Esayi 62 - U TIENU MAAMA TILI 2013

Mi faabima laabaalo Siyon po

¹ N kan yaa ŋmini kelima fini Siyon po. N kan yaa kaa suo mo kelima fini Jerusalemi po. Hali a teginma n baa yendi Nani mi yenma, A faabima mo n yaa naani Leni yaa mukaanu n co yeni.

² Lanwani, i nibuoli baa le a teginma, Bi badiba mo kuli baa le a kpiagidi. Bi baa yaa yi ŋa yepanli, O Diedo yaa ñoabu n baa pa ŋa yaa yeli.

³ A baa tua ti kpiagidi badifogiliga O Diedo nuu nni, Ki tua badiyufinfincabili A Tienu nutali nni.

⁴ Bi kan go yini a: “Ban luni yua.” Bi kan go yini a tinga mo: “Diegbenbuoli.” Ama bi baa yaa yi ŋa: “O tie n pamanli.” Ki yini a tinga mo: “O puocaano,” Kelima o Diedo baa kuani o pamanli a niinni, A tinga mo n tua nani yua n kuni ti cadi yeni.

⁵ Nani o jawaalo n taa li puowandiali maama, A bijaba baa taa ŋa yene. Nani o jafaano n mangidi o togibaa pali maama, A baa mangi a Tienu pali yene.

⁶ N sieni bi guudikaaba Fini Jerusalemi dogu bilini po. Bi kan suo u yensiinu ki buali ku ñiagu. Yaa tiadi mani o Diedo Jerusalemi faabima yeni, Ki da pa yi yula fuodima li po.

⁷ Yimo n da pa o fuodima, Hali wan guani ki fiini Jerusalemi, Ki teni wan tua ti pagidi bonla ki tinga nni.

⁸ O Diedo den poli yaa poli n tie ne Leni o paalu ki yedi: «N kan go taa a ŋalikama Ki pa lan tua a yibalinba jiema. Ti nilanlandi bijaba mo kan go ño a dapanma, Ŋan duoli ki baa yaala.

⁹ Ama yaaba n dogini ŋalikama baa je o, Ki yaa pagi o Diedo. Yaaba n baa tuodi duven mo Baa ño o, n kaangagidiŋamu luoli nni.

¹⁰ Ña mani, ña mani! Ŋanbi mani u sanu bi niba po! Naadi mani, naadi mani u sanu, Ñani mani a tana ki yugidi Mi jakoandicabili bi niba yula po.»

¹¹ Diidi o Diedo n cedi ke ki tinga kuli gbadi yaala: Yedi mani Siyon dogu yaaba: «Diidi a Candaano kpendi ne, Diidi o panpaani yegi leni o, Ke o tuonli panpaani mo ye o liiga.»

¹² Bi baa yini ba: “Yaa niba n gagidi ki ŋani, O Diedo n daa ki faabi yaaba.” Ki yini a mo: “Ban lingi yua, Ban ki ŋaa yaa dogu.”