Esayi 56 - U TIENU MAAMA TILI 2013

U Tienu baa kuani o ñoaniani 56—66 Bi kan go sundi oba kuli po

¹ O Diedo yedi mi naa maama: «Kubi mani yaa bujiali n tiegi, Ki yaa tiendi mi teginma, Kelima n faabima yogunu pundi. N teginma doagidima yogunu pundi.

² Li pamanli ye leni yaa nilo n tieni laa bonla, Ki se bonŋanla ki kubi Mi fuodima daali ki naa fali li, Ki kubi o yuli, kaa tiendi yaala n bia.»

³ Yaa caano n ŋua o Diedo n da yedi: «Laa pia kuli tama, o Diedo, Baa paadi ki ñani nni o niba siiga!» Ki moagiliga mo n da yedi: «Mini wani tie tikuonbu yo!»

⁴ O Diedo yedi mi naa maama: «Yaa moagilimu n jigini n fuodima dana, Ki gandi ki tiendi yaala n mani n po, Ki se bonŋanla n ŋantaado nni,

⁵ N baa pa ba n diegu leni n bilini nni, Yaa kaanu leni yaa yeli n ŋani Ki cie a bonjala leni a bonpola. N baa pa ba yaa yeli n baa ye yaa yogunu kuli, Ke liba kuli kan fidi ki bolini laa yeli.»

⁶ Lanwani, yaa canba n baa sani ki tabini o Diedo Ki baa yaa tuuni o po, Ki baa yaa bua o Diedo yeli, Ki baa yaa tie o naacenba, Yaaba n baa yaa jigini o fuodima daali kuli, Ki kan fali laa dana, Ki baa yaa se ke li pa n ŋantaado nni,

⁷ N baa yini bani n joagagidikaali po, Ki teni ban mangi bi pala n diegu nni, Ban jaandi nni naani. N baa tuo ki gaa bi padijuukaana Leni bi pada kuli n padibinbinli po, Kelima n Diegu baa yaa yi I jaandi diegu yo i nibuoli kuli po.

⁸ Li Miali Diedo U Tienu, Wani yua n taani ban luni Isidayeli yaaba, Yaaba yeni yedi: «N baa taani nitoaba leni Isidayeli yaaba, Yaaba n mali ki taa.»

Yaa yudanba n ki tiegi

⁹ Yinba ku muagu nni yandi kuli, Yinba li fuali nni yandi kuli, Cua mani ki je!

¹⁰ Yaaba n guu Isidayeli kuli tie juama, Baa bani puu kuli. Bikuli tie sangbanmuula. Bi kan fidi ki gogi, Kelima bi faadi mi guama. Bi faadi ki waagi ki dua, Ki dangi boncianla.

¹¹ Bi tie sangban-tugidanba, Baa pia ke bi guo. Bi tie yaa yankpaaba N ki bani ki gagidi liba. Bikuli ŋua bi sancele, Ke yuakuli li lingi o yuceli ŋamu.

¹² Cua mani ne, n baa gedi ki taa mi daama, Tin ño mi dabiadima ki gaadi. Ti didi go baa tieni yene saala mo, Kelima yaala n sieni yabi hali ke li kandi.