Bi Bujiaba 16 - U TIENU MAAMA TILI 2013

Samison ŋabi Gasa dogu buliñoaluoditi

¹ Samison den gedi Filisiti yaaba dogu Gasa. O den laa li puokpagili likani, ki kua li kani.

² Bi den waani Gasa yaaba ke Samison cua likani. Lani, bi den dua ki gaandi laa ñiagu kuli, ki guu u dogu bilinciamu buliñoabu kani o yaa baa ña. Laa ñiagu kuli baa tieni liba. Bi den tua: Tin guudi ku tiŋaagu ki kpa o.

³ Samison den dua hali ku yoagisiigu. Ku yoagisiigu o den fii ki cuo u dogu bilinciamu buliñoaluoditi leni a buliñoadasaalieda, ki ŋabi a leni yaa daagu n poandi ki luondi, ki bugi ki gedi nni li kuli hali yaa juali n se ki tiegi Hebiron yuli po.

Yaa pua n yi Dalila janbi Samison

⁴ Gasa yaa bontienkaala puoli, Samison go den bua puotoa Soleki joaloangu nni. O den yi Dalila.

⁵ Filisiti yaaba yudanba den gedi o pua yeni kani, ki yedi o: «Ŋan moandi ki bandi o gbanmanciamu yeni n ñani naani leni lan baa gaa maama tin fidi ki paadi o. Yeni, ti baa loli o ki paadi o. Ti siiga yuakuli baa teni a tudili n kujapiena kobiga.»

⁶ Lani, Dalila den yedi Samison: «N mia ŋa ŋan waani nni a gbanmanciamu yeni n ñani naani leni lan baa gaa maama o nilo n fidi ki loli a ki paadi a.»

⁷ Samison den yedi o: «Bi yaa taa dabanbaabilele yii n daa kuodi, ki loli nni, n baa tadigi ki tua nani joa kuli n tie maama.»

⁸ Lani, Filisiti yaaba den cua ki teni Dalila dabanbaabilele yii n daa kuodi, ke o loli Samison leni yi.

⁹ Li den sua ke bi niba wuo o pua yeni dieli nni ki guu. O den yedi o: «Samison, Filisiti yaaba baa ŋa.» O den cie i dabanbaabi yeni nani u mu n sii yaa suobu yeni. Baa den bandi o gbanmanciamu yeni n ñani naankani.

¹⁰ Dalila go den yedi Samison: «Diidi ki le, a jeli leni nni ki pua nni mi faama. Moala n mia ŋa ŋan ji waani nni ban baa loli a leni yaala.»

¹¹ O den yedi o: «Bi yaa taa i baabipaani, ban daa loli yii bonliba kuli, ki loli nni, n baa tadigi ki tua nani joa kuli n tie maama.»

¹² Dalila den taa i baabipaani ki loli o ki yedi o: «Samison, Filisiti yaaba baa ŋa.» Li den sua ke bi niba wuo li dieli nni, ki guu. Ama Samison den cie yaa baabi n luo o buadi nani i gaalifani yeni.

¹³ Dalila go den yedi Samison: «Hali moala a jeli leni nni ki pua nni mi faama. Ŋan waani nni ban baa loli a leni yaala.» O den yedi o: «A yaa luni n yupianleleedi ke yi kua i gaalisiedi nni nani u suobu yeni, ki kpaa leni ku naasaagu, n baa tadigi ki tua nani joa kuli n tie maama yeni.»

¹⁴ Dalila den teni ke Samison guani, ke o taa o yupianleleedi ki kuani i gaalisiedi nni nani u suobu yeni, ki kpaa leni ku naasaagu. Li yaa puoli, o den yedi o: «Samison, Filisiti yaaba baa ŋa.» O den fundi ki fii ki ñani ku naasaagu nni, ki ŋabi ti lugididaadi ki taa leni li tanfuukaali kuli.

¹⁵ Dalila den yedi o: «A baa gaa lede ki yedi ke a bua nni, ki naa pia n po dugidi? Diidi taalimitaa nne ke a jeli leni nni, ki boandi nni, kaa wani nni a gbanmanciamu yeni n ñani naankani.»

¹⁶ O den tigini o ki buali o daali kuli, ki miabi o boncianla hali ke o ban coagi ki gbali li juunli.

¹⁷ Lani, o den waani o leni o pali kuli, ki yedi o: «Pengu daa maani n yuli po, kelima n tie yua n gagidi U Tienu po, hali n naa tugu nni. Bi yaa kuo n yudi, n fidu baa gbeni, n baa tadigi ki tua nani joa kuli n tie maama yeni.»

¹⁸ Dalila n den laa ke o maadi leni o leni o pali kuli, o den soani ke bi ban yedi Filisiti yaaba yudanba: «Yin ji cua mani ne, kelima sanu ne, o maadi leni nni leni o pali kuli.» Lani, Filisiti yaaba yudanba den cua o kani, ki kubi i ligi.

¹⁹ O den teni ke Samison maani o yuli o pana po ki guani. Lanwani, o den yini jayendo ki teni ke o kuo Samison yupianleleedi. Yeni, o den cili ki paadi o, kelima o fidu den gbeni.

²⁰ O den yedi o: «Samison, Filisiti yaaba baa ŋa.» O den fundi ki yedi: «N didi baa ña nani kpiama.» Waa den bani ke o Diedo ŋaa o.

²¹ Filisiti yaaba den cuo o ki fiadi o nuni. Bi den gedini o Gasa dogu, ki loli o leni ti kumoandi kuseseli ki teni ke o naani li naali li kpaadidieli nni.

²² Ama ban den kuo o yudi yaadi yeni go den cili ki bundi.

Samison kuuma

²³ Filisiti yaaba yudanba den taani ki baa padi bi bulo Dagon li padicianli, ki mangi bi pala. Bi den tua: «Ti bulo taa ti yibali Samison ki tieni ti nuu nni.»

²⁴ Bi niba n den laa o, bi den kpiagi bi bulo ki yedi: «Ti bulo taa ti yibali ki tieni ti nuu nni, wani yua n den bolindi ti dogi, ki kpaani ti niba boncianla.»

²⁵ Nani bi pala n den mangi boncianla maama po, bi mia ke ban cuani Samison wan jeli bi po ku jeligu. Lani, bi den ñani Samison li kpaadidieli nni, ke o tieni bi po ku jeligu. Bi den sieni o ban den ye yaa doangu nni benjieli siiga.

²⁶ Lani, Samison den yedi yaa jawaalo n kubi o nuu ki dia o: «Ŋan teni min sii i benjieli yii n kubi ku doangu, ki baa ki deni yi.»

²⁷ Li den sua ke bi jaba leni bi puoba n gbie ku doangu. Filisiti yaaba yudanba kuli den ye likani. Yaa jaba leni yaa puoba mo n den ye ku doangu tanpoli ki diidi Samison jeligu den pundi niba tudataa (3 000).

²⁸ Lani, Samison den jaandi ki mia o Diedo ki yedi: «Li Miali Diedo U Tienu, n mia ŋan tiadi n po. Fini U Tienu, ŋan pa nni u fidu sanu ne bebe, ke min baa ki tuu Filisiti yaaba n nunliedi panli yenma.»

²⁹ Lanyogunu, Samison den gobini siiga nni benjieliedi yii n tugi ku doangu, ki tudi yi leni u fidu. Yendu den ye o jienu, u lielu mo o ganu.

³⁰ O den yedi: «Min kpe leni Filisiti yaaba.» O den buani ki tudi leni o fidu kuli, ke ku doangu baa Filisiti yaaba yudanba leni yaa niba n ye ku niinni kuli po. Wan den kpa yaaba o kuuma daali yeni den yabi ki cie wan den kpa yaaba o miali dana nni.

³¹ O naataani leni o baadiegu yaaba kuli den cua ki taa o. Bi den kuninni o ki ban piini o o baa Manoa kuli nni, Tisoreya leni Esitaoli siiga. Samison den tua Isidayeli yaaba gobidika hali bina piilie.