1 Timote 2 - U TIENU MAAMA TILI 2013

Yin baa jaandi maama

¹ Min kpa tundi yi yaala tie ke yin yaa jaandi U Tienu, ki miadi o ki tuondi o bi niba kuli po,

² bi badiba leni bi yudanba kuli po, ke tin baa ki yaa ye leni mi yanduanma leni mi yansoangima, ki ŋua U Tienu ke li dagidi ki go tiegi.

³ Lani n ŋani ki go mani U Tienu ti Candaano po,

⁴ wani yua n bua bi niba kuli n faabi, ki go bandi i moamoani.

⁵ Kelima U Tienu ye ki tie yendo bebe, o candanbaalo moko ye ki tie yendo bebe U Tienu leni bi niba siiga. Lani n tie Jesu Kilisiti yua n den tua nisaalo.

⁶ Wani n den puni o yuli ki kpe, ki pani mi faabima panli bi niba kuli po. Laa siedi n den tieni u yogunu n den pundi.

⁷ Li tie lani yaa po ke U Tienu den puogi nni ke min yaa tie mawangika leni tondo, ki bangi bi nilanba li dandanli leni i moamoani nni. N maadi i moamoani, mii pua faama.

Bi jaba leni bi puoba maama

⁸ Lani yaa po, n bua ke bi jaba n yaa jaandi i kaani kuli, ki yugidi yaa nii n ŋani cain, ki naa pia pabienli leni niamiba kuli.

⁹ N go bua bi puoba mo n yaa yie yaa tiadi n dagidi, ki pia li fangili leni li yukubili, ki da sibidi biba leni i yupiani, wula tiadi, yaa lanbima yaa dunga pa leni tiatoadi moko, yaadi yaa dunga n pa.

¹⁰ Ama ban yaa sibidi biba leni a tuonŋama, lan dagidi ke yaa puoba n tieni siedi, ke bi ŋua U Tienu n yaa tiendi maama.

¹¹ Pua kuli n yaa cengi mi bangima leni li yumiinmoanli ki ŋmini.

¹² Mii puni pua u sanu wan bangi, bi wan diedi o joa, ama wan yaa ŋmini.

¹³ U Tienu den kpa tagi Adama, ki yuandi ki tagi Awa.

¹⁴ Li naa tie Adama ka den kua mi tulinma nni, ama li tie o pua n den kua mi tulinma nni, ki miidi li bali maama, ki tua i tagili daano.

¹⁵ Ba yeni, o baa faabi kelima o maalu po, li yaa tie ke o se li dandanli nni leni mi buama, mi gagidiŋanma leni li yukubili kuli nni.