Coagini bi yula fanma fanma, Yin maa yaala kuli baa buodi U mu nni. Li Miali Diedo U Paaciamu Kuli Daano n teni ke li tieni.

¹⁴ Ki tinga niba kuli baa bandi Li Miali Diedo U Paaciamu Kuli Daano kpiagidi, Nani mi ñincianma n gbie mi kaanu maama yeni.

¹⁵ Fala n baa yi, Yinba yaaba n ñundi yi kuantalieba ti loabidi Ki bua ban gaadi ki yiedi mubima, yin yaa nua bi fe.

¹⁶ Yi fiagi yi yula yo, Yii jigindi yi yula ka ba. Yimoko n ño ki gaadi ki yiedi mubima, Kelima yi kpiagidi baa lebidi ki tua fe. O Diedo baa teni yin ñuudi Leni paalu yo o pabienli tadiñokaaga.

¹⁷ Yin ban soani yaa tuona Liban po Baa guani ki baa yi yula po. Yi den kpa ti fuayandi boncianla. Moala, ti fuayandi yeni baa jieni yi. Li baa tua yeni Kelima yi kpa bi niba boncianla, Ki tieni mi diema, mi dogi leni mi niba mi biadima.

¹⁸ Ki tagi o bulo pia be yaa fuome? Li li tie o nisaalo n tagi Yaa bonyuogidi leni ti kudi bebe. Laa bangi nilo bontoala kuli se faama bebe. O bulo pia be yaa fuome yua n tagi o po, Ke o baa yaa dugi o po, Wani yua kan fidi ba ki maadi yeni?

¹⁹ Fala n baa yi, Yinba yaaba n maadi leni ku daagu Ki tua: ‹Fundi!› Ki tua li tanli lini yaali n kan fidi ki maadi mo: ‹Fii ki sedi!› O bulo baa fidi ki doagidi yi po be? Ba ke yi tabini o wula leni ŋanjilifa, O naa fo.

²⁰ O Diedo wani ye o kaangagidiŋamu nni. Lani, ki tinga nni, nilo kuli n sedi suo o nintuali!»