2 Tesaloniki 2 - U TIENU MAAMA TILI 2013

Kilisiti guacuama 2 Yaala n baa tieni ke o Diedo daa cua

¹ Ti kpiiba, yaala n tie o Diedo Jesu Kilisiti cuama leni tin baa taani o kani maama, ti mia yi,

² yin da tuo laa bonla n jaligi ki lengidi yi yantiana. Yin da tuo lan jieni yi leni yaa maama n naani leni saawali maama, bi maamiba, bi ke tiliba ñani ti kani, ki maadi ke o Diedo daali pundi.

³ Yin da tuo oba kuli n boandi yi, ba lan tie yaala kuli, ki yedi ke laa daali pundi. Laa daali kan cua, se mi dandanyiema n kpa cua, ke mi biadima daano n doagidi, wani yua n baa gedi mi bodima po yeni.

⁴ O baa fiini o yuli ki yie bi niba n nua yaala nani li tie U Tienu yeni, bi ban kpiagidi yaala kuli. O baa kua ki kali hali U Tienu diegu nni, ki yini o yuli U Tienu.

⁵ Yii tiani ke n den waani yi lani kuli min den ye leni yi yaa yogunu yo?

⁶ Yi bani yaala n yie o po ke wan da doagidi hali o yogunu n pundi.

⁷ Ba moala mi biadima yeni ye ŋasiili nni ki tuuni mi tuonli. Li da baa yaa tie yeni hali yua n yiedi mi po n ti ña likani.

⁸ Lanyogunu, mi biadima daano baa doagidi, o Diedo Jesu n baa bolini yua leni o ñoabu fawaama. O cuama kpiagidi baa biidi o tuonli cain.

⁹ Sutaani paalu baa teni mi biadima daano yeni n cua leni mi bancianma, sinankeeninba leni mi faama bonlidinkaala buoli kuli.

¹⁰ O cuama go baa yegi leni mi biadima boandi kuli, ki boandi yaaba n baa bodi, kelima baa den bua i moamoani, yii n den baa pa ba mi faabima.

¹¹ Li tie lani yaa po yo ke U Tienu baa soani bi kani yaa paalu n baa yaani ba, ban yaa daani mi faama.

¹² Yeni yaaba n naa den tuo ki ŋoadi i moamoani, ama ki mangidi bi pala leni mi biadima kuli, U Tienu baa bu ki cuo ba.

U Tienu gandi ki faabi yi

¹³ Ti kpiiba, o Diedo buakaaba, li pundi tin yaa tuondi U Tienu yi po yogunu kuli. O den gandi yi hali mi cilima mi tindima po, kelima o Fuoma yaama n gagidi ki ŋanbidi po leni li dandanli i moamoani nni yaa po.

¹⁴ U Tienu den yini yi lani kuli po, kelima tin den waani yi yaa Laabaaliŋamo po, ke yin baa yi biinu ti Diedo Jesu Kilisiti kpiagidi nni.

¹⁵ Lani yaa po, ti kpiiba, yaa se mani ke li pa, ki ŋua tin den bangi yi yaala kuli, li yaa tie tin den maadi yaala leni ti ñoana leni tin den diani yaala li tili nni kuli.

¹⁶ Ti Diedo Jesu Kilisiti wani o ba leni ti Baa U Tienu yua n den bua ti, ki puni ti kelima o ŋanbili po yaa baagi n ki pia gbenma leni yaa suginma n ŋani,

¹⁷ n yaa baagidi yi pala ki teni yin yaa se ke li pa yaala n ŋani tienma nni leni mi maama kuli nni.