2 Korenti 10 - U TIENU MAAMA TILI 2013

Poli fu leni yaaba n nua ke waa tie tondo 10—12 Poli maadi ki baa gaa o yuli

¹ Mini Poli n tundi yi, kelima Kilisiti yumiinli leni o dingima po, mini yua n dingi yi siiga, ama n yaa foagi leni yi n tie nipaalo yi po.

² N mia yi ke n yaa cua yi kani, yin da tieni yaala n baa teni min yaa pia yi po ki mabinga. N nua ke li fidi min mabini bi nitianba, yaaba n nua ke tin tiendi yaala yi siiga, ŋua bi nisaaliba n nua maama.

³ Ba ke ti tie nisaaliba, tii tiendi bu toabu nani bi nisaaliba n tiendi maama.

⁴ Tin togidi ti yibalinba leni yaa toatiadi naa tie bi nisaaliba yaadi, ti tie yaa toatiadi n pia U Tienu paalu, yuu n fidi ki bolini yibalinba kaanpaali.

⁵ Ti guli yanmaalima buoli kuli leni ti yantia-japaadi yaala n fii ki yie U Tienu bandima po kuli. Ti go cuo ki dadi a yantiana kuli ke ŋan tuo ki yaa ŋua Kilisiti.

⁶ Ti go bogini ki baa cuo yiema kuli, yi tuoma yaa dagidi cain yaa yogunu.

⁷ Diidi mani lan tie maama moamoani. Niloba yaa nua ke o tie Kilisiti yua, wan yaa tiani ke tinba mo tie Kilisiti yaaba nani wani n tie Kilisiti yua maama.

⁸ O Diedo den dini nni li bali, ke min todi yi yin suagi liiga o sanŋoadima nni, laa tie ke min guli yi ka. Ba ke n mangi n pali laa bali po ki pendi waamu, fe ki pia nni li po.

⁹ Mii bua lan yaa tie nani n bua ki jieni yi leni n tila yeni.

¹⁰ Bi nitianba maadi n maama ki yieni: «Poli tila pia li mabinli leni u paalu, ama o yaa ye ti siiga wani, o tie tadimo, o maama mo ki pia fuoma.»

¹¹ Yaaba n yieni yeni n faami line, tin foagi leni yi ki maadi maama ti tila nni, ti bontienkaala mo baa yaa tie yene, tin ye yi siiga yaa yogunu.

¹² Ti kan tuo ki biigi ti yula ki dagini leni bi nitianba, yaaba n pagi bi yula. Bi tie yanluodanba leni ban biigidi bi yula leni bani bi ba yaa bonbiigikaala.

¹³ Tinba wani kan pagi ti yula leni yaa tuonli n pendi U Tienu n bili ti po yaa banlu. Ti baa pagi ti yula leni wan bili ti po yaa banlu, wani yua n puni ti u sanu, ke ti pundi hali yi kani.

¹⁴ Ti yàá den pundi yi kani, tin pagi ti yula maama yeni bi baa pendi, ama laa tie yeni, kelima ti den pundi yi kani ki wangi Kilisiti Laabaaliŋamo.

¹⁵ Tii pendi ti banlu, tii pagi ti yula leni nitoaba yaa tuona. Tin sugini yaala mo tie ke yi dandanli ti Diedo po n yaa pugidi, ke ti tuonli yi siiga moko baa pugini, ki ŋua U Tienu n bili ti po yaa banlu.

¹⁶ Tin go sugini yaala tie ki pendi yi diema ki suagi liiga moko, ki ban yaa wangi o Laabaaliŋamo yaa diema n ye yi liiga, ki da mangi ti pala leni U Tienu n teni ke nitoaba kpa naankani.

¹⁷ Lanwani, nani lan diani maama: «Yua n baa jigini o yuli, wan jigini o yuli, o Diedo nni.»

¹⁸ Laa tie yaa nilo n tieni o yuli siedi ka, baa baa o Diedo n saa o po i moamoani. Ama o Diedo n tieni yua yaa po siedi n baa baa wan saa o po i moamoani.