2 Korenti 7 - U TIENU MAAMA TILI 2013

¹ N buakaaba, kelima tin pia laa ñoaniani yeni, tin yaa ŋanbidi mani ti yula. Tin yaa ñandi ti gbanandi leni ti yantiali kuli joagindi. Tin yaa tiendi ania ki suagi liiga leni mi gagidiŋanma, hali ki pundi li bianu U Tienu fangili nni.

Poli pamanli

² Pa ti mani u kaanu yi pala nni. Tii biidi oba kuli po, tii guli oba kuli, tii dini oba kuli liba.

³ Mii maadi yeni ki bua ki jaligi yi ka, ama nani min den kpa yedi maama, yi ye ti pala nni, tin fo leni tin kpe kuli.

⁴ N dugi yi po boncianla, n jigini n yuli yi po boncianla, n baa i baagi ke li dagidi. Ba ti falabiado nni kuli, n pia li pamankandikaali.

⁵ Moamoani, hali tin den pundi Maseduani, tii baa fuodima baa waamu. Ti den laa fala buoli kuli, a koana den lindi ti, i jeje mo den ye ti pala nni.

⁶ Ama U Tienu, yua n baagidi yaaba n ye fala nni, den baagi ti leni Titi cuama.

⁷ Laa tie ke o cuama bebe ka den baagi ti, ama wan den baa yi kani yaa baagi den baagi ti. O den togidi ti, yin bua ki guani ki le nni maama leni yi pabiidili leni yi yankuali n po n yabi maama, ki go teni ke lani kuli mangi n pali ki pugini.

⁸ Ba ke n den biidi yi pala leni min den diani yi po yaa tili, mii mua ke n yàá den diani li. Ba n yaa den mua lipo, li tie ke n laa ke laa tili den biidi yi pala u yogunu waamu po yo.

⁹ N pali mani moala. Laa mangi n pali kelima n biidi yi pala ka, ama kelima yi pabiidili den teni ke yi lebidi yi pala. Yi pabiidili yeni tie U Tienu n bua yaa pabiidili buolu. Lanwani, tii biidi yi po liba kuli.

¹⁰ Yeni de! U Tienu n bua yaa pabiidili buolu yeni, yaali n baa cuani mi yanlebidima. Laa yanlebidima n kpendinni mi tindima. Mi kan teni wan ji faa ki mua lipo. Ama ŋanduna yaa pabiidili baa cuani mi kuuma.

¹¹ Diidi mani laa pabiidili, U Tienu n bua yaali yaa buolu yeni, n cuani yaala: Li tigini yi ke yi moandi. Li go cie yeni, kelima li teni ke yi mia sugili, yi pala mo biidi lipo. Li go teni ke ti jawaandi cuo yi, ki teni ke yi go bua ki le nni, ki go teni ke yi baa li yankuali, ki tundi i tagili daano leni tundifala. Yi doagidi li bonla kuli nni, ke yii pia tagili laa bonla nni.

¹² Lanwani, ba ke n den diani yi po li tili yeni, laa tie yua n tudi yaa po, laa tie wan den tudi yua yaa po mo. Ama li tie ke yin puni yi yula ti po maama n doagidi yi siiga, U Tienu nintuali.

¹³ Lani kuli baagi ti. Laa tie ke li baagi ti bebe ka, ama ti pala go den mangi boncianla, kelima ti laa Titi yaa pamanli, kelima yikuli n den duani o yama maama po.

¹⁴ Ba n yaa pagi n yuli waamu yi po Titi kani, mii laa i fe lipo, kelima li doagidi ke min den pagi yi o kani maama tie moamoani, nani tin yen maadi yi yaa maama kuli n tie moamoani maama.

¹⁵ O yaa tiadi yikuli n den gaa o cangu leni li fangili leni mi digibima ki go tuo ki ŋua o maama maama, o buama yi po yabidi ki pugini.

¹⁶ N pali mani ke n baa fidi ki dugi yi po li bonla kuli nni.