Esayi 2 - U TIENU MAAMA TILI 2013

¹ Amotisi bijua Esayi n den baa yaa maama o Diedo kani, Juda diema leni Jerusalemi dogu po.

I nibuoli kuli taani Jerusalemi

² Mi juodima yogunu yaa pundi, O Diedo bili ke o diegu n ye yaa juali po, Baa kpedi ki cie a joabila kuli, Ba a joaciama moko. I nilanbuoli kuli mo baa yaa tigibi Ki caa likani.

³ I nibuoli boncianla baa yaa caa likani Ki tua biyaba: «Cua mani tin do o Diedo juali yuli po, Wani Jakob Tienu diegu kani, Ke wan bangi ti o sani, Ke tin yaa cuoni yini yaa niinni.» Li tie Siyon po yo Ke li bali maama baa ña, O Diedo maama mo n ña Jerusalemi.

⁴ O baa tua i nibuoli bujialo. O baa tua nibuoli boncianla koanpaado. Bi baa taa bi jugisiemu ki maa a cecela. Ki baa taa bi kpaana mo ki maa ti moaciedi. Nibuoluba kan go fii ki tuogi uyuu. Bi kan go bangi bu toabu n tiendi maama.

⁵ Yinba Jakob buolu, Fii mani tin cuoni O Diedo yenma nni.

O Diedo daali baa tua buudi daali

⁶ O Diedo, a ŋaa a niba, Jakob buolu Kelima puoli lingida gbie bi diema nni. Bi kua i ñoagi nni mo nani Filisiti yaaba, Ki taa ñoabu leni bi nilanba.

⁷ Bi diema gbie leni ŋanjilifa leni wula, Bi ŋalimano mo ki pia bianu, Bi diema gbie leni i taami, Bi toateliti mo ki pia bianu.

⁸ Bi diema gbie leni i buli Bi yen gbaani bi nii n tagi yaala Yaa nintuali ki pugi la.

⁹ Li tie lani yaa po yo ke bi nisaaliba Godi ki buani ki baa le i fe. Ŋan da tieni bi po sugili.

¹⁰ Wuoni mani ti tanlondi nni. Kua mani ki tinga nni, Ki fidi ki sani ki foagidi Leni o Diedo pabiencianli, Leni o kpiagiciandi yabinu.

¹¹ O kafaadaano baa tibini o yuli, Bi niba japaadi n baa u bianu. O Diedo bebe n baa baa ti jigidi landaali.

¹² Li Miali Diedo U Paaciamu Kuli Daano bili landaali Ki baa yie yaala n pia mi kafaama Ti japaadi leni li yusieli kuli po, Ki guani ki jiini la.

¹³ O Diedo fii ki sedi Liban diema sediri tiidi, Yi n foagi ki go kpedi boncianla po, Ki taani leni Basan seni tiidi po.

¹⁴ O fii yaa joaciama n kpedi Leni yaa joabila n kpedi kuli po.

¹⁵ O fii a toadiefoaga po, Leni yaa bilini n kpedi ki pia u fidu kuli po.

¹⁶ O fii Tarsisi ñinbiaciandi po Leni yaa bonla n pia li yankuali kuli po.

¹⁷ O fii o nisaalo kafaama Leni bi niba japaadi kuli po, Ki baa jiini bi bala! O Diedo bebe n baa baa ti jigidi landaali.

¹⁸ I buli kuli baa bodi.

¹⁹ Yaa daali ke o Diedo baa fii Ki jieni ki tinga, Bi niba baa sani ki wuoni Ti tanlondi nni leni ki tinga buodi nni, Ki bua ki sani ki foagidi leni o Diedo Pabienli leni o kpiagidi yabinu.

²⁰ Landaali bi baa taa bi buli yii n tie ŋanjilifa leni wula, ban den tagi yii ki baa yaa pugi yi yeni, ki lu a dapola leni ti janjandi po.

²¹ Ti tanmabidi nni leni ti joaloandi nni, N tie ban baa sani ki wuoni naankani Ki le bi yaa baa sani ki foagidi leni O Diedo pabienli leni o kpiagidi yabinu, O yaa fii ki baa jieni ki tinga yaa yogunu.

²² Cedi mani ki da go dugi nisaalo po, Yua yaa miani n ki pia fuoma. O fuoma n tie mile?