2 Samueli 6 - U TIENU MAAMA TILI 2013

Davidi jagi ke o baa guani o Diedo kpaku Jerusalemi

¹ Davidi go den taani Isidayeli yaaba jakoanda kuli, ke bi coali pundi tuda piitaa.

² Lanwani, Davidi leni yaaba n den ye leni o kuli den fii ki gedi Baale-Juda, ki baa n taa U Tienu kpaku likani, ki guani gu Jerusalemi. Laa kpaku tie ban taagi Li Miali Diedo yeli ki miadi o naani, wani U Paaciamu Kuli Daano yua n kaa o bali kalikaanu selubanba siiga, ku kpaku yeni yuli po.

³ Ku den ye Abinadabi diegu nne li juali po. Bi den taa ku ki maani ku telipangu po, ki ban caa. Abinadabi bijaba Usa leni Ahiyo den gobidi ku teligu yeni.

⁴ Usa den cuoni ki baali U Tienu kpaku, Ahiyo mo den cuoni ku liiga.

⁵ Davidi leni Isidayeli yaaba kuli den pua baantiabuolu kuli o Diedo nintuali. Li den sua ke bi taa sipre tiidi daadi ki kpie a gangaana, a gogididajena, i sasagi, mu lonmu leni ban den tieni yaa kupandi. Bi den taani ki pua li kuli.

⁶ Ban den pundi Nakoni jalu kani i ne den ŋadi ke U Tienu kpaku kpegini. Usa den tandi o nuu ki muubi ku ke kun da baa.

⁷ Lani yaa po, o Diedo pali den beni Usa po ke o den kpa o lankani kelima o tagili po. Usa den kpe lankani ki kuu U Tienu kpaku.

⁸ Davidi pali den biidi leni o Diedo n kpa Usa. Bi den yini u kaanu yeni Peretisi-Usa. U baa ki yi yene hali dinla.

⁹ Davidi den jie o Diedo landaali ki yedi: «O Diedo kpaku baa gaa lede ki kua n deni?»

¹⁰ Waa go den bua ki kuani o Diedo kpaku o deni, wani Davidi n ye yaa kaanciamu nni. O den teni ke bi gedini ku Obedi-Edomi, yua n den tie Gati yua, yaa denpo.

¹¹ O Diedo kpaku den tieni ŋmaalitaa Gati yua, Obedi-Edomi deni. O Diedo den seligi Obedi-Edomi leni o deni yaaba kuli.

¹² Bi den cua ki yedi o bado Davidi ke o Diedo seligi Obedi-Edomi deni yaaba leni wan die yaala kuli, kelima wani U Tienu kpaku po. Lani, Davidi den gedi Obedi-Edomi denpo ki ban taa U Tienu kpaku yeni, ki baa gedini ku wani Davidi kaanciamu kani. U sanu nni, yaaba n den yegi leni ku den tieni u badu kelima bi pamanli po.

¹³ Yaaba n den tugi o Diedo kpaku yeni yaa den yaagi taayaagidiluoba, Davidi yen padi naatonli leni naabiŋaandili.

¹⁴ O den jeli leni o fidu kuli o Diedo nintuali ki la yaa kopadician-liadibiga n tie cabilakaali ki luni leni len gaali.

¹⁵ Davidi leni Isidayeli yaaba kuli den gedini o Diedo kpaku, ki kpaani leni li pamanli, ki piebi kakacinba.

¹⁶ O Diedo kpaku n den cuubi ki baa kua Davidi kaanciamu nni yaa yogunu, Davidi pua Mikali, Sayuli bisalo den diegi li diebonli kani ki nuali. Wan den laa ke o bado Davidi yugi ki ciini, ki jeli o Diedo nintuali, o den fali o o pali nni.

¹⁷ Ban den cuani o Diedo kpaku, bi den bili gu ku kaanu, Davidi n den kpaa ku po yaa gbandieli yaa tugu nni. Davidi den padi a padijuukaana leni i jaandi pada o Diedo po.

¹⁸ Wan den padi a padijuukaana leni i jaandi pada ki gbeni, o den taa Li Miali Diedo U Paaciamu Kuli Daano yeli, ki gaali bi niba kuli.

¹⁹ Li yaa puoli, o den boagidi bi niba kuli, Isidayeli nigola yeni kuli, bi jaba leni bi puoba, nilo kuli dupenyendo leni nanjenyenli, leni duventiidi yaa bonluonkaala bonkonyenli. Lani, bi niba kuli den yadi, ke yuakuli kuni o denpo.

²⁰ Davidi moko den kuni ki baa n gaali o diegu nni yaaba. O pua Mikali, Sayuli bisalo, den ñani ki tuogi o ki yedi: «Dinla, fini Isidayeli diema bado bi baa ti kpiagidi de, ŋan bi landi a tiadi ki se benbili nani yaa joa n ki pia fuoma ke a naacenba puotuada nua ŋa yeni.»

²¹ Davidi den guani ki yedi Mikali: «O Diedo yaa kpiagidi po yo ke n tieni yeni, wani yua n gandi nni ki ŋaa a baa leni o diegu nni yaaba kuli, ki dini nni li bali ke n gobidi o Diedo niba Isidayeli yaaba. N go baa jeli ki doagidi n pamanli wani o Diedo yaa kpiagidi po.

²² N go baa wadi n yuli ki cie ba yeni, mini n ba, n baa diidi ke mii tie liba, ama ba yeni, ŋan maadi yaa puotuada yaa maama yeni baa kpiagi nni.»

²³ Lani, Mikali, Sayuli bisalo yeni, ki den baa biga hali wan ban kpe.