Esidirasi 10 - U TIENU MAAMA TILI 2013

Jufinba ñani bi nilanpuoba

¹ Esidirasi n den laabi U Tienu diegu nintuali ki buudi, ki jaandi ki miadi bi tuonbiadi sugili, Isidayeli yaaba boncianla, bi jaba, bi puoba leni bi bila den cua o kani ki buudi boncianla.

² Lani, Elami cuuli yua Yehieli bijua Sekania den yedi Esidirasi: «Ti tieni ti tuonbiadi ti Tienu po, ki taa bi nilanpuoba mi diema nilanbuoli siiga. Ba yeni tinba Isidayeli yaaba, tii luo suginma.

³ Moala ti baa niani ti Tienu u ñoanianu, ke ti baa ñani bi nilanpuoba yeni leni bi bila kuli nani fini ti daano leni yaaba n taa leni a ki fangi ti Tienu bali maama n sua ke li dagidi maama. Ti baa tieni U Tienu bali maama n bili yaala.

⁴ Fii, li tie a yaa maame. Ti ye leni a. Paagi a pali, ki tieni la.»

⁵ Lani, Esidirasi den fii ki yedi ke bi kopadicianba siiga, bi yudanba leni Levi buolu yaa yudanba, Isidayeli yaaba yaa yudanba n poli ke bi baa tieni nani Sekania n yedi maama. Bi den poli.

⁶ Li yaa puoli, Esidirasi den ñani U Tienu diegu nintuali kani, ki ban kua Eliasibi bijua Yohanani dieli nni. O den kua likani, ama o den yie waa dini, waa ñuni, kelima o pali n den biidi Isidayeli yaaba, yaaba n ñani ti yonbidi tuonbiadi po maama.

⁷ Bi den kpaani Juda diema nni leni Jerusalemi kuli nni, ki yedi ke yaaba n den ñani ti yonbidi kuli n cua ki taani Jerusalemi.

⁸ Bi yudanba leni a nikpela den bili ke yua n ki cua danataa siiga, bi baa fie o piama kuli ki paadi ki ñani o bani yaaba n ñani ti yonbidi ki kpeni siiga.

⁹ Juda leni Benjamen buoli jaba kuli den taani Jerusalemi danataa yeni siiga. Li den tie o ŋmayialo dapiiliedi daali. Bi niba kuli den se U Tienu diegu luolu nni ke ki taaga mi. Bikuli den digibi boncianla kelima mi maama yeni po leni ki taaga po.

¹⁰ O kopadiciamo Esidirasi den fii ki yedi ba: «Yin taa bi nilanpuoba yeni, yi tieni ti tuonbiadi. Yi pugini Isidayeli yaaba tuonbiadi.

¹¹ Moala yin tuo yi tuonbiadi o Diedo yi yaajanba Tienu kani, ki tieni wani n bua yaala. Yin paadi mani leni mi diema nilanbuoli leni bi nilanpuoba.»

¹² Li nitaanli kuli den tiani ki yedi: «Li dagidi ti po. Ti baa tieni ŋan yedi yaala.

¹³ Ama bi niba yabi, ki taaga mo mi, ti kan fidi ki yaa se niini. Lani bebe ka, laa tie dayenli bi danalie maama ka, kelima ti siiga yaaba n tieni laa tuonbiadi yabi.

¹⁴ Ti yudanba n sedi li nitaanli kuli po. Ti dogi nni yaaba n taa bi nilanpuoba kuli baa cua ban bili ba yaa yogunu. Yuakuli baa cua leni o dogu nikpela leni u bujiaba. Ti baa teni ti Tienu pabienli n kagidi ti po.»

¹⁵ Asayeli bijua Jonatan, Tikifa bijua Jakasia leni yaaba n den todi ba, Mesulami leni Levi buolu yua Sabitayi bebe n den yie laa jagili.

¹⁶ Yaaba n sieni wani kuli den tuo. Bi den gandi o kopadiciamo Esidirasi ki go gandi buolu kuli nni bi diedanba, ki taa bi yela. Laa niba den kali cipiiga dakpiali, ki cili mi maama yeni buudi.

¹⁷ Bi den buni leni yaa jaba n den taa bi nilanpuoba kuli ki jia bi buudi ki gbeni li binlieli ŋmakpialo yaa dakpiali.

Yaa Jufinba n den taa bi nilanpuoba yeni yela

¹⁸ Bi kopadicianba siiga den pia yaaba n taa bi nilanpuoba. Li den tie Yotisadaki bijua Josue leni wani Josue waamu bijaba: Maaseya, Elieseri, Yaribi leni Gedalia.

¹⁹ Bi den tuo ke bi baa ñani bi puoba, ki go padi petonli ki mia bi tuonbiadi sugili miabu mo.

²⁰ Imeri cuuli, li den pia Hanani leni Sebadiya.

²¹ Harim cuuli, Maaseya, Eli, Semaya, Yehieli leni Osiasi.

²² Pasehuri cuuli: Eliyonayi, Maaseya, Isimayeli, Netaneyeli, Josabadi leni Eleasa.

²³ Levi buolu nni, Josabadi, Simeyi, Kelaja bi Kelita, Petaya, Juda leni Elieseri.

²⁴ Bi yanyinba siiga Eliasibi. U Tienu diegu buliñoaguuda siiga, Salumi, Telem leni Uri.

²⁵ Isidayeli yaaba, yaaba n sieni siiga, li den pia Pareyosi cuuli: Lamia, Jisija, Malikiya, Miyamini, Eleasari, Malikiya leni Benaya.

²⁶ Elami cuuli, Matania, Sakari, Yehieli, Abidi, Yeremoti leni Eli.

²⁷ Satu cuuli, Eliyonayi, Eliasibi, Matania, Yeremoti, Sabadi leni Asisa.

²⁸ Bebayi cuuli: Yohanani, Hanania, Sabayi leni Atilayi.

²⁹ Bani cuuli: Mesulami, Maluki, Adaya, Yasubi, Seyali leni Yeremoti.

³⁰ Pahati-Moabi cuuli: Adina, Kelali, Benaya, Maaseya, Matania, Betisaleeli, Binuyi leni Manase.

³¹ Harim cuuli: Elieseri, Yisiya, Malikiya, Semaya, Simeon,

³² Benjamen, Maluki leni Semaria.

³³ Hasumi cuuli: Matinayi, Matata, Sabadi, Elifeleti, Yeremayi, Manase leni Simeyi.

³⁴ Bani cuuli: Maadayi, Amirami, Uyeli,

³⁵ Benaya, Bedia, Keluhu,

³⁶ Vania, Meremoti, Eliasibi,

³⁷ Matania, Matinayi, Jasayi,

³⁸ Bani, Binuyi, Simeyi,

³⁹ Selemia, Natan, Adaya,

⁴⁰ Makinadibayi, Sasayi, Sarayi,

⁴¹ Asareeli, Selemia, Semaria,

⁴² Salumi, Amaria leni Josefi.

⁴³ Nebo cuuli: Yeyieli, Matitia, Sabadi, Sebina, Yadayi, Joeli leni Benaya.

⁴⁴ Laa niba kuli den taa bi nilanpuoba, bi siiga niba boncianla den baa a bila.