2 Samueli 4 - U TIENU MAAMA TILI 2013

Baana leni Rekabi kpa Isi-Boseti

¹ Sayuli bijua Isi-Boseti n den gbadi ke Abineri kpe Hebiron po, o gbanu den wudi, i jeje den cuo Isidayeli yaaba kuli boncianla.

² Isi-Boseti den pia toatieyudanbilie. Yendo den yi Baana, o lielo mo Rekabi. Bi den tie Benjamen buolu yua, yua n yi Rimon ki ñani Beeroti dogu bijaba.

³ Bi niba den nua ke Beeroti tie Benjamen buolu n die yaa dogu. Beeroti yaaba den sani ki gedi Gitayim ki ban kali, ki baa ki ye lipo hali dinla.

⁴ Sayuli bijua Jonatan den pia o bijua ke o yi Mefiboseti, ki tie wabo. Sayuli leni Jonatan kuuma laabaalo n den ñani Yisireyeli po ki cua, li den sua ke o pia binamuu. O wubido den taa o ki sani ke o ŋmadi ki baa ki wabi.

⁵ Beeroti yua Rimon bijaba Rekabi leni Baana den gedi Isi-Boseti denpo u yensiicocolu. O den dua ki fuo mi yensiifuodima.

^6-7 Bi den kua li dieli tugu nni nani bi baa taa ŋalikama yeni, ki sua ke o dua o dieduadili nni. Bi den muu o tugu nni ki kpa o, ki jia o yuli ki taa ki sani. Bi den dua ki cuoni ki poandi u tialu nni.

⁸ Bi den gedini Isi-Boseti yuli Hebiron dogu, Davidi kani ki yedi o: «Sayuli bijua Isi-Boseti, a yibali nne, wani yua n den bua ki ñani a miali. Dinla o Diedo tuu fini n daano o bado po li panli Sayuli leni o puoliŋuani kani.»

⁹ Davidi den taa o Diedo yua n faabi o o fala nni yeli, ki poli ki yedi Beeroti yua Rimon bijaba, Rekabi leni o naataanu Baana: «Hali o Diedo po,

¹⁰ yua n den cua ki waani nni ke Sayuli kpe ki tama ke o puni nni laabaalimano, n den teni ke bi cuo ki kpa o Tisikilagi dogu nni. N den tieni yeni ki pani o o laabaalimano panpaani.

¹¹ Lanwani, bi nibiadiba yaa kua yaa nilo n ki pia tagili dieli nni ki kpa o o duanu po, li baa gaa lede ke n kan buali yi o soama? N baa bolini yi mi tinfanma nni.»

¹² Davidi den teni o toatieba li ñoamabonli ke ban kpa Rekabi leni Baana. Bi den kpa ba, ki jia bi nufaadi leni bi taafaadi ki joani ti ki kuu Hebiron boangu. Bi den taa Isi-Boseti yuli mo ki piini li Hebiron, Abineri kuli nni.