Age Tili 1 - U TIENU MAAMA TILI 2013

O Diedo puogi ban guani ki maa o diegu 1.1—2.9 U Tienu diegu guamaama yogunu pundi

¹ Dariyusi bali binlieli, ciluoba dakpiali daali, o Diedo den maadi leni o saawalipualo Age. O den soani o Juda guveneeri Salitieli bijua, Sorobabeli kani leni bi kopadicianba bado Yehotisadaki bijua Josue kani, ke wan yedi ba,

² ke wani Li Miali Diedo U Paaciamu Kuli Daano yedi yaa maama n tie ne: «Yaa nibuolu n tie ne tua ke ban baa guani ki maa o Diedo diegu yaa yogunu daa pundi.»

³ Lani yaa po, o Diedo den soani o saawalipualo Age bi kani ki yedi yaa maama n tie ne:

⁴ «Naani yi sua ke li dagidi yin yaa ye Yaa dieŋama n pia mi ñuadima nni, Ke n yaa Diegu nan mudi mudi ki se diejengu?

⁵ Moala Li Miali Diedo U Paaciamu Kuli Daano Yedi yaa maama n tie ne: ‹Kpaagi mani yaa yema n baa yi ne po.

⁶ Yi buu boncianla, ama yi yendi waamu. Yi di, ama yi naa guodi. Yi ñu, ama yi ñuñuunu naa gbendi. Yi bobi ti tiadi, ama yi wadi naa gbendi. Yua n tuuni ki gaani i panpaani Li tie nani o ŋu yaa boagili n cibi nni yene.

⁷ Li Miali Diedo U Paaciamu Kuli Daano go yedi yi, Ke yin kpaagi yaala n baa yi ne po.

⁸ Do mani a juana po ki ban pedi ti daadi, Ki tugi ki cuani, ki maa n diegu. Lani, n pali baa yaa mani, Min waani yi n kpiagidi. Mini o Diedo n yedi yeni.

⁹ Yi den daani ke yi baa baa Ti kpaandi boncianla, Ama yi baa waamu bebe. Yin tugi lani mo ki kuni nni yi denpo, N piebi ke limo yadi yadi. Be yaa po ke n tieni laa bonla? Li tie ke n Diegu mudi mudi ki se diejengu, Ke yi siiga yuakuli nan moandi ki ŋanbidi o dieceli. Li Miali Diedo U Paaciamu Kuli Daano n yedi yeni.

¹⁰ Li tie lani yaa po yo ke taaga ki mini, Ke liba mo kuli ki pudi.

¹¹ N teni ke u yialu cua mi diema nni, Ke a juana yula po, i kuani, Duven tiidi, Olivie tiidi leni yaa bonbulikaala n sieni kuli kuodi. Bi niba leni ti yandi laa fala lipo, Kelima yin duoli ki baa yaala kuli bia fanma.› »

Isidayeli yaaba tuo ki ŋoadi o Diedo maama

¹² Salitieli bijua Sorobabeli leni Yehotisadaki bijua, bi kopadicianba bado Josue leni yaa niba n sieni kuli den tuo ki ŋoadi o Diedo, bi Tienu maama. Bi den tuo ki ŋoadi ma nani o Diedo bi Tienu n den soani o saawalipualo Age ke o cua ki caa ba maama. Li fangili den cuo ku niligu kuli o Diedo nintuali.

¹³ Li yaa puoli, U Tienu tondo Age den caa ba o Diedo tondu, yuu n tie ne: «N baa yaa ye leni yi, mini o Diedo n yedi yeni.»

¹⁴ O Diedo den libidi Juda guveneeri Sorobabeli leni bi kopadicianba bado Josue leni yaa niba n sieni kuli yama, ki paagi bi pala o diegu maama po. Bi den fii ki cili ki maa Li Miali Diedo U Paaciamu Kuli Daano diegu,

¹⁵ Dariyusi bali binlieli, ciluoba piilie n danaali daali.