Esayi 52 - U TIENU MAAMA TILI 2013

O Diedo kan sundi oba kuli po

¹ Fundi mani, fundi mani, Yinba Siyon yaaba! Fii mani leni yi fidu yinba U dogagidiŋamu, Jerusalemi yaaba! Bobi mani yi tiaŋandi, Kelima a jifola leni yaaba N joagini kuli kan go kua yi kani.

² Fii mani ki yoagi yi tangungu Yinba Jerusalemi yaaba. Kali mani ki lodi yaala n luo yi tuli nni, Yinba Siyon bisiaba yaaba n ye ti yonbidi.

³ O Diedo yedi: «Bi den kuadi yi ki naa gaa liba. Lanwani, bi kan pa ligi ka ki daa ki faabi yi.»

⁴ Li Miali Diedo U Tienu yedi: «N niba den kpa cili ki gedi Ejipiti Ki baa n yaa ye. Lani yaa puole, ke Asiiri yaaba Den mabini ba fanma fanma.

⁵ O Diedo yedi: ‹Ban den ñani n niba Bi diema nni fanma fanma yeni, N baa tieni be moala? Bi tugutondanba tangi bi po, Bi sugidi n yeli yogunu kuli leni daali kuli.

⁶ Li tie lani yaa po yo ke n niba baa bandi n yeli.› Li tie lani yaa po yo ke bi baa bandi landaali, Ke mini n ba n maadi ki yedi: ‹Mini nne.› »

⁷ Diidi mani yua n cuoni a juana po, Ki caagi o laabaaliŋamo cenli n ŋani maama! Yua n kpaani mi yanduanma laabaalo, Yua n kpaani mi faabima laabaalo! Yua n yedi Siyon yaaba: «Yi Tienu n kaa ti gbandi po.»

⁸ Li tie a doguudiba yaa nialu, Bi kpedi bi nialu, Ki taani ki yigini kelima bi paadi po. Bi laa leni bi nuni ke o Diedo lebidi ki guani Siyon.

⁹ Yinba Jerusalemi diegbena yaaba, Taani ki yigini mani mi paadima yigimi, Kelima o Diedo baagi o niba, Ki daa ki faabi Jerusalemi.

¹⁰ O Diedo yugidi o buagu yaagu N gagidi ki ŋani ke diema kuli n le ku. I tinbiani kuli yaaba baa le ti Tienu faabima.

¹¹ Gedi mani, gedi mani, Ña mani Babilonni diema nni! Da sii mani yaala n joagini kuli! Ña mani mi diema yeni siiga! Ŋanbi mani yiba, Yinba yaaba n tugi o Diedo tadimu yeni!

¹² Yin da pua mani belibeli ka ki ña, Yin da sani mani leni jawaandi mo ka ki ña, Kelima o Diedo n baa kua yi liiga, Wani Isidayeli Tienu yeni n baa yaa ye Yi puoli ki guu yi.

O Diedo naacemo fala

¹³ Diidi n naacemo nne, O baa tua niciamo, O bali baa do, O yeli mo baa ña hali bonŋanla.

¹⁴ Nani wan den tua niba boncianla po, Jawaandi bonla maama, Kaa go den naani leni nisaalo, Ke o bugima mo ki go den tie nani nilo.

¹⁵ Moala o go baa tua yene, I nibuoli boncianla n baa yaa jie Yua. Bi badiba mo baa mubini bi ñoana o kani, Kelima bi baa le, ban kaa den togidi ba yaala, Ki gbadi ban kaa den kpa gbadi yaala.