1 Tesaloniki 4 - U TIENU MAAMA TILI 2013

Tin baa yaa ye maama ki mangidi U Tienu pali

¹ Ti kpiiba, ti majuodikaama tie mine. Ti den bangi yi yi tagi n baa yaa tie maama ki yaa mani U Tienu po. Moamoani yi tiendi yeni. Moala ti mia yi ki go tigini yi kelima o Diedo Jesu po, ke yin go yaa tiendi yeni ki pugidi.

² Yi bani tin den gaa yaa ñoamabona o Diedo Jesu kani ki teni yi.

³ U Tienu n bua yaala lani n tie yi gagidiŋanma, ke yin kubi yi yula ki da tieni conconbuoluba kuli.

⁴ O go bua ke yi siiga yuakuli n kubi o gbanandi mi gagidiŋanma nni leni yaa yema n dagidi nni,

⁵ ki da tuo o gbanandi bonbuakaala n diedi o nani bi nilanba yaaba n kaa bani U Tienu n tiendi maama.

⁶ Oba kuli n da boandi o kpiilo laa bonla nni, ki janbi o. Ti den tuodi ki waani yi ki go kadi ki waani yi, ke o Diedo baa tuu laa biadima buolu kuli panpaani.

⁷ U Tienu ki den yini ti ke tin yaa ye mi conconma nni ka, ama mi gagidiŋanma nni.

⁸ Lani yaa po, yua n yie laa tundi kuli, waa yie nisaalo ka, o yie U Tienu yua n puni yi o Fuoma Yua yo.

⁹ Laa go tie tiladi min diani yi po ki waani yi, ke yin yaa bua yi kpiiba, kelima U Tienu wani o ba n bangi yi, ke yin yaa bua yiyaba.

¹⁰ Yi tiendi yene mo yo, yi kpiiba yaaba n ye Maseduani kuli po. Ti mia ki go tundi yi, ke yin yaa tiendi yeni ki pugidi.

¹¹ Yin moandi mani ki yaa mani leni yiyaba, ki go yaa kubi yi ŋantaadiceli, ki yaa tuuni li tuonli ki baadi yaala n dagidi yi yema po mo, nani tin den kpa bangi yi maama yeni.

¹² Yin yaa tiendi yeni ke yaaba n kaa daani n yaa nua yi, ke yi tie nimoanba ki jigindi yi, ke yin da dugi nitoa todima po.

Li dandanli leni Kilisiti guacuama 4.13—5.28 O Diedo guacuama

¹³ Ti kpiiba, tii bua lan yaa boani yi yaaba n kpe yaa maama po, ke yin da ye leni li paboanli bi po, nani yaaba n ki pia suginmiba yeni.

¹⁴ Li yaa tie ke ti daani ke Jesu den kpe ki go fii bi tinkpiba siiga, ti go daani ke U Tienu baa fiini yaaba n daani o ki kpe kuli, kelima Jesu po. O baa teni ban taani leni o.

¹⁵ Ti kadi ki waani yi o Diedo n den yedi ti yaala: Lani n tie ke tinba yaaba n ye ki fo hali o Diedo guacuama, ti kan gaa yaaba n den kpe liiga.

¹⁶ Mi maalima yaa tieni, ke malekinba yudaano kpaani, ke U Tienu kakaci piebi, lanyogunu o Diedo wani o ba baa ña hali tanpoli po, ki jiidi. Yaaba n den kpe leni li dandanli Kilisiti po, baa kpa fii bi tinkpiba siiga.

¹⁷ Lani, tinba yaaba n sieni ki fo baa taani leni ba, ki yugi a tawala nni ki tuogi o Diedo mi fawaama nni. Lani, ti baa yaa ye leni o Diedo hali yaa yogunu kuli.

¹⁸ Lanwani, yin yaa baagidi mani yiyaba pala leni laa maama.