Filipi 1 - U TIENU MAAMA TILI 2013

Poli yema Kilisiti nni 1—2 I fuondi

¹ Mini Poli leni Timote, Jesu Kilisiti naacenba, n diani yi po li tili, yinba yaaba n tie bi nigagidiŋanba Jesu Kilisiti nni, ki ye Filipi dogu nni leni yi nitaanli yudanba leni yi todikaaba kuli.

² Ti Baa U Tienu leni o Diedo Jesu Kilisiti n pa yi li ŋanbili leni mi yanduanma.

I jaandi leni ti pagidi

³ N tuondi n Tienu min tiadi yi po yaa yogunu kuli.

⁴ Min jaandi yi po yaa yogunu kuli, n jaandi leni li pamanli,

⁵ kelima yin taa leni nni ki todi nni o Laabaaliŋamo wangima po maama, ki cili yin den kpa gbadi o yaa daali, ki pundi hali moala.

⁶ N daani ki go bani cain ke wani yua n cili laa tuonŋanli yi niinni, baa yaa tuuni li hali ki dudi li, Jesu Kilisiti guacuama daali.

⁷ Li pundi min yaa tiani yikuli po yeni, kelima n kubi yi n pali nni. Min ye leni ti kpaadi leni min maadi ki gaani o Laabaaliŋamo, ki teni ke o se ki pa, yikuli taa leni nni, ki baadi min baadi yaa ŋanbili U Tienu kani.

⁸ U Tienu tie n siedo, ke n bua yikuli leni Jesu Kilisiti yaa buamoanma.

⁹ Min miadi U Tienu yi po yaala n jaandi nni, tie ke yi buama n yaa yabidi ki pugidi leni mi bandima leni u fanmoanu.

¹⁰ Lani n tie yin bandi ki gagidi ki gandi yaala n ŋani ki cie. Lani n baa teni, yin yaa ŋani cain, ki naa pia ban baa fidi ki kuli yi leni yaala Kilisiti guacuama daali.

¹¹ Yeni, yi baa yaa tuuni mi teginma tuona, ya n ñani Jesu Kilisiti kani, lan tua ti kpiagidi leni ti pagidi U Tienu po.

Kilisiti n tie li miali

¹² N kpiiba, n bua yin bandi line: yaala n den baa nni teni ke o Laabaaliŋamo wangima suagi liiga.

¹³ Moamoani, li doagidi yaa toatieba n guu o bado diegu leni nitoaba kuli po, ke n lo li kpaadidieli nni kelima Kilisiti po.

¹⁴ N kpaadi teni ke ti kpiiba boncianla dugi o Diedo po ki cie, ki go paagi bi pala ki wangi U Tienu maama kaa go jie.

¹⁵ Li tie moamoani ke bi siiga bi tianba wangi Kilisiti Laabaaliŋamo, kelima bi pia n po li nunponli, ki bua ki cie nni. Ama bi tianba mo li wangi o leni li yantiaŋanle.

¹⁶ Bine wangi o Laabaaliŋamo kelima bi bua nni, ki bani ke n ye ne kelima U Tienu puogi nni, ke min maadi ki gaa o Laabaaliŋamo, ki doagidi ke o tie moamoani.

¹⁷ Bine mo wangi o ki bua ki cie nni, bi yantiana naa ŋani. Bi tama ke bi yaa tieni yeni li baa pugini n po fala li kpaadidieli nni.

¹⁸ Likuli tie n po yenma. Ba lan tie maama kuli, bi yaa wangi o leni mi tuonanma, bi ban wangi o leni li yantiamoanli, bi wangi Kilisiti Laabaaliŋamo. N mangi n pali li po, ki go baa yaa mangidi li ki pugidi.

¹⁹ N bani ke likuli baa juodi ki tua n tindima yaa po, kelima yin jaandi ki miadi n po maama leni Jesu Kilisiti Fuoma todima po.

²⁰ Min bua ki go sugini maama tie ke min da le i fe liba kuli po. Ama nani lan den kpa tie maama, li go tie yeni moala. N sugini ke Kilisiti n baa ti kpiagidi n miali yema kuli nni, min ye leni min kpe kuli.

²¹ Mini wani yaa po, Kilisiti n tie n miali, mi kuuma mo tie n po ñuadi.

²² Ama, n yema ki tinga po yaa baa todi n tuonli n suagi liiga, mii bani min baa gandi yaala.

²³ Laa bonliedila miabi nni. N bua ki ña ki gedi ki ban yaa ye leni Kilisiti, lani n cie n po hali boncianla.

²⁴ Ama yi yaa todima po, li baa yaa ŋani ki cie min yaa ye ki fo.

²⁵ N daani ki go bani ke n go baa yaa fo, ki ye leni yikuli, ke yin fidi ki yaa suagi liiga, ki go pia li pamanli li dandanli nni.

²⁶ Yeni, n guacuama yi kani go baa teni yin baa li pamankandikaali Jesu Kilisiti nni.

²⁷ Lanwani, bonyenla n tugi li yuli, lani n tie ke yi tagi n yaa da leni Kilisiti yaa Laabaaliŋamo. N yaa fidi ki cua yi kani ki laa yi leni n yàá fidi ki cua, min yaa gba ke yi se bonŋanla ki pia yantiayenli, ki moa o Laabaaliŋamo n cuani yaa dandanli yaa muali.

²⁸ Yin da cedi yi koanginkaaba n jieni yi ba waamu. Lani n tie bi po siedi ke bi baa bodi, ama li tie yinba yaa po siedi yi tindima po. Laa bonla ñani U Tienu yaa kane.

²⁹ U Tienu n tieni yi po yaa ŋanbili yeni, laa tie ke yin daani Kilisiti bebe ka, ama yin go yaa laadi o po fala moko.

³⁰ Yimoko taa leni nni ki moa yin den laa ke n moa yaa muali, ki go gba ke n baa ki moa laa muali hali moala.