Bi Bujiaba 12 - U TIENU MAAMA TILI 2013

Efrayimi buolu koani leni Jefite

¹ Efrayimi buolu den taani. Bi den duodi Jurden ki gedi Safoni dogu nni, ki ban yedi Jefite: «Be yaa po ke a gedi ki ban tuogi leni Anmoni buolu bu toabu, kaa yini ti ke ti yegi leni a? Ti baa taani ki juu fini leni a diegu kuli.»

² Jefite den guani ki yedi ba: «Mini leni n niba den baa mi janjanma leni Anmoni buolu. N den yini yi, ama yii den faabi nni bi nuu nni.

³ Min den sua ke yii kpendi, n den luni n miali, ki gedi ki ban tuogi leni Anmoni buolu bu toabu, ke o Diedo taa ba ki tieni n nuu nni. Lanwani, be yaa po ke dinla yi cua ki baa tuogi leni nni bu toabu?»

⁴ Jefite den taani Galaadi jaba kuli, ki tuogi leni Efrayimi yaaba bu toabu ki paadi ba, bani yaaba n den tua: «Yinba Galaadi yaaba, yi tie yaaba n sani ki ñani Efrayimi buolu siiga, ki kua Manase buolu siiga.»

⁵ Galaadi buolu den jia Efrayimi buolu u kpenu Jurden duona kani. Efrayimi yua yua n sani sani ki ban cua ke o baa duodi, bi yen buali o: «A tie Efrayimi buolu yua bi?» O yaa guani ki yedi: «Aa-a,»

⁶ bi yen yedi o: «Yedi Shiboleti.» Omo n yedi: «Siboleti,» kelima o kan fidi ki taa ki tegini. Lanwani, bi yen cuo o ki kodi o, ki kuu Jurden duona kani. Lanyogunu Efrayimi buolu piinaa n niba tudalie (42 000) den bodi.

⁷ Galaadi yua Jefite den tua Isidayeli yaaba gobidika, hali binaluoba. O den kpe ke bi piini o Galaadi dogi siiga doyendu nni.

Ibitisani, Elon leni Abidon

⁸ Jefite puoli, Betelemi yua Ibitisani den tua Isidayeli yaaba gobidika.

⁹ O den mali bonjala piitaa leni bonpola piitaa. O den kandi ki ŋaa o buolu, ki puni o bisiaba buotoe nni, ki taa o bijaba moko yaa po buotoe yaa bonpola. O den tua Isidayeli yaaba gobidika binalele.

¹⁰ O den kpe ke bi piini o Betelemi.

¹¹ Ibitisani yaa puoli, Sabuloni yua Elon den tua Isidayeli yaaba gobidika, hali bina piiga.

¹² O den kpe ke bi piini o Ayaloni dogu nni, yuu n ye Sabuloni diema nni.

¹³ Hebiron yaa puoli, Pilatoni dogu yua Hileli bijua Abidon den tua Isidayeli yaaba gobidika.

¹⁴ O den mali bonjala piinaa, ki baa yaabila piitaa. Bi den jagi ŋunbi piilele. Abidon den tua Isidayeli yaaba gobidika binanii.

¹⁵ O den kpe ke bi piini o Pilatoni dogu nni, Efrayimi diema nni, Amaleki buolu juali po.