2 Jan 1 - U TIENU MAAMA TILI 2013

I fuondi

¹ Mini o nikpelo n diani li tili fini Cannaa po, U Tienu n gandi yua leni a bila kuli po, min bua yinba yaaba leni i moamoani. Laa tie mini bebe ka bua yi, yaaba n bani i moamoani kuli bua yi.

² Ti bua yi kelima i moamoani po, yii n ye ti niinni, ki go baa yaa ye leni ti hali yaa yogunu kuli.

³ U Tienu yua n tie Baa leni Jesu Kilisiti yua n tie Baa Bijua n pa ti li ŋanbili, ki yaa gba ti po mi ninñima, ki go yaa puuni ti mi yanduanma, i moamoani nni leni mi buama nni.

I moamoani leni mi buama

⁴ N pali den mangi boncianla min den laa ke a bila siiga bi tianba cuoni i moamoani nni, nani Baa U Tienu n bili ti po maama.

⁵ Lanwani moala, Cannaa, min mia ŋa yaala tie line: Tin yaa bua tiyaba. Min diani a po yaama yeni naa tie bali mapanma ka, ama li tie tin den pia yaama hali mi cilima.

⁶ Mi buama yeni tie tin yaa cuoni nani U Tienu bali maama n bili maama. Lani n tie yin baa yaa ŋua yaa bali maama, nani yin den bandi maama hali mi cilima.

⁷ Mi tulinma danba boncianla, yaaba n naa tuo ke Jesu Kilisiti den cua ki tua nisaalo, cua ki yadi ŋanduna nni. Laa nibuolu n tie mi tulinma daano leni Kilisiti yieka.

⁸ Fangi mani yi yula ke ti tuonli bonluonkaala n da bodi, ama ke lan todi yi, yin baa yi panpaani kuli.

⁹ Yua n suagi liiga ki naa ye Kilisiti yaa bangima nni kuli, waa pia U Tienu. Ama yua n se mi bangima yeni niinni, wani n pia Baa leni Bijua.

¹⁰ O nilo yaa cua yi kani ki naa kubi laa bangima, yin da gaa o cangu, ki da yedi o: «Biali-biala.»

¹¹ Yua n yedi o: «Biali-biala,» taani leni o o tuonbiada nni.

¹² N go pia mi maama boncianla ki bua ki diani yi po. Die mii bua ki diani leni mi tidianñima li tili nni ka. Ama n sugini ki cua yi kani tin le tiyaba ki boe, ti pamanli n dagidi cain.

¹³ A kpiilo, U Tienu n gandi yaa pua yaa bila fuondi a.