2 Samueli 21 - U TIENU MAAMA TILI 2013

Gabaon yaaba leni Sayuli puoliŋuani

¹ Davidi n den tie bado yaa yogunu, mi koma den tieni ki waagi hali binataa. Davidi den mia o Diedo ki buali o lan tie yaala. O Diedo den guani ki yedi: «Li tie Sayuli leni o diegu nikpali po yo ke mi koma tieni, kelima Sayuli den kpa Gabaon yaaba.»

² O bado Davidi den yini Gabaon yaaba ki baa maadi leni ba. To, Gabaon yaaba yeni ki den tie Isidayeli yaaba ka. Bi den tie Amoriti yaaba, yaaba n sieni ke Isidayeli yaaba den poli ki niani ba ke bi kan sii ba. Ama Sayuli n den pia yaa yankuakandikaali Isidayeli leni Juda yaaba po, den teni ke o moandi ke o baa bolini ba.

³ Davidi den buali ba: «N baa tieni yi po be? N baa tieni lede ki ŋanbi ban biidi yi po yaala yin gaali o Diedo niba?»

⁴ Gabaon yaaba den guani ki yedi o: «Ligi bi wula ka baa fidi ki guani ki ŋanbi yaala n ye tinba, Sayuli leni o diegu yaaba siiga. Tinba mo ka baa kpa o nilo Isidayeli nni.» Lanwani, o bado den yedi: «Yi nan bua min tieni yi po be yo?»

⁵ Bi den guani ki yedi o: «Sayuli den jagi wan bolini ti cain ki da ŋaa ba yendo leni miali Isidayeli nni.

⁶ Lani yaa po, ban teni ti jabilele o puoliŋuani siiga, ti baa joani ba ki soadi ba U Tienu nintuali, wani o Diedo n den gandi yaa bado Sayuli dogu Gibeya niinni.» O bado den yedi: «N baa teni yi ba.»

⁷ O bado Davidi den cedi Sayuli yaabili Mefiboseti, Jonatan bijua, kelima Davidi leni Jonatan n den loli yaa ŋantaado o Diedo nintuali yaa po.

⁸ Ama o den taa Aya bisalo Litisipa n den mali Sayuli po yaa bonjalieda, Alimoni, Mefiboseti leni Sayuli bisalo Mikali n den mali yaa bonjamuuda Balisilayi bijua Meola yua Adrieli po.

⁹ O den taa ba ki teni Gabaon yaaba. Bi den joani ba ki soadi ba o Diedo nintuali li juali po. Bani nibilele yeni kuli den taani ki kpe yenma. Bi den kpa ba u jetaagu cilima, ban cili ki ce orje yaa yogunu.

¹⁰ Aya bisalo Litisipa, Sayuli kpepuoli den taa li paboanli tiagu ki ladi ku tangu po ki ye likani u jetaagu cilima, ki yaa caa hali ki taaga n ban baa bi tinkpiba yeni po. U yensiinu o den deli ti bonyugiditi ban da nagini a tinkpila yeni, ku ñiagu mo o den deli ti fuayandi.

¹¹ Bi den waani Davidi Litisipa, Aya bisalo Sayuli puonanbangu n tieni yaala.

¹² Li den sua ke Filisiti yaaba n den tuogi leni Sayuli Giliboa ki paadi o ki kpa o, bi den taa wani leni o bijua Jonatan bi tinkpiba ki joani ba Beti-Sani kani. Yabesi yaaba den taa a tinkpila yeni ki gedini Galaadi diema nni. Davidi den gedi ki ban taa Sayuli leni Jonatan kpaba Yabesi yaaba kani.

¹³ O den taa likani Sayuli leni o bijua Jonatan kpaba. Bi go den taani ban den joani bi nileleediba yaaba ki soadi ba yeni moko yaa kpaba.

¹⁴ Bi den piini Sayuli leni o bijua Jonatan kpaba Sayuli baa Kisi kuli nni, Sela dogu nni yuu n ye Benjamen tinga nni. Bi niba den tieni o bado Davidi n yedi ba yaala kuli. Lanwani, U Tienu pali den guani ki jiidi mi diema po.

Mi janjanma leni Filisiti yaaba

¹⁵ Filisiti yaaba go den tuogi bu toabu leni Isidayeli yaaba. Davidi leni o toatieba den gedi ki tuogi leni ba. Davidi den coagi.

¹⁶ Rafa yaabili Jisibi-Benobi den jagi ke o baa kpa Davidi. O den pia yaa kpaanli yaa kpiagu n cie kilo bonbitaa, ki tie kumoandi, ki ñaagi ki jugisiepanga.

¹⁷ Tiseruya bijua Abisayi den cua ki todi Davidi ki pua ki kpa Filisiti yua yeni. Lanwani, Davidi toatieba den poli ki yedi o: «A kan go ña ki yegi leni ti ki gedi toabu, ŋan da ti teni ban bolini li bali Isidayeli nni.»

¹⁸ Li yaa puoli, bu toabu go den fii Gobi dogu nni leni Filisiti yaaba. Laa toabu nni Husa yua Sibekayi den kpa Rafa yaabili Safi.

¹⁹ Bu toabu go den fii leni Filisiti yaaba Gobi yeni. Betelemi yua Jaale-Olegimi bijua Elanani den kpa Gati yua Goliati, yua yaa kpandaagu n den gbengi nani ku lugididaagu yeni.

²⁰ Mi janjanma go den guani ki tieni Gati dogu nni. Yibalinba siiga den pia toatieyendo ke o yabi boncianla, ki pia nibilaluoba luoba leni taajenbilaluoba luoba. Li kuli den taani ki tie piilie n bonanaa. Omoko den tie Rafa buolu yua.

²¹ O den tiani ki sugi Isidayeli yaaba. Lane Davidi naataanjaga Simeya bijua Jonatan den kpa o.

²² Lanwani, Davidi leni o naacenba den kpa bani Filisiti yaaba toatienaadiba yeni. Bikuli den tie Gati yua Rafa yaabila.