2 Korenti 4 - U TIENU MAAMA TILI 2013

Yaa bonmoanla n ye ti tandi tiadi nni

¹ Nani U Tienu n gbadi ti ninñima, ki puogi ti li naa tuonli yeni, ti kan luo papaali.

² Ti yie yaala n pia i fe ki tiendi ŋasiili nni kuli. Tii tiendi liba leni nunfanbiadibu. Tii lu ki lebidi U Tienu Maama baa waamu. Ama ti doagidi i moamoani, ki tendi ke bi niba kuli pala siedi dua ti po U Tienu nintuali.

³ Tin wangi yaa Laabaaliŋamo yaa baa ki duagi, o duagi yaaba n bodi yaa po,

⁴ bani yaaba n kaa daani po. Sutaani, yua n die ŋanduna na, juani bi yantiana, ke ban da le Kilisiti yua n tie U Tienu nannanli yaa Laabaaliŋamo kpiagidi yendima.

⁵ Ti mawangima nni, tii wangi ti yula ka, ama ti wangi Jesu Kilisiti o Diedo, ki yi ti yula yi naacenba, kelima wani Jesu yaa po.

⁶ U Tienu yua n den yedi: «Mi yenma n yendi li biigili nni,» teni ke mi yenma yendi ti pala nni, ki puni ti U Tienu kpiagidi yaa bandima, yaadi n yendi Kilisiti nunga nni.

⁷ Laa bonmoanla, ti kubi la ti tandi tiadi nni, ke lan doagidi ke laa paacianmoanu tie U Tienu yaa paalu yo, ke laa tie ti yaa yu ka.

⁸ Falabuoli kuli mabindi ti, ama yii paadi ti. Ti yama yagini, ama ti jigi naa cie.

⁹ Bi yen wangi ti fala, ama U Tienu ki ŋaa ti. Bi yen guliti ti, ama baa bolindi ti.

¹⁰ Yogunu kuli ti tugi Jesu kuuma ti gbanandi nni, ke wani Jesu miali mo n yaa doagidi ti gbanandi nni.

¹¹ Tinba yaaba n da fo, ti ye mi kuuma nni yogunu kuli, kelima Jesu po, ke wani Jesu miali n yaa doagidi ti gbanandi yaadi n baa kpe yaa niinni.

¹² Lanwani, mi kuuma tuuni ti niinni, ama li miali n tuuni yi yaa niinni.

¹³ Ti pia yantiayenli ti dandanli nni nani lan diani maama: «N daani, lani yaa po yo ke n maadi.» Timoko ti daani, lani yaa po yo ke ti maadi.

¹⁴ Ti bani ke wani yua n den fiini o Diedo Jesu bi tinkpiba siiga, baa fiini timo leni Jesu, ki teni ke tinba leni yinba kuli n taani ki sedi o nintuali.

¹⁵ Tin laa yaa yema kuli tie yi yaa po yo, ke U Tienu ŋanbili n yaa pugidi niba boncianla po, ki teni ban yaa tuondi ki pugidi boncianla o kpiagidi po.

Ki yaa ye kelima li dandanli po

¹⁶ Lani yaa po, tii luo papaali. Ba ke ti gbanandi kpeligidi ti niinni, ti pandi daali kuli.

¹⁷ Tin laadi yaa fala u naa yogunu po, naa tie puu leni wan bogindi ti yaa kpiagidi po. Laa kpiagidi yabi ki kan pendi hali abada.

¹⁸ Tii diidi bi niba n baa fidi ki le yaala ka, ama ti diidi ban kan fidi ki le yaala. Bi niba n baa fidi ki le yaala pia mi pendima, ama ban kan fidi ki le yaala naa pia pendima.