2 Korenti 1 - U TIENU MAAMA TILI 2013

Mi macilikaama 1.1-11 I fuondi

¹ Mini Poli, yua n tie Jesu Kilisiti tondo, kelima U Tienu yanbuama po, n taani leni ti kpiilo Timote, ki diani ki fuondi yinba U Tienu Nitaanli yaali n ye Korenti leni yaa nigagidiŋanba n ye Akayi diema nni kuli.

² Ti Baa U Tienu leni ti Diedo Jesu Kilisiti yaa ŋanbili leni o yanduanma n yaa ye leni yi.

Poli tuondi U Tienu

³ U Tienu yua n tie ti Diedo Jesu Kilisiti Tienu leni o Baa, wani mi ninñingbadima kuli Baa leni i baagi kuli Tienu, n baa ti pagidi.

⁴ Wani n baagidi ti ti fala kuli nni, ke tin fidi ki yaa baagidi yaaba n ye leni fala, kelima tinba ti ba, n baadi yaa baagi U Tienu kani yaa po.

⁵ Nani tin laadi Kilisiti n den laa yaa fala buolu boncianla maama, timoko baadi i baagi boncianla Kilisiti kani yene.

⁶ Ti yaa laadi fala, li tie yi yaa baagi leni yi yaa tindima po yo. Ti yaa baa i baagi moko, li tie yi yaa baagi po yo. Lani n tie yin fidi ki juuni, li yaa tie ke yi laa tin laadi yaa fala.

⁷ Tin pia yaa dugidi yi po mo se bonŋanla, kelima ti bani ke yin taani leni ti ki laadi fala yeni, yi go baa taani leni ti tin pia yaa baagi nni moko.

⁸ N kpiiba, n bua yin bandi ke ti den laa o falabiado, tin den ye Asi diema nni yaa yogunu. Laa falabiado den kpiagi ki pendi ti fidu banlu, hali ke ti den tama ke ti kaa pia miali.

⁹ Ti den nua cain ke ti kuuma yogunu pundi, ki go nua ke li tie yeni ki bua ki bangi ti, ke tin da go dugi ti fidiceli po, kali U Tienu yua n fiindi bi tinkpiba po.

¹⁰ Wani yua n den faabi ti, go baa faabi ti leni laa kuuma. Ti go sugini ke wan yaa faabidi ti.

¹¹ Yimoko baa todi ti, ki yaa jaandi ti po. Lani, niba boncianla baa teni tin baa laa ŋanbili U Tienu kani, kelima bi niba boncianla baa yaa tuondi o kelima ti po.

Poli leni Korenti yaaba 1.12—7.16 Poli lebidi o yanjagili

¹² Tin jigini ti yula yaala yaa po tie ke ti pala siedi doagidi, ke ti ye ŋanduna nni leni yaa tagu n gagidi leni yaa yantugupiendi n ñani U Tienu kani. Yaala n cie mo tie ke ti tagu den tie yeni, yimoko yaa siiga. Tii den pia laa tagiŋamu, kelima o nisaalo yanfuoma po ka, ama kelima U Tienu ŋanbili po.

¹³ Tii diani yi po bontoala, kali yin cogi ki gba yaala. N sugini ke yi baa yaa bandi ki pugidi, hali ki ban bandi la cain.

¹⁴ Nani yin bandi waamu maama, tinba n tie yi jigidi, ke yimo baa faa ki tua ti yaa jigidi o Diedo Jesu cuama daali.

¹⁵ Min den bani cain ke li baa yaa tie yeni, n den jagi ke n baa kpa gedi yi kani, ke yin baa li ŋanbili ki pugini.

¹⁶ N den baa ña yi kani ki suagi liiga ki gedi Maseduani diema nni, ki ña lipo, ki go tagi yi kani ke yin ciani nni min gedi Jude po.

¹⁷ Min den bua ki tieni yeni, naani li den tie leni ku jeligu yo? Bi n jagili yeni ŋua li nisaali-yantiali, ki baa yedi: «Mm,» ki go yedi: «Aa-a?»

¹⁸ U Tienu tie n siedi, ke tin den waani yaa maama naa den tie: «Mm,» leni: «Aa-a.»

¹⁹ Jesu Kilisiti, U Tienu Bijua, mini, Silasi leni Timote n den wangi yi yua yaa maama, naa tie: «Mm,» ki go tie: «Aa-a.» «Mm» bebe n ye o kani.

²⁰ U Tienu ñoaniani kuli tie: «Mm» o yaa niinni. Li tie wani yaa po ke ti tua: «Amina,» U Tienu kpiagidi po.

²¹ Yua n teni ke ti taani leni yinba ki se ke li pa Kilisiti nni, tie U Tienu, wani yua n den gandi ti,

²² ki tieni ti po o maalima, ki go puuni ti o Fuoma, ke mi ye ti pala nni ki tie nani i kpaaligi yeni.

²³ U Tienu tie n siedo. Li yaa tie ke n pua faama, wan taa n miali. Min den lebidi n jagili kaa cua Korenti yeni, tie ke mii bua ki cuani yi po pabiidile.

²⁴ Laa tie ke ti bua ki bili yin baa yaa daani yaala ka. Ama ti bua ki todi yi, yin yaa pia li pamancianli, kelima yi se ke li pa li dandanli nni.