2 Korenti 13 - U TIENU MAAMA TILI 2013

Mi majuodikaama 13 I tundijuodike leni i fuondi

¹ Min baa cua yi kani yaama na n tie mi taataama. Maama kuli baa kadi siedinbilie bi siedinbitaa yaa ñoana nni.

² Min den ye yi kani miliema yaa yogunu ki yedi yaala, n go tuodi ki yedi la moala ba ke mii ye yi kani. Yaaba n den kpa tiendi ti tuonbiadi leni yaaba n sieni kuli, n yaa go cua yi kani, n kan cedi oba kuli.

³ Yi lingi yaala n doagidi ke Kilisiti maadi n ñoabu nni. Bandi mani ke wani Kilisiti naa tie tadimo yi po, ama o ye yi siiga leni u paalu.

⁴ Moamoani, o den ye leni o tadingu, ban den kpaa o li dapoanpoanli po yaa yogunu. Ama o ye ki fo, kelima U Tienu paalu po. Timoko taani leni o o tadingu nni, ki go baa yaa fo leni o, kelima U Tienu paalu po, tin tiendi yaala yi siiga po.

⁵ Yinba yi baa, yin kpaagi kpaagi ki le yi yaa ye li dandanli nni. Biigi mani yi yula yi baa. Naani yii bani ke Jesu Kilisiti ye yi niinni yo? Li yaa tie ke yi biigi yi yula, yi baa sua ke yi poadi.

⁶ N sugini ke yi baa bandi ke bi yaa biigi tinba, bi kan sua ke ti poadi.

⁷ Tin miadi U Tienu yaala tie ke yin da tiendi yaala n bia baa waamu. Laa tie ti bua ki yaa tie nani ban biigi ki pagi yaaba ka, ama ti bua ke yin yaa tiendi yaala n tiegi, baa li yaa naani ke bi biigi ti ki sua ke ti poadi.

⁸ Kelima tii pia yaa paalu n baa yie i moamoani po, se ki yaa ŋua i moamoani bebe.

⁹ Ti mangidi ti pala tin tadi ke yimo pa yaa yogunu. Tin miadi yaala ti jaandi nni tie ke yin ŋanbi ki dagidi cain.

¹⁰ Li tie lani yaa po ke n diani yi po laa maama kuli min ki ye yi kani yaa yogunu, ke n yaa ti cua yi kani, min da mabini yi leni o Diedo n dini nni yaa bali yaala n tie yi ŋamu po, kaa tie yi tingbali po.

¹¹ N kpiiba, n majuodikaama tie mine: Yin yaa mangidi mani yi pala. Moandi mani ki ŋanbi ki dagidi cain, baagi mani yiyaba, ki yaa pia mani yantiayenli, ki yaa mani leni yiyaba. Lanwani, mi buama leni mi yanduanma Tienu baa ye leni yi.

¹² Gobini mani yiyaba leni mi buamoanma. Bi nigagidiŋanba kuli fuondi yi.

¹³ O Diedo Jesu Kilisiti ŋanbili leni U Tienu buama leni U Tienu Fuoma Yua yanyenma n yaa ye leni yikuli.