Bi Bujiaba 18 - U TIENU MAAMA TILI 2013

Dan buolu lingi li kuanli

¹ Lanyogunu, bado ki den ye Isidayeli diema nni. Dan buolu den lingi ban baa kali naani, kelima bi daa den baa tinceli Isidayeli yaaba siiga.

² Lanwani, bani Dan buolu den gandi bi siiga jakoandamuu. Bi den soani ba ke bi ñani Tisoreya leni Esitaoli, ki baa goandi mi diema, ki diidi ma bonŋanla. Bi den gedi ki ban pundi Efrayimi juana nni, hali Mika deni. Bi den kua ki cani lankani, ki duani likani.

³ Ban den ye likani, bi den gbadi o jawaalo yua n tie Levi buolu yua yeni nialu, ki bandi u. Bi den gedi ki buali o: «Ŋme n cuani a ne? A tuuni be nekanba? A pia be ne?»

⁴ O den guani ki yedi ba: «Mika tieni n po line leni line. O pa nni i panpaani, ke n tie o po kopadiciamo.»

⁵ Bi den yedi o: «Mia ti po U Tienu ki buali o, tin bandi ti sancenli yaa baa baa mayuli bi li yaa kan baa.»

⁶ Lanwani, o kopadiciamo den guani ki yedi ba: «Gedi mani leni mi yanduanma. O Diedo cangi yi yi sancenli nni.»

⁷ Bi jamuudiba yeni den mibidi ki ban pundi Layisi dogu. Bi den laa likani yaaba n ye leni mi yanduanma nani Sidon yaaba yeni. Liba kuli ki den yagini bi yama, baa den bangi liba po. Mi diema nni ki den pia yua n die ba ki mabindi ba. Bi den foagi leni Sidon yaaba, baa den tuugi leni nitoaba mo.

⁸ Dan yaaba n den soani yaaba yeni den guani ki cua Tisoreya leni Esitaoli bi kpiiba kani. Bani mo den buali ba ban cuani bi po yaa laabaali.

⁹ Bi den guani ki yedi ba: «Cua mani ne tin gedi ki ban baa Layisi yaaba. Ti ban laa mi diema ki sua ke mi ŋani hali boncianla. Da kaa mani ki kan tieni liba. Jaligi mani ki gedi ki ban paadi mi diema yeni.

¹⁰ Yi yaa ban pundi, yi baa le mi niba ke baa bangi liba. Mi diema yeni yabi, U Tienu mo taa ma ki tieni yi nuu nni. Ki tinga piama buoli kuli ye likani.»

¹¹ Dan buolu niba kobiluoba den fii ki ñani Tisoreya leni Esitaoli, ki kubi bi toatiadi.

¹² Bi den gedi ki ban kpaa bi toanagili Kiriyati-Yearim dogu nintuali po, Juda diema nni. Li tie lani yaa po yo ke laa kaanu yi Mahane-Dan hali dinla.

¹³ Bi den ñani lankani ki gedi Efrayimi juana nni, ki ban pundi hali Mika deni.

¹⁴ Bi jamuudiba yaaba n den ban goandi Layisi diema yeni, den yedi bi lieba: «Naani yi bani ke o bulo, telafiminba, nannankpiedikaali leni nannanduadikaali ye a diena ne siiga dieyenli nni? Yin jagi mani yin baa tieni yaala moala.»

¹⁵ Li yaa puoli, bi jamuudiba yeni den kua Mika diegu nni, Levi buolu jawaalo yeni kani ki buali o o yaa pia laafia.

¹⁶ Dan buolu niba kobiluoba yeni den se bu buliñoabu kani, ki kubi bi toatiadi.

¹⁷ Bi jamuudiba yaaba n den ban goandi mi diema yeni den kua deeni, ki taa li nannankpiedikaali yeni, o bulo, telafiminba leni li nannanduadikaali yeni. O kopadiciamo yeni den se bu buliñoabu kani, wani leni i nikobiluobidi yii n kubi ti toatiadi yeni.

¹⁸ Wani o kopadiciamo yeni n den laa ke bi kua Mika dieli nni ki taa li nannankpiedikaali, o bulo, telafiminba leni li nannanduadikaali yeni, o den buali ba: «Yi tiendi be nne?»

¹⁹ Bi den guani ki yedi o: «Cuo a ñoabu, ŋan da liegi liba kuli. Ŋoadi ti ki ban tua ti tundika leni ti kopadiciamo. A bua ki yaa tie kopadiciamo niyendo yaa diegu yaaba bebe yaa po, bi Isidayeli buoli siiga buomunu yaaba kuli yaa po yo?»

²⁰ O kopadiciamo yeni pali den mangi. O den taa o bulo, telafiminba leni li nannankpiedikaali, ki ŋoadi bi niba yeni.

²¹ Bi den guani ki taa u sanu. Bi den kuani a bila, ti yandi leni a tuga liiga.

²² Bi den foagidi leni Mika diegu, ke Mika kuantalieba den yini biyaba ki taani ki ŋoadi ba.

²³ Bi den tiani ki yini Dan buolu ke bi gbegi ki buali Mika: «Be n pia ŋa ke a teni yaa niligu n tie ne ŋua ki fu?»

²⁴ O den guani ki yedi: «Yi taa min den tieni n yuli po yaa buli, ki go taa n kopadiciamo ki ban caa. Liba kuli ki go sieni n po. Yi nan baa gaa lede ki go buali nni yaala n pia nni?»

²⁵ Dan buolu den yedi o: «Tin da go gbadi a ñoabu nni. Lani yaa ka ti siiga bi tianba pala yaa fii, bi baa guani ki baa yi. Yeni mo, a baa cuani fini leni a diegu bolinma.»

²⁶ Li yaa puoli, bi den tagini ki ban caa. Mika den sua ke bi pa ki cie o, ke o den lebidi ki kuni.

Dan buolu kali Layisi

²⁷ Dan buolu den fie Mika n den tieni yaa tiadi, ki go taa o kopadiciamo yua n den tuuni o po mo. Bi den gedi ki baa Layisi ki bolini u niba yaaba n den ye lienni leni mi yanduanma kaa bangi liba po yeni. Bi den juu u dogu.

²⁸ Niloba kuli ki den faabi u, kelima u den foagi leni Sidon, u niba mo ki den tuugi leni nitoaba. U den ye yaa joaloangu n tandi ki caa Beti-Lehobi dogu po. Dan buolu den guani ki maa u dogu yeni ki kali likani.

²⁹ Bi den yini u Dan, bi yaaja Dan, Jakob bijua n den yi maama. Ama u den kpa yi Layisi yo.

³⁰ Dan buolu den sieni bi po li nannankpiedikaali, wani Musa yaabili Jonatan, yua mo n den tie Gersomi bijua n den tua Dan buolu kopadiciamo. O bila leni o yaabila den kubi laa tuonli, hali ban den ban cuo ki gedini Isidayeli yaaba ti yonbidi.

³¹ Bi den sieni bi po Mika n den tieni yaa nannanli yeni, ke bi kubi U Tienu diegu n den ye Silo yaa yogunu kuli.