Bi Bujiaba 14 - U TIENU MAAMA TILI 2013

Samison ŋoadi o pua Filisiti yaaba siiga

¹ Dayenli Samison den gedi Timina dogu nni, ki laa Filisiti yaaba bisiaba siiga jafanyendo.

² O den lebidi ki kuni ki ban yedi o baa leni o naa: «N ban laa o jafaano Timina po, Filisiti yaaba bisiaba siiga. Yin taa o mani n po.»

³ O baa leni o naa den yedi o: «Naani pua kuli ki ye a kpiiba bisiaba siiga, bi ti buolu kuli siiga, hali ke a baa gedi ki ban taa o pua Filisiti yaaba, yaaba n tie jifola siiga?» Samison den guani ki yedi o baa: «Ŋan taa o n po kelima n yama kua o yaa niinne.»

⁴ O baa leni o naa, naa den bani ke laa bonla ñani o Diedo kani, kelima o den lingi li koanli leni Filisiti yaaba. Lanyogunu Filisiti yaaba n den die Isidayeli yaaba.

⁵ Samison den yegi leni o baa leni o naa ki caa Timina. Ban den pundi Timina yaaba duven tiidi kuani kani, li yangbanbili den togidi Samison ki bieni.

⁶ O Diedo Fuoma den kua o niinni, ke o cuo o yangbanlo yeni leni o nii, ki dadi ki padi o nani wan baa dadi ki padi ki ŋuabiga maama yeni, ki naa kubi liba kuli. Ama waa den waani o baa leni o naa wan tieni yaala.

⁷ O den jiidi ki pundi ki boe leni o jafaano yeni, ke o yama kua o niinni.

⁸ Lan den tieni dana, o den guani Timina po ki baa n taa o pua yeni. Wan den caa, o den jadi ke o baa le wan den kpa yaa yangbanlo yeni. O den sua ke i naakpansii ye o niinni, ki pia ti siadi.

⁹ O den ñani ti siadi ki muubi o nuu nni, ki cuoni ki di. Wan den pundi o baa leni o naa kani, o den puni ba ke bi mo dini. Ama waa den waani ba ke o ñani laa siadi yangbankpiemo niinni.

Samison telini u telinbundiko

¹⁰ Samison baa den gedi o jafaano yeni denpo. Samison den tieni mi puocaajiema likani, kelima bi jawaaba den maani ki tiendi yene.

¹¹ Filisiti yaaba n den laa o, bi den mia jawaaba piitaa ban yaa ye leni o.

¹² Samison den yedi ba: «N baa telini yi po u telinbundiko. Yi yaa fidi ki bandi bun bua ki yedi yaala ki bundi n po mi puocaajiema daleleeda ne siiga, n baa lani yi liadibimu piitaa leni badiliada piitaa.

¹³ Ama yi yàá fidi ki bundi n po, yinba n baa teni nni liadibimu piitaa leni badiliada piitaa.» Bi den yedi o: «Telini a telinbundiko tin gbadi.»

¹⁴ Lanwani, o den yedi ba: «Li bonjekaala ñani yua n di niinni, Yaala n mani ñani o gbanmandaano niinni.» Bi den pua danataa kaa fidi ki bundi laa telimu.

¹⁵ Li danaali daali bi den yedi Samison pua: «Moandi a calo n bundi a po u telimu yeni, lani yaa ka ti baa juu ŋa, fini leni a baadeni yaaba kuli. Naani yi yini ti ki bua ki fie tin pia yaala yo?»

¹⁶ Lane Samison pua den buudi o kani ki tua: «A nani nne, ŋaa bua nni. A telini n buolu po u telimu, ki naa bundi u n po.» O den guani ki yedi o: «Mii bundi u n baa bi n naa po. N ji baa bundi u a yaa po yo?»

¹⁷ Bi badu daleleeda yeni kuli nni, o den buudi Samison kani. Li daleleeli, o den bundi o po u telimu yeni, kelima o den yagini o yama boncianla. Lani, o pua yeni den waani o buolu yaaba u telimu yeni bundima.

¹⁸ Li daleleeli, hali ke u yienu daa kua, u dogu yaaba den yedi Samison: «Be n mani ki cie ti siadi. Be n pia u fidu ki cie o yangbanlo?» Lani, o den yedi ba: «Yi yàá bi juogi leni n toginaa, yi kan bi bandi n telimu bundima.»

¹⁹ O Diedo Fuoma den kua Samison niinni, ke o gedi Filisiti yaaba dogu, yuu n yi Asikalon po. O den kpa likani jaba piitaa, ki taa bi tiadi ki teni yaaba n den bundi u telimu bi baditiadi. O pali den beni boncianla ke o lebidi ki kuni o baa denpo.

²⁰ Bi den taa o pua ki teni wani Samison puotaadanli.