Esayi 31 - U TIENU MAAMA TILI 2013

Ejipiti yaaba moko li tie nisaalibe

¹ Fala baa nandi yaaba n caa Ejipiti diema nni ki ban lingi mi todima. Bi dugi i taami leni ti toateliti po, Kelima bi coali yabi boncianla. Bi jigini bi tanjagiba, Kelima bi fidu yabi boncianla. Ama bi naa yaadi ki diidi Isidayeli Tienu yua n Gagidi ki ŋani. Bi naa lingi wani o Diedo!

² Ama o bani wan tiendi yaala: O baa fidi ki cuani mi yebiadima. O kan lebidi o maama. O fii ki sedi bi nibiadiba diegu po Leni yaaba n tiendi yaala n ki tiegi, Ke bi miadi ba mi todima po.

³ Ejipiti yaaba tie nisaaliba, Baa cie yeni. Bi taami moko li tie taami bebe, Baa mibi lankani. O Diedo yaa tandi o nuu, Yua todi baa tuudi, Ban todi yua n baa ŋmadi ki baa, Bikuli baa taani ki bodi.

O Diedo n baa koani ki gaa Jerusalemi

⁴ O Diedo yedi nni yaa maama n tie ne: «Nani o yangbanlo bi li yangbanbili N yen duni wan cuo yaala po maama, Ki naa yagini o yama leni yaa yankpaaba N taani ki cua ki baa baa o po, Ki naa jie bi coali ke bi kuudi mo ki jiendi o yeni, Li Miali Diedo U Paaciamu Kuli Daano moko jiidi Siyon juali leni o joabiga kuli yuli po, Ki baa tieni bu toabu yene.

⁵ Nani i nuani n laani bi bila po maama, Li Miali Diedo U Paaciamu Kuli Daano Moko baa tandi o nii, Ki pii ki faabi Jerusalemi. O baa faabi ki go kubi. O baa ñani ba fala nni ki kubi ba bonŋanla.»

⁶ Yinba Isidayeli yaaba, Lebidi ki guani mani, Yin den buli yua ki nunga kani.

⁷ Laa daali, yuakuli baa lu o buli Yii n tie ŋanjilifa leni wula, Yi nii yii n pia i tagili n tagi yi po yii yeni.

⁸ Yaa jugisiega n ki tie nisaalo Jugisiega n baa kpa Asiiri yaaba. Yeni de! Yaa jugisiega n ki tie nisaalo Jugisiega n baa je ba. Bi baa sani ki jugisiega nintuali, Bi jawaaba mo baa yaa tuuni a tuonpaala tiladi.

⁹ Ti jawaandi baa teni yua n tie bi tangu n sani, Bi toatieba yudanba mo baa jie ki luodi, Ki sani ki ŋaa bi jakoandicabili. O Diedo yua yaa mu n ye Siyon Ke o buaga mo ye Jerusalemi n yedi yeni.