Esidirasi 8 - U TIENU MAAMA TILI 2013

Esidirasi yegininlieba

¹ Yaa diedanba n den yegi leni nni ki ñani Babilonni Aritakiselisesi bali yogunu yela leni bi coali n tie ne:

² Finea cuuli nni, Gersomi. Itamari cuuli nni Danieli, Davidi cuuli nni Hatusi.

³ Sekania cuuli, yendo. Pareyosi cuuli nni, Sakari leni o diegu yaaba kobiga n jaba piimuu.

⁴ Pahati-Moabi cuuli nni, Seraya bijua Eliyonayi. O den yegi leni jaba kobilie.

⁵ Sekania cuuli nni, Jakasieli bijua leni jaba kobitaa.

⁶ Adini cuuli nni, Jonatan bijua Ebedi leni jaba piimuu.

⁷ Elami cuuli nni, Atalia bijua Esayi leni jaba piilele.

⁸ Sefatia cuuli nni, Mikayeli bijua Sebadiya leni jaba piinii.

⁹ Joabi cuuli nni, Yehieli bijua Abidiasi leni kobilie n piiga n jabinii.

¹⁰ Selomiti Jehieli nni, Josifia bijua leni kobiga n jaba piiluoba.

¹¹ Bebayi cuuli nni, Bebayi bijua Sakari leni piilie n jabinii.

¹² Asigadi cuuli nni, Hakatani bijua Yohanani leni kobiga n jaba piiga.

¹³ Adonikami cuuli nni Elifeleti, Yeyieli, Semaya, bani yaaba n den juodi. Bi den yegi leni jaba piiluoba.

¹⁴ Bigifayi cuuli nni Utayi, Sabudi leni jaba piilele.

Bi bogini Jerusalemi gedima po

¹⁵ N den taani laa niba kuli yaa kpenu n puubi ki cuubi Ahafa po kani. Ti den kali likani danataa. N den faami ki laa bi kopadicianba leni yaaba n sieni, ama mii den laa Levi buolu yua oba kuli bi siiga.

¹⁶ Lani n den yini bi yudanba Elieseri, Arieli, Semaya, Elinatani, Yaribi, Elinatani, Natan, Sakari leni Mesulami, ki taani leni li bali maama banda Yoyaribi leni Elinatani.

¹⁷ N den soani ba Kasifia bado Ido kani. N den waani ba ban baa n yedi Ido leni o lieba U Tienu naacenba yaala. N den waani ba ban baa yedi bani yaaba n ye Kasifia yaala, ki cuani ti po bi tuonsoanba ti Tienu diegu po.

¹⁸ Nani U Tienu n den ye leni ti ki kubi ti yeni, bi den cuani ti po Selebia, yua n den tie yanfuodaano ki tie Makiri buolu yua, Jakob bijua Levi yaabili. Bi den cuani wani, o bijaba leni o kpiiba ke bikuli tie piiga n nibinii.

¹⁹ Bi go den cuani Merari puoliŋuani nni Hasabia leni Esayi, bani, bi kpiiba leni bi bijaba ke bi tie niba piilie.

²⁰ Davidi leni bi yudanba n den puogi yaaba U Tienu diegu naacenba siiga yaaba, ke ban yaa tuuni Levi buolu po moko siiga, bi den cuani niba kobilie n piilie ban gandi yaaba.

²¹ Ahafa kpenu yeni kani, n den bili ke tin loli bu ñoabu ki waani ke ti miini ti yula ti Tienu nintuali, ke wan pa tinba, ti bila leni ti bonpiakaala li sancenŋanli.

²² I fe den baa cuo nni n yaa den mia o bado yaa toatieba leni yaa tanjagiba n baa ciani ti ki guudi ti ke yibalinba n da jia ti u sanu po. I fe den baa cuo nni kelima ti den yedi o bado ke U Tienu tandi o nuu ki kubi yaaba n dugi o po, ama ke o pabiencianli ye yaaba n yie o po.

²³ Lani yaa po yo, ke ti den loli bu ñoabu ki jaandi ki miadi ti Tienu, ke omo gaa ti miabu.

²⁴ N den gandi piiga n kopadicianbilie Selebia, Hasabia leni bi naataani siiga niba piiga.

²⁵ N den biigi bi nintuali o bado, o cancantieba, o koanbala leni Isidayeli yaaba, yaaba n den ye mi diema nni n den puni yaa ŋanjilifa, yaa wula leni yaa tiadi ti Tienu diegu po.

²⁶ N den teni ba ŋanjilifa kilo tuda piilie (20 000), yaa tiamoandi n tie ŋanjilifa kilo tuda piitaa (30 000) leni wula kilo tuda piitaa,

²⁷ Wula taditi, taditi piilie ke ti dunga pundi wula kujapiena tudili leni yaa kumoandi n ñuliti bonŋanla yaa boba, bobalie. Laa bobilieda den ŋani ki pia mayuli, ki pundi wula.

²⁸ Lanwani, n den yedi ba: «Yaa tiadi n tie ne gagidi o Diedo po nani yinba yin gagidi o po maama yeni. Yaa ŋanjilifa leni yaa wula n tie ne tie yi yantiapaaboe o Diedo yi yaajanba Tienu po.

²⁹ Yin faami laa bonla po ki kubi la bonŋanla, hali yin ban pundi Jerusalemi. Lankani, yin biigi likuli bi kopadicianba, Levi buolu nintuali leni bi diedanba yaa nintuali o Diedo diegu diena nni.»

³⁰ Lanwani, bi kopadicianba leni Levi buolu den gaa ban den biigi yaala kuli: ŋanjilifa, wula leni yaa tiadi n sieni ki baa gedini likuli Jerusalemi ki ban kuani ti, ti Tienu diegu nni.

Bi sancenba pundi Jerusalemi

³¹ O ŋmakpialo piiga n dalieli daali ti den fii Ahafa kpenu kani, ki baa gedi Jerusalemi. U Tienu den kubi ti li sancenli nni kuli, ki gaa ti ti yibalinba nuu nni leni ban den dia ti yaa diadi kuli.

³² Tin den pundi Jerusalemi ti den fuodi danataa.

³³ Li danaali daali, ti den biigi ŋanjilifa, wula leni yaa tiadi n sieni. Ti den biigi likuli ti Tienu diegu nni, ki teni Uriya bijua Meremoti o kopadiciamo. O den yegi leni Finea bijua Eleasari leni Levi buolu Josue bijua Josabadi leni Binuyi bijua Noadia.

³⁴ Tin den coadi ki biigi likuli, ti den diani likuli kpiagu n pundi maama.

³⁵ Yaaba n den ñani ti yonbidi nni ki guani ki kpeni den padi a pada Isidayeli Tienu po. Bi den padi Isidayeli yaaba kuli po piiga n naatonalie, piiyia n petonaluoba, piilele n pebilalele leni piiga n ŋuabuanalie, ki mia bi tuonbiadi sugili. Likuli den tie padijuukaana o Diedo po.

³⁶ Li yaa puoli, bi den caa bi yudancianba leni u kpenu nintuali guveneerinba o bado tondu. Lanwani, bi den todi Isidayeli yaaba U Tienu diegu tuonli po.