Esayi 41 - U TIENU MAAMA TILI 2013

O Diedo n tuodi ki gandi yaa nilo

¹ Yinba yaaba n ye a kpendega po, Suo mani ki cengi nni! I nibuoli n pugini bi fidu, Ki nagini ne tin maadi! Tikuli n taani ki cua ti buudi po.

² Ŋme n den ban fiini puoli po Yua n ŋua mi teginma puoli? Ŋme n den teni o i nibuoli, Ki teni ke o paadi bi badiba? O jugisiega nugi ba yomi yomi. O dabanli mo yadi ba nani u faalu n figi Ki yadi yaa muayoma yeni.

³ O ŋoadi ki deli ba ki pendi ke baa sii o, O taana mo ki siigi tiipo.

⁴ Ŋme n tagi ki go tieni laa bonla? Li tie yua n yen yini ki taani, Nifiima n tuu nifiima hali mi cilima. Mini Li Miali Diedo n tie o nikpialo, Ki go baa taani leni bi nijuodikaaba mo.

⁵ Yaaba n ye a kpendega po yen le o, Ti jawaandi n cuo ba. Yaaba n ye i tinbiani nagidi, ki digibi.

⁶ Bi todi biyaba Ke yuakuli tua o kpiilo: «Paagi a pali!»

⁷ O tuonsoanbando paagidi yua n duadi pali. Yua n ŋanbidi ti kudi leni ki tuatuaga Mo paagidi yua n pua li ñinli po yaa pali. O yedi mi tuginma po: «Li ŋani!» O kpaa ki sieni o bulo yeni Leni a kpakpaana Ke wan da begibi.

Moala ŋan da jie

⁸ Ama fini n naacemo Isidayeli, Fini Jakob min gandi yua N danli Abalahama buolu!

⁹ Min den ñani fini yua hali u tinbianu, Ki yini ki ñani a, min den yedi yua: «A tie n naacemo, n gandi a, Ki kan lu ŋa!»

¹⁰ Ŋan da jie kelima n ye leni a. Ŋan da nua leni yanbani Kelima n tie a Tienu. N baa yaa pugidi a fidu, N baa cua ki todi a, N kubi a leni n nujienu yuu paani li bonla kuli.

¹¹ Diidi yaaba yaa pala n be a po kuli, Baa fiagi ki yaa tiibi i fe po. Yaaba n koani leni a Baa bodi ki tua fanma.

¹² Yaaba n den cidi a li koanli yeni, A baa ti lingi ba, a kan le ba. Yaaba n togidi a leni bu toabu yeni, Mo baa bodi ki tua fanma,

¹³ Kelima n tie Li Miali Diedo a Tienu Yua n muubi a nuu. N yedi a: «Da jie liba. N cua ki baa todi a.»

N baa cua ki todi a

¹⁴ O Diedo yedi: «Da jie liba fini Jakob buolu Yuu n tadi nani o sidibilo yeni. Yinba Isidayeli yaaba, Yaaba n tadi nani bi tinkpiba yeni, N kpendi ki baa gaa yi, Mini yi daafaabika, Isidayeli Tienu Yua n Gagidi ki ŋani.

¹⁵ Yinba Isidayeli yaaba, N teni ke yi tua nani ban dia Yaa dafulikaagu ki pua ti kpaandi, Ke ku paani ki pia a kpakpaana Ke a sondi yeni. Yi baa mudi a joaciama yomi yomi, Ki teni a joabila n tua nani Mi muayoma yeni.

¹⁶ Yi baa lendi ba, u faalu n taa ba, O pinpinjoa mo n yadi ba. Ama yinba, yi baa mangi yi pala O Diedo po. Yi baa yaa kpiagidi yi yula Isidayeli Tienu yua n Gagidi ki ŋani po.

Mi fanpienma lebidi ki tua baagu

¹⁷ Bi ninñinniba leni a luoda lingi Mi ñima, ama maa ye. Bi landi kuodi u ñuñuunu po. Mini Li Miali Diedo baa tuo bi miabu, Mini Isidayeli Tienu, n kan ŋaa ba.

¹⁸ N baa teni i kpeni n pudi a juana nni, A ñinbuna mo ti joaloandi nni. N baa teni mi fanpienma n lebidi ki tua baagu, Mu tinkuonmu mo n tua ñinbuna.

¹⁹ N baa teni sediri tiidi, Akasia, militi Leni olivie tiidi n pudi Mi fanpienma nni, Ki go teni sipre, olima leni buisi tiidi N pudi a penpela po.

²⁰ Lani n tie bi nisaaliba n le ki bandi, Ki kpaagi ki noanli ki le mini O Diedo nuu n tiendi laa bonla kuli, Ke mini Isidayeli Tienu Yua n Gagidi ki ŋani n tieni likuli.»

U Tienu koani leni i buli

²¹ O Diedo yedi: «Maadi mani yin pia yaa maama, Wani, Jakob puoliŋuani bado yedi: ‹Waani mani yaala n tie i moamoani.

²² Yi buli n doagidi ki waani ti Yaala n baa faa ki cua. Doagidi mani ti po hali mi cilima Yaala n den ye n tua maama. Togidi ti mani, ke tin fangi ti yula po. Lani n tie tin bandi yaala n ŋua, Yaa ka, waani ti mani yaala n faadi ki ye.

²³ Waani ti mani yaala n baa juodi. Lani, ti baa bandi ke yi li tie tiene moamoani. Tieni mani bonliba, yaala n ŋani, Yaa ka yaala n bia, Ki ŋubidi ti nuni ke tin taani ki diidi la.

²⁴ Diidi mani, yi buli ki tie puu kuli, Yi tuona tie fanma lige. Yin gandi ki ŋoadi yii yeni, Tie yaa bonla n gundi hali boncianla.

²⁵ N yini nujienu po joa ke o cua. O ñani puoli ki taa n yeli ki jaandi ki mia nni. O ŋmaa bi paadanba Nani ti tansoangidi yeni, Nani o maado n ŋmaadi Ku yoagu maama yeni.

²⁶ Ŋme n den puni o li laabaalo hali mi cilima? Ti bua ki bandi o. Ŋme n den tuodi hali yogu ki maadi o maama? Ke tin waani o ke o maama tie moamoane.› Niloba ki den maadi la, Niloba ki den puni li laabaalo, Niloba kuli mo ki den gbadi Ke yi maadi li maama.

²⁷ Mini n den kpa puni li laabaalo Siyon nni ki yedi: ‹Diidi ba, bi cua.› Ki yedi bani Jerusalemi yaaba mo: ‹N soani o laabaalimano tondo.›

²⁸ N diidi yaaba n pua saawali kuli siiga, Ki sua ke ba niyendo ki ye, Ba yendo yua n baa fidi ki maadi Ki guani n po, n yaa buni o.

²⁹ Diidi, bikuli tie fanma bebe, Bi tuona mo kuli tie fanma bebe, Bi buli kuli tie fanma leni yaala n ki ye.»