2 Korenti 12 - U TIENU MAAMA TILI 2013

Poli n baa yaa bonlekaala

¹ Li tie n po tiladi ke min kpiagi n yuli. Ba ke laa pia mayuli, n baa waani yi o Diedo bonlekaala leni o bondoagidikaala.

² N bani o nilo Kilisiti nni, laa luo piiga n binanaa moala, ke bi den duoni o hali tanpotuadataa kaanu. O yaa den ye leni o gbanandi, bi o yàá den ye leni ti, mii bani, U Tienu bebe n bani.

^3-4 N bani ke bi den duoni laa nilo hali ŋalijani nni. O yaa den ye leni o gbanandi leni o yàá den ye leni ti, mii bani, U Tienu bebe n bani. Lankani, o den gbadi mi maama ke maa pia togida, ke li kua o nisaalo n maadi ma.

⁵ N baa kpiagi n yuli laa nilo yaa po, ama n kan kpiagi n yuli n yuceli po, li yàá tie n tadingu po yaa ka.

⁶ Ba n yaa bi bua ki kpiagi n yuli, n kan bi yaa tie o yanluodaano, kelima n bi baa maadi moamoani. Ama n baa cedi ki kan kpiagi n yuli, kelima mii bua o nilo n jigini nni, ki cie wan nua ke n tie yua na leni wan gbadi ke n maadi maama.

⁷ Lan baa gaa maama ke min da gbengi n yuli leni ti japaadi, kelima laa bondoagidikaala n den ŋani maama po, bi den kuani nani i konkoni yeni, n gbanandi nni. Li den tie Sutaani maleki yua n den kudi nni, ke min da gbie leni ti japaadi.

⁸ N den mia U Tienu taalimitaa ke wan ñani n po laa bonla.

⁹ Ama o den yedi nni: «N ŋanbili dagidi a po, kelima n paalu doagidi ku tadingu nne.» Lani yaa po, n tadingu nni, n baa yaa kpiagidi n yuli ki pugidi. Lani n tie Kilisiti yaa paalu n yaa ŋua nni.

¹⁰ Lani yaa po yo, ke n mangidi n pali leni ku tadingu, ti sugidi, mi luoma leni bi niba n faligidi nni ki mabindi nni, kelima Kilisiti po. Yaa yogunu ke n tadi, lanyogunu yo ke n pa.

Poli yanyagidi Korenti yaaba po

¹¹ Min kpiagi n yuli yeni, n tua nani o yanluodaano, ama yinba n teni ke n tua yeni, kelima li bi pundi yinbe n tieni n po siedi. Yaa tondiba n nua ke bi tie tondicianba yeni naa cie nni ba waamu, ba ke mii tie puu.

¹² Moamoani n den tieni yi siiga yaala n doagidi, ke n tie Kilisiti tondo, lani n tie ke n juuni mi biigima kuli nni, ki tiendi sinankeeninba, li bonlidinkaala leni mi bancianma.

¹³ N den tieni Kilisiti Nitaana ya n ye kaanto po be yo, kaa tieni yinba yaa po? N bani ke mii den tie yi po tugili bebe yo. Tieni mani n po sugili, ke n den tieni yeni, ki tudi yi po.

¹⁴ Diidi mani, mi taataama nne, ke n bogini ki kpendi yi kani. N kan yaa tie yi po tugili, kelima mii lingi yi piama ka, ama n lingi yinba yi ba yo. Laa pundi ke a bila n lingi ki bili bi danba po, kali bi bidanbe n lingi ki bili bi bila po.

¹⁵ Mini n ba n baa pa n piama n yama po, ki go pa n yuli yi po. Naani n buama yaa pugidi yi po, yi yaa buama baa wadi n po yo?

¹⁶ Li tie yeni, mii den tie yi po tugili, ama daalinba n tieni nunfanboe ki cuo yi.

¹⁷ Min den soani yaaba yi kani, bi siiga niloba den fie yi ki teni nni bi?

¹⁸ N den mia Titi wan gedi yi kani, ki go soani ti kpiilo wan yegi leni o. Naani Titi den fie yi bi? Tii den pia yantiayenli ka? Tii den ŋua fuuyenli ka?

¹⁹ Hali yogu yi tama ke ti bua ki saa ti yula po i moamoani yi kani bi? Ama li tie Kilisiti nni leni U Tienu nintuali, ke ti maadi. N buakaaba, tin maadi yaala yeni kuli tie ki baa todi yi, yin suagi liiga li dandanli nni.

²⁰ N jie ke n yaa cua yi kani, n kan sua ke yi tie nani min bua yin yaa tie maama, ki go jie ke yinba mo kan sua ke n tie nani yin bua min yaa tie maama. N jie ke n baa le yi kani ku mafuugu, li nunponli, li pabienli, mi paadima, ti sugidi, ku tuotabigu, ti japaadi leni yaala n tie sisindi sindi kuli.

²¹ N jie ke n yaa cua, n Tienu baa miidi nni yi siiga. N jie ke n baa buudi kelima tianba po, bani yaaba n den kpa tieni ti tuonbiadi ki naa lebidi bi pala ki ŋaa ban den kubi ki tiendi yaa joagindi leni yaa conconma leni yaa cagindi kuli yeni.