Esayi 24 - U TIENU MAAMA TILI 2013

Esayi n laa yaala mi juodima po 24—35 Ki tinga kuli bia fanma

¹ Diidi mani, O Diedo biani ki tinga fanma, Ki gbeni ki niba. O luni ki lebidi ki tinga nunga, Ki yadi yaa niba n ye ki niinni.

² Li tie yenme o kopadiciamo Leni li nitaanli po, Canbaa leni o naacemo po, Cannaa leni o puotuado po, Yua n kuadi leni yua daa po, Ban ledi yua yaa kani Leni yua n baa ledi kuli po, Ban pia yua yaa panli Leni o pandaano kuli po.

³ Ki tinga kuli bia fanma, bi fagi ki kuli, Kelima o Diedo yedi:

⁴ «Ki tinga ye leni li paboanli, Ki coagi. Li ŋandunli coagi ki kuodi. Ki tinga nigbenga kuodi.»

⁵ Ki tinga niba n biidi ki tinga, Kelima bi miidi li bali maama, Ki lebidi a ñoamabonbilikaana, Ki fidi yaa ŋantaado n tie Yaa yogu n tuu yaa yogu kuli po.

⁶ Lani yaa po yo ke ti solindi dini ki tinga. I tagili mo jagi yaaba n ye ki niinni po. Lani n teni ke ki tinga niba buodi, Yaaba n sieni mo ki go fuu.

⁷ Mi damanma ye leni li paboanli. Duven tiidi kuodi, Yaaba yaa pala n bi mani kuli duni.

⁸ A gangaana moe manu gbeni. Ku jeligu lanbu gbeni. Ti gogiditi moe manu gbeni.

⁹ Bi kan go ño daama ki yaa yiini, Mi dabiadima to o dañolo po.

¹⁰ Yaa dogu n ki go pia nilo yeni mudi. A diena kuli luoni. Oba kuli ki go kua a niinni.

¹¹ Bi kuudi i sani nni, Kelima mi daama poadi, Li pamanli gbeni mi diema nni, Pamankandikaali kuli mo ki go ye.

¹² Pabiidili bebe n ye u dogu nni. Ban mudi yaa buliñoabu mo biidi cain,

¹³ Kelima li tie mi diema nni Leni i nibuoli siiga, Nani olivie bonluonkaala ciema yogunu, Nani ban sobidi duven tiidi Bonluonkaala ki gbeni yaa yogunu yeni.

Yaa pamanli n tuodi ki cua

¹⁴ Ama yaaba n ciadi fala nni, Kpaani boncianla ki mangi bi pala. Hali nintuali po, bi kpaani ki mangidi bi pala, O Diedo kpiagidi po.

¹⁵ Kpiagi mani o Diedo diema Yinba yaaba n ye puoli. Pagi mani Li Miali Diedo Isidayeli Tienu, Yinba yaaba n ye mi ñincianma dega po.

¹⁶ Hali u tinbianu, ti gba ke i yani tua: «U Tienu yua n tiegi n baa ti jigidi.» Ama mini wani yedi: «N bia n yeni! N bia, u nufanu pua nni! I janbi danba janbidi, Yeni de! I janbi danba janbidi!»

¹⁷ Ti jawaanciandi, ku buogu Leni i taali jagi a yuli po, Fini yua n ye ki tinga yeni po!

¹⁸ Yua n gbadi ku fuugu ki jie ki sani, O baa baa ku buogu nni. Yua mo n duobi ku buogu nni ki baa ña, Baa baa i taali nni, Kelima tanpoli diebona luodi, Ki tinga tanpuuna mo digibi.

¹⁹ Ki tinga toani i yiani, Ki tinga pudi ki yagidi yagidi, Ki tinga yoagi.

²⁰ Ki tinga jadibi nani o dañolo yeni. Ki yoagibi nani ku diewudingu yeni, Ki biadima n kubi ka, Ki baa baa ki kan go fii mo.

I nibuoli diema juodima, U Tienu bali cilima

²¹ Landaali o Diedo baa waani fala Yaa toagola n ye tanpoli po Leni yaa badiba n ye ki tinga nni.

²² Bi baa taani ba Nani ban dogini yaa kpaada ku buogu nni. Bi baa luoni ba li kpaadidieli nni. A dana boncianla yaa pendi, Bi baa waani ba fala.

²³ O ŋmaalo baa fiagi, I fe baa cuo u yienu moko, Kelima Li Miali Diedo U Paaciamu Kuli Daano Kaa ti gbandi po, Siyon juali po leni Jerusalemi nni. Ti kpiagidi baa yaa ye o nikpela nintuali.