Esayi 51 - U TIENU MAAMA TILI 2013

Yaa faabima n ki pia gbenma

¹ Yinba yaaba n tiini ki ŋua mi teginma, Ki lingi o Diedo, cengi mani nni! Gbegi mani ki diidi ban kpie yi yaa tangu kani Leni ban ñani yi yaa tanlongu nni.

² Yaadi ki diidi mani yi yaaja Abalahama Leni Sala yua n mali yi. O den ye o bebe yo, min den yini o yaa yogunu, Ama n den seligi o ki teni ke o mali boncianla.

³ Yeni, o Diedo gba Siyon po mi ninñima. O gba yaaba n ye ti diegbendi nni ninñima. O baa teni o fanpienma n tua nani Edeni, O tialu mo n tua nani o Diedo salidingo yeni. Li pamanli leni li pamancianli baa yaa ye o niinni, Ki taani ti pagidi yani leni i gogidimuani.

⁴ N niba, sieni mani yi yama kuli n kani! N buolu, diadi a tubili ki cengi nni bonŋanla, Kelima li bali maama baa ña a yaa kane. N baa teni n bujiali n doagidi Ki tua i nibuoli kuli yenma.

⁵ N teginma nagini, N faabima baa doagidi, N baa jia i nibuoli buudi. Yaaba n ye a kpendega po, Baa bili bi suginma n kani. Bi baa yaa dugi n paalu po.

⁶ Yaadi ki diidi mani tanpoli po, Ki nan yuandi ki tibini ki diidi tiipo. Tanpoli baa bodi nani i muñii yeni, Ki tinga mo baa yondi yondi ki baa Nani yaa tiadi n bedi yeni, Ki niba mo n bodi nani i sii yeni. Ama n faabima wani baa yaa ye Hali yaa yogunu kuli po. N teginma mo kan gbeni abada.

⁷ Cengi mani nni, Yinba yaaba n bani mi teginma! Yinba yaaba n kubi n bali maama yi pala nni, Yin da jie bi niba n baa waani yi yaa fe, Ki digibi leni ban baa fali yi maama po,

⁸ Kelima ti lulugidi baa bolini ba, Nani ti tiadi yeni. I nanboe mo baa bolini ba, Nani ti pekobidi yeni. Ama n teginma baa waagi ki ye Hali yaa yogunu kuli. N faabima mo baa yaa ye nifiima n tuu nifiima.

O Diedo, fundi

⁹ Fundi, o Diedo! Fundi! Fundi tontoni leni a buagu paalu! Fundi nani u yogu nni, Nani yaa nifiima n pendi yogu nni yeni! Fini ka den pua ki guli Ejipiti, Ki muu ki kpa o bonfuodibiado?

¹⁰ Naani fini ka den teni ke mi ñincianma Leni u kulu nni ñima kuli ñuudi? Fini ka den tieni u sanu mi ñincianma tiipo, Ki teni ŋan daa ki faabi yaaba, Baa ki tagini?

¹¹ O Diedo n faabi yaaba, Baa lebidi ki kpeni yene. Bi baa pundi Siyon leni li pamanli yani, Yaa pamanli n ki pia gbenma mo N baa yilini bi yula. Li pamanli leni li pamankandikaali N baa sani ki cua. Li paboanli leni i figindi mo baa sani ki foagidi.

N niba, yi go jie ŋme?

¹² Li tie mini lige, mini n baagidi yi. Be yaa po ke yi baa yaa jie o nisaalo Yua n baa kpe? O nisaalo biga, yua yaa miali n tie Nani ku muagu yeni, Be yaa po ke yi baa jie o,

¹³ Ki sundi o Diedo yua n den tagi a po? Ŋaa bani ke wani n dadi ki tandi ti tawadi, Ki bili ki tinga tanpuuli? Be yaa po yo ke a baa yaa ye daali kuli yaa jawaandi N ki pia gbenma nni? Be yaa po yo ke a jie yua n faligidi a pabiencianli, Nani o yaa bi baa fidi ki bolini a yeni.

¹⁴ Li kan waagi ke bi baa luodi Ban den luoni yua. O kan kpe kpaadidieli nni, O jiema mo kan poadi o.

¹⁵ N tie o Diedo yi Tienu, Yua n lengidi mi ñincianma, Ki teni ke mi ñingola fu. O yeli n tie: «Li Miali Diedo U Paaciamu Kuli Daano.»

¹⁶ N kuani n maama a ñoabu nni, Ki ŋoagini a leni n nuu soangu, Ki tandi ti tawadi, Ki bili ki tinga tanpuuli, Ki yedi Siyon yaaba: «Yinba n tie n niba.»

Guani mani ki pandi, yinba Jerusalemi yaaba

¹⁷ Fundi mani, fundi mani! Fii mani, yinba Jerusalemi yaaba! Yinba yaaba n ñuni o Diedo nuu nni, O pabienli tadiñokaaga. Yinba yaaba n ñuni ki fuadi Yaala n den ye ki nunfufuuga tadiñokaaga nni.

¹⁸ Yin den mali yaa bijaba kuli, Oba kuli ki ye, yua n baa gobidi yi. Yin den wubi yaa bijaba kuli, Oba kuli ki ye yua n baa muubi Yi buagu ki dadi yi.

¹⁹ Yaa bonliedila n tie ne kuli nandi yi, Ŋme n baa mua yi po? Lani n tie bu febu leni mi bolinma. Mi koma leni bu toabu. Ŋme n baa baagi yi?

²⁰ Yi bijaba gbali Ki bili bili i sankuni nni, Nani yaa kabilo n baa ku diagu nni yeni. O Diedo pabienli jagi bi yula po. Yi Tienu mo fu leni ba.

²¹ Ama moala cengi mani, Yinba yaaba n ye leni fala, Yi ñuni ki gaadi Ke li naa tie daama ka.

²² Yi Diedo, Li Miali Diedo yua n gaa O niba koanli yedi mine: «Diidi n fie yi nuu nni, Ki nunfufuuga tadiñokaaga, N pabiencianli n ye yaa tadiñokaaga nni, Ke yi kan go ño ki niinni.

²³ N baa mubini ka, Yaaba n den faligidi yi yaa nuu nni, Bani yaaba n den tua: ‹Labini mani tin tagini!› Lani yaa po n den teni, Ke yi buani tua nani ki tinga yeni, Ki naani leni u sanu bi santagiba po.»