2 Tesaloniki 3 - U TIENU MAAMA TILI 2013

I tundi u tagiŋamu po 3 Yaa miadi mani U Tienu ti po

¹ Ti kpiiba, ti majuodikaama tie mine: Yaa miadi mani U Tienu ti po, ke o Diedo maama n suagi liiga ki yadi, bi niba n jigini ma nani lan tie yi siiga maama.

² Yin go yaa miadi o, wan faabi ti leni bi nibiadiba leni yaaba n bia ke li kandi, kelima bi niba kuli ka tuo li dandanli.

³ Ama o Diedo tie tin fidi ki dugi yua yaa po. O baa teni yin yaa se ke li pa bonŋanla, ki kubi yi ke o Biado n da paadi yi.

⁴ Ti pia yi po laa dugidi o Diedo nni, ke yi tiendi ki go baa yaa tiendi tin den puogi yi yaala kuli.

⁵ O Diedo n gobidi yi yantiana, yin yaa pia U Tienu buama leni Kilisiti yaa juunli.

Li tuonli tie tiladi nilo kuli po

⁶ Ti kpiiba, ti Diedo Jesu Kilisiti yeli nni, ti waani yi ke yin paadi leni yi kpiiba yaaba n tie kpadijedanba, kaa ŋua tin bangi yi yaa bangima.

⁷ Yinba yi ba bani lan pundi yin yaa togidi ti maama. Tin den ye yi siiga, tii den yie a tuona.

⁸ Tii den di oba kuli jiema fanma fanma, ama ti den tuuni li tuonli u yensiinu leni ku ñiagu kuli, ki laadi fala ke ti yema n da tua oba kuli po tugili.

⁹ Laa tie ke tii den pia li bali ka, ama ti den tiendi yeni, kelima ti den bua ki ŋaa yi po li bontogidikaala.

¹⁰ Tin den ye yi siiga, ti den waani yi line: «Yua n ki bua ki soani, n da je moko.»

¹¹ Ti maadi yeni, kelima ti gba ke yi siiga bi nitianba yie kaa tuuni tuonliba kuli, ama ki goadi leni bu tingbangbaabu.

¹² Ti waani ki tundi laa niba o Diedo Jesu Kilisiti yeli nni, ke ban yaa tuuni li tuonli leni mi yansoangima, ki baadi bi jiema.

¹³ Ti kpiiba, yin da coagi leni a tuonŋama tienma.

¹⁴ Yi yaa sua ke niloba ki tuo ki ŋua tin bili yi po yaala li naa tili nni, yin faami o po ki da pia ŋantaadoba leni o, ke i fe n cuo o.

¹⁵ Yin da nua o ke o tie yi yibali ka, ama yin yaa nua o ke o tie yi kpiilo, ki tuo ki tundi o.

I fuondijuodike

¹⁶ Mi yanduanma Diedo, wani o ba n yaa puuni yi mi yanduanma u yogunu kuli yi yema buoli kuli nni. Wani o Diedo n yaa ye leni yikuli.

¹⁷ Mini Poli n diani yaa fuondi n tie ne leni n nuceli. Min diani yaa tila kuli, n tiendi n maalima yeni. Lani n tie min dangi maama.

¹⁸ Ti Diedo Jesu Kilisiti yaa ŋanbili n yaa ye leni yikuli.