Esayi 57 - U TIENU MAAMA TILI 2013

¹ O niteginka bodi, Ke niloba ki kpaagi lipo. Bi cua ki taa yaa niba n tiendi mi ŋanma, Ke oba ki bandi yaala yaa po Ke bi taa o niteginka, Ke mi yebiadima n da baa o.

² O niteginka baa baa mi yanduanma, Ki duani ki fuodi o duanu po, Wani yua n ŋua yaa sanu n tiegi yeni.

U Tienu fu leni yaa nibuolu n ŋua i buli

³ Ama yinba, nagini mani ne! Yinba yaa pua n bu ku baagu bijaba, Li jaconconli leni li puoconconli N taani ki mali yaa nibuolu yeni.

⁴ Yi ñuadi mani ŋme yo? Yi miani ŋme yaa po yo yi ñoana Ki calini yi landi? Naani laa tie moamoani ka ke yi tie biyiekaana, Ki go tie yaa nibuolu n gbie leni i boandi?

⁵ Yi fiindi yi gbani yi ticiandi kani, Ki go fiindi yi gbani yaa tibu n bundi bonŋanla kuli tinga, Ki kodi a bila ti joaloandi nni Leni a tanmaba kani.

⁶ Yi ŋalimano ye ku joaloangu tingbantana nne, Ke yi biinu mo ye a yaa kani. Li tie laa tana yaa po yo ke yi cabini a ñincaba, Ki padi yi pada. Naani n baa fidi ki baagi n yuli Laa bonla kuli po?

⁷ Yi ŋanbi yi duani yaa juali N kpedi boncianla yuli po. Lankane ke yi do ki padi yi pada.

⁸ Yi buliñoakpiani puoli po yo, Ke yi joani yi ñoagitila, Kelima yi foagi leni nni. Yi yen yiedi ki do ki duani, Yi duanu yuu n pia yeni po. Yin den pia yaaba leni u juogu yeni, Yi yen bua ki yaa dua leni bane ki ñuadi ba.

⁹ Yi gedi o bado kani leni mi kpama, Ki sogi yi yula tulale bonŋanla. Yi soani yi tonda hali foagima, Ki jiini ba yeni hali bi tinkpiba diema nni.

¹⁰ Yi coagini yi yula leni li cenli, Ki naa baa yedi: «Ti baa lebidi!» Yi baa ki pia u paalu yo ki cuoni.

¹¹ Ŋme n den yagini yi yama? Yi den jie ŋme yo ki boandi nni ki kan tiadi n po, Ki didi kan yagi yi yama n po mo? Naani mii den ŋmini? Min ŋmini hali ke li waagi yeni ka teni ke yii jie nni?

¹² N yaa doagidi yi teginma leni yi tuona, Li kan todi yi.

¹³ Yi yaa ti buudi yaa yogunu, Yi buli, yin taani yi yeni kuli N faabi yi naa! U faalu baa tugi i buli yeni kuli. Mi fawaama mo baa taa yi. Ama yua n sani ki wuoni n kani kuli, Baa je mi diema bali ki diedi n joagagidikaali.

I baagi ñoanianu bi nidugikaaba po

¹⁴ Bi baa yedi: «Piini mani ti buodi ki ŋanbi u sanu, Ki ñani mani bontuudikaala kuli, N niba sanu nni.»

¹⁵ Yua n ye hali tanpolijoma, Wani yua n ye hali yaa yogunu kuli, Ke o yeli mo gagidi ki ŋani yedi: «N ye mi gagidiŋanma nni Leni yaa kaanu n kpedi ki cie I kaani kuli nni. Ama n go ye leni ban mabindi yua Leni yua n ye leni li pabiidili. Yeni n baa fidi ki baagi yaaba N ye li pabiidili nni, Ki go faabi yaaba n laadi fala bi pala nni.

¹⁶ N kan yaa koani leni ba yogunu kuli ka. N kan yaa fiindi n pali bi po yogunu kuli ka, Kelima n yaa tiendi yeni, Min tagi yaala ke li pia miali kuli baa bodi.

¹⁷ Isidayeli yaaba yiekandikaama po yo, Ke n pali den beni ke n pua ba. N pabiidili nni n den wuoni n yuli. Ama bi den baa ki ŋua mi yiema sanu, Ki ŋua bi pala n bua yaa sanu.

¹⁸ N den laa bi tagi. Ama ba yeni, n baa paagi ba, Ki gobidi ba, ki baagi bani leni yaaba N den ye mi kuuma paboanli nni kuli.

¹⁹ N baa kuani ti pagidi bi ñoana nni. Mi yanduanma bebe n baa yaa ye yua n ye foagima Leni yua n ye koanma nni po. O Diedo n yedi: ‹N baa paagi ba.›

²⁰ Ama bi nibiadiba wani tie Nani yaa ñincianma n lengidi yeni, Yaama n kan fidi ki duani suo, Mani yaama n fiindi ti moamoadi Leni li ŋoabili yeni.

²¹ N Tienu yedi ke yanduanma Ki ye bi nibiadiba po.»