2 Tesaloniki 1 - U TIENU MAAMA TILI 2013

Mi macilikaama leni ti pagidi 1 I fuondi

¹ Mini Poli, Silasi leni Timote n diani li tili Kilisiti Nitaanli yaali n ye Tesaloniki, ki ye U Tienu ti Baa leni o Diedo Jesu Kilisiti nni.

² U Tienu yua n tie Baa leni o Diedo Jesu Kilisiti, n pa yi li ŋanbili leni mi yanduanma.

Tesaloniki yaaba moandili

³ Ti kpiiba, li pundi tin yaa tuondi U Tienu, kelima yi po yogunu kuli. Li dagidi tin yaa tiendi yeni, kelima yi dandanli yabidi ki pugidi boncianla, yi buama yiyaba po mo yabidi ki pugidi.

⁴ Ba yin laadi yaa fala leni yaa yebiadima kuli, ti kpiagidi ti yula U Tienu Nitaana nni, kelima yi juunli leni yi dandanli po.

⁵ Likuli tie siedi ke U Tienu buudi tiegi. O sua ke yi dagidi U Tienu diema po, yin laadi fala moala yaama yaa po.

⁶ U Tienu nua ke li tiegi ke wan faligi yaaba n faligidi yi moala.

⁷ O baa taani ki pa tinba leni yinba yaaba n laadi fala mi fuodima, o Diedo Jesu yaa ñani tanpoli po leni o malekinba yaaba n pia u paalu, ki doagidi o yuli yaa daali.

⁸ O baa doagidi u mupienu nni, ki pa yaaba n kaa bani U Tienu leni yaaba n kaa tuo ki ŋoadi ti Diedo Jesu yaa Laabaaliŋamo, bi biadima panpaani.

⁹ Bi buudi baa yaa tie yaa bolinma n ki pia gbenma. Bi baa paadi cain leni o Diedo nunga leni o kpiagidi paalu,

¹⁰ wan cua yaa daali ki baa baa ti kpiagidi o nigagidiŋanba siiga, ke yaaba n daani o kuli mo n ñuadi o ŋamu. Yimoko baa ye bi siiga, kelima yi den daani ti siedo.

¹¹ Li tie lani yaa po ke ti miadi U Tienu yi po yogunu kuli, ke wan teni yin dagidi wan yini yi yaala yaa po. Ti go miadi o ke wan teni yin yaa tiendi wan jagi yin tieni yaa ŋanma kuli leni li dandanli tuonli, kelima o paalu po.

¹² Yeni ti Diedo Jesu yeli baa baa ti kpiagidi yi siiga, ke yimo n baa ti kpiagidi kelima o po, nani ti Tienu leni ti Diedo Jesu Kilisiti ŋanbili n tie maama.