2 Samueli 13 - U TIENU MAAMA TILI 2013

Aminoni ñii o waalo Tamari

¹ Diidi yaala n den yuandi ki tieni. Davidi bijua Abisalomi den pia o naataanu ke o tie bonpuoga ki yi Tamari. O den ŋani hali boncianla. Davidi den pia bonjatoaga ke o yi Aminoni. Wani Aminoni yama den kua Tamari niinni.

² Aminoni yama den yagi hali ke o yiagi kelima wan bua o waalo Tamari maama yaa po. Wani Tamari n da ki den bani joa yeni, Aminoni den nua ke o kan baa ki taani leni o faala.

³ Aminoni den pia o danli ke o fani hali bonŋanla ki yi Jonadabi. O den tie Davidi naataanu Simeya bijua.

⁴ O danli Jonadabi den yedi o: «Li gaa lede ke fini ki badibiga dondi nanda tiŋaagu kuli? A kan waani nni?» Aminoni den guani ki yedi o: «N bua n naataanu Abisalomi waalo Tamari.»

⁵ Jonadabi den yedi o: «Ŋan duani ki kpali ke a yia. A baa yaa cua ki baa le ŋa, ŋan yedi o: ‹Teni n waalo Tamari n cua ki tieni n po mi jiema min je. Wan ŋanbi ma ke n nua, ki taa ma wani o ba ki teni nni min je.› »

⁶ Aminoni den duani ki kpali ke o yia. O bado den cua ki baa le o ke o yedi o: «Teni n waalo Tamari n cua ki ŋanbi n po mi jiema waamu ke n nua, ki taa ma wani o ba ki teni nni min je.»

⁷ Davidi den soani ke bi kua ku diegu nni liiga po ki ban yedi Tamari: «Gedi a kpelo Aminoni po ki ban ŋanbi o po mi jiema wan je.»

⁸ Tamari den gedi ki kua o kpelo Aminoni dieli nni, ke omo dua. O den buuni mi yoma ki kondi ki luoni.

⁹ Mi jiema yeni n den beni, o den ŋaadi ki kuodi tiatoagu nni ki sieni Aminoni nintuali. Aminoni den yie ke o kan je ki yedi ke ban ñani bi niba kuli. Bi niba kuli den ñani.

¹⁰ Lanwani, o den yedi Tamari: «Kuani mi jiema yeni n dieduadili nni ne. Fini a baa n taa ma ki teni nni min je.» Tamari den taa mi jiema yeni ki kua ki teni o kpelo Aminoni o dieduadili nni.

¹¹ Wan den taa ke o baa teni o mi jiema yeni, Aminoni den cuo o ki yedi: «Tamari, cua tin taani.»

¹² O den guani ki yedi: «Aa-a, Aminoni, ŋan da fiagi nni, kelima laa bonla kua Isidayeli nni. Da tieni laa cagindi.

¹³ Laa bonla yaa tieni, n baa kua le leni n fe? Amo, bi baa yaa nua ŋa nani o cancaginnilo yene Isidayeli nni. Lanwani, ŋan mia o bado, o kan yie min kuni a.»

¹⁴ Ama Aminoni ki den cengi o maama. O den ñii o leni u paalu.

¹⁵ Li yaa puoli, Aminoni den nandi Tamari. Wan den nani o maama den cie wan den bua o maama. O den yedi o: «Fii ki yaa caa!»

¹⁶ Tamari den guani ki yedi o: «Ki deli nni n baa yaa tie yaa tagili n bia ki cie ŋan tieni nni yaala ne.» Ama Aminoni ki den cengi o maama.

¹⁷ O den yini yaa jawaalo n den tuuni o po ki yedi o: «Ñani ki bonpuoga ne n dieli nni. A yaa ñani o ŋan luoni bu buliñoabu.»

¹⁸ O naacemo den ñani o ki luoni bu buliñoabu. Wani Tamari den laa yaa tiagu n tie tiaŋmadikaagu, o bado bisiaba yaaba n ki bani jaba n yen la yaadi.

¹⁹ O den taa mi fantanpienma ki wuli o yuli po, ki buudi ki kuudi ki ban caa.

²⁰ O naataanu Abisalomi den buali o: «Naani Aminoni ñii ŋa yo? Diidi Tamari, ŋan da yedi liba kuli kelima a kpelo naane. Ŋan da kuani la a pali nni.» Tamari den kali o kpelo Abisalomi diegu nni ki ye nani ban yie yaa pua yeni.

²¹ Davidi den gbadi yaala n tieni ke o pali beni boncianla.

²² Abisalomi ki go den yieni Aminoni liba kuli. Ama o den nani o hali boncianla kelima o den ñii ki biidi o waalo Tamari.

Abisalomi teni ke bi kpa Aminoni ki sani o baa

²³ Binalie n den pendi, yaaba n moagi i pe kobidi den baa moagi Abisalomi po o pe Baali-Atisodi dogu nni, ki kuu leni Efrayimi. O den yini o bado bijaba kuli.

²⁴ O den gedi ki laa o bado ki yedi o: «Bi baa moagi n po n pe. N mia ŋa, fini leni a badibaanba n cua mi jaanma yeni.»

²⁵ O bado den yedi Abisalomi: «Aa-a, n bijua. Ti kuli kan gedi, kelima ti kuli yaa gedi ti baa n tua a po tugile.» Abisalomi den tigini o ke wan gedi, ama o den yie ke o kan gedi. O den gaali o.

²⁶ Abisalomi den yedi: «Cedi ba n naataanu Aminoni wani n nan ciani ti.» O bado den guani ki yedi: «O baa gaa lede ki ciani a?»

²⁷ Abisalomi den mia mia hali ke o bado den cedi ke Aminoni leni o bila yaaba n sieni kuli ciani o.

²⁸ Abisalomi den teni o naacenba li ñoamabonli ki yedi: «Yin yaa kpaagi Aminoni. Mi daama yaa cuo o ke n yedi: ‹Pua mani Aminoni›, yin kpa o. Yin da jie, mini n puogi yi. Yin paagi yi pala ki koani mi jama.»

²⁹ Bi naacenba den tieni Abisalomi n yedi ba yaala ki kpa Aminoni. Lanwani, o bado bijaba yaaba n sieni den fii ki jagini bi buomi ki sani.

³⁰ Hali ke bi da ye u sanu nni ki tiini ki kuni, Davidi den gaa laabaali ke Abisalomi kpa o bijaba kuli, kaa sieni ba yendo leni miali.

³¹ O bado den fii ki padi padi o tiadi, ki bali ki duani tiipo. O badibaanba kuli den ye likani ke bi tiadi padi padi.

³² Davidi naataanu Simeya bijua Jonadabi den yaadi ki yedi: «O bado, ŋan yaa bani ke a bijaba kuli ka kpe, Aminoni bebe n kpe. Abisalomi den jagi laa jagili hali Aminoni n den ñii ki biidi o waalo Tamari yaa daali.

³³ Lanwani, ŋan da kuani a yama nni ki yaa tama ke a bijaba kuli kpe ka. Aminoni bebe n kpe.»

³⁴ Abisalomi den sani. Yaa jawaalo n den se ki diidi yibalinba n da ludi ba den noanli ki laa ke li nigoli tagi o puoli po yaa sanu, ki ji li juali. O den cua ki yedi o bado: «N laa ke bi niba tagi puoli po yaa sanu ki ji li juali ki kpendi ne.»

³⁵ Lanwani, Jonadabi den yedi o bado: «A bijaba n kpendi. Li saa min yedi yaala po moamoani.»

³⁶ Wani Jonadabi n maadi ki jiini yaa yogunu, o bado bijaba den nagini ki pundi. Bi den buudi. O bado leni o badibaanba kuli moko den buudi hali boncianla.

^37-38 Abisalomi den sani ki gedi Amihudi bijua Talimayi, Gesuri diema bado po. O den tieni lipo binataa. Davidi den buudi o bijua po daali kuli.

³⁹ Ama o yama den ti jiidi ke o pali kuugi Abisalomi po leni wan den kpa Aminoni.