Esidirasi 4 - U TIENU MAAMA TILI 2013

U Tienu diegu maama da sedi

¹ Mi diema niba, Juda leni Benjamen buolu yibalinba den gbadi ke yaa Jufinba n ñani ti yonbidi ki kpeni maa o Diedo, Isidayeli Tienu diegu.

² Bi den cua Sorobabeli leni bi diedanba kani ki yedi: «Ti baa taani leni yi ki maa U Tienu diegu, kelima tinba leni yinba kuli jaani Tienyendu. Ti padi a pada o po hali Asiiri bado Asaradoni yogunu, wani yua n cuo ki cuani ti ne.»

³ Ama Sorobabeli, Josue leni Isidayeli yaaba diedanba yaaba n sieni den guani ki yedi ba: «Laa dagidi yin taani leni ti ki maa U Tienu diegu. Ti baa maa ku tinba tibebe, kelima ku baa yaa tie o Diedo Isidayeli Tienu diegu. Ba Persi diema bado Sirusi den bili yene.»

⁴ Lanwani, mi diema niba yeni den wudi Jufinba gbanu ki jieni ba ke ban cedi ki da go maa U Tienu diegu.

⁵ Persi bado Sirusi miali dana nni kuli, ki yaa caa hali Dariyusi yaa bali yogunu, bi den baa ban suu yaa cancantieba i ligi ke ban moandi ke Jufinba tuona n sedi.

Bi kuli Jufinba o bado Aritakiselisesi kani

⁶ O bado Asuerusi bali cilima, Jufinba yibalinba den diani li tili ki soani o kani, ki kuli Jerusalemi yaaba leni Juda dogi yii n sieni yaaba.

⁷ Persi bado Aritakiselisesi yogunu, Biselami, Mitiledati, Tabeeli leni bi lieba moko den diani li tili, ki soani o bado kani. Bi den diani li tili yeni leni Arameyen yaa diani, ki soagini Arameyen mabuolu nni.

⁸ Guveneeri Rehum leni o tidianlo Simisayi moko den diani o bado Aritakiselisesi kani li tili, ki maadi Jerusalemi maama. Li tili yeni den cili nanda:

⁹ «Tinba guveneeri Rehum, o tidianlo Simisayi leni ti lieba Dini yaaba, Alifalisataki yaaba, Tadipeli yaaba, Afadasi yaaba, Erieki yaaba, Babilonni yaaba, Susi yaaba, Deha yaaba, Elami yaaba,

¹⁰ ki taani o niciamo leni o paadaano Osinapadi n cuo ki gedini ki ban kaani yaaba Samari dogu nni leni tinbuotoana, yaaba n ye u kpenu nintuali n diani.»

¹¹ Ban den diani ki soani yaa tili nne: «O bado Aritakiselisesi, tinba a naacenba yaaba n ye u kpenu nintuali diani a po.

¹² O bado, ŋan yaa bani ke yaa Jufinba n ñani a kani yeni, guani ki cua ti siiga Jerusalemi ne leni yaa yantiali n tie ke ban guani ki maa mi yiema leni mi biadima dogu. Bi ŋanbi li tanpuuli ki guani ki maa i bilini.

¹³ Ŋan yaa bani ke bi yaa guani ki maa u naa dogu ki go guani ki maa i bilini, u niba kan go yaa pa bancanli, lubili bi sani tagima ligi. Yeni mo baa cuani o bado ŋalimano tingbali.

¹⁴ Li tie lani yaa po ke tinba yaaba yaa yula n mani, ke ti tie a naacenba, laa ke laa ŋani ban fali a. Lani n teni ke ti diani ki waani a,

¹⁵ ke ŋan teni ban lingi yaa tila n maadi a yaajanba maama niinni. A baa le lienni ke laa dogu tie mi yiema dogu. Yogunu kuli u den biidi bi badiba leni guveneerinba po. Hali yogu, u niba den fiindi mi yiema. Li tie lani yaa po yo ke bi den mudi laa dogu.

¹⁶ Ti bua ki waani a ke u dogu ne yaa guani ki maa ke u bilini mo maa, a kan go yaa die Efrati diema nintuali.»

O bado Aritakiselisesi maguankaama

¹⁷ O bado maguankaama n tie ne: «N diani yinba guveneeri Rehum, o tidianlo Simesayi, yi lieba yaaba n kaa Samari dogu nni leni tinbuotoana ya n ye u kpenu nintuali po. N fuondi yi.

¹⁸ Yin soani n po yaa tili yeni, bi soagini li ki cogi li n nintuali.

¹⁹ N teni ke bi lingi. Bi laa ke li tie moamoane ke hali yogu, laa dogu niba den fiindi bi badiba po mi yiema leni mi janjanma.

²⁰ Bi badipaaba den tieni laa dogu nni, ki diedi yaa diema n ye Efrati diema nintuali kuli, ki teni ke bi pa ba li bancanli, li lubili leni i sani tagima ligi.

²¹ Lani yaa po, yin teni bi niba n sieni li tuonli. U dogu yeni n da guani ki maa ke mii puni u sanu.

²² Yin da cuo laa bonla leni mi gbefema, ke lan da biidi bi badiba po ki pugini.»

²³ Ban li cogi o bado Aritakiselisesi n diani yaa tili Rehum, o tidianlo Simesayi leni bi lieba po yaa yogunu, bi den jaligi ki gedi Jerusalemi, Jufinba kani ki teni ke bi sieni li tuonli leni u paalu.

²⁴ Lanwani, U Tienu diegu maama tuona den sedi Jerusalemi. Li tuonli den sedi hali Persi bado Dariyusi bali binlieli binli.